Bushe Uleibukisha?

Bushe walisanga ishafuma isha nomba line isha Ulupungu lwa kwa Kalinda isha bucindami bubomba kuli iwe? Lyene mulandu nshi te kwesesha ukwibukisha kobe ku mepusho yakonkapo:

▫ Nga ca kuti amatontonkanyo ya bucisenene yaingila mu muntontonkanya wesu ukwabula ukulaalikwa, cinshi tulingile ukucita?

Tulingile ukwalula ifya kutontonkanyapo, ukuya ku kwendauka, ukubelengako, nelyo ukubombako utumilimo twa pa ŋanda. Ipepo nalyo caba ca kwaafwa ca maka mu mibele ya musango yo. (Ilumbo 62:8)—4/15, ibula 17.

▫ Mulandu nshi abacaice balingile ukubela abasakamana ukukuma ku musango wa nyimbo bakutikako?

Inyimbo shalikwata amaka ku kukunta, ukwandatila, no kusonga. Apantu ifingi ifya fipimo fyalumbuka ifya nyimbo fyakwata impendwa ya kusungusha iya mashiwi ya manshoko aya pa lwa bwamba no kuloshako kuli bucisenene ukwasokama, cili icayanguka ukumona ukuti ukusakamana kukalamba kufwile ukubeleshiwa mu kusala amaseleti, amatepu, na ma disc.—4/15, amabula 20-1.

▫ Cinshi capilibulwa ku numbwilo “[ukubapo, NW] kwa kwa Shikulwifwe Yesu Kristu”? (1 Abena Tesalonika 5:23)

Iyi ilosha ku kubapo kwa cifumu ukushimoneka ukwa kwa Shikulu Yesu Kristu pamo nge Mfumu, ukufuma mu 1914, no kukonka pa kubikwa kwakwe pa cipuna ca bufumu mu muulu. (Ilumbo 110:1, 2)—5/1, ibula 11.

▫ Mifwaile nshi yabombelwe no kusangulula kwa kwa Yehova ukwe tempele lyakwe ilya ku mupashi? (Malaki 3:1-4)

Yehova afwaile itempele lyakwe ukuba mu mibele yasanguluka pa kuti lintu impendwa shikalamba isha bakapepa ababa na masubilo ya pe sonde shaletwamo, kuti basanga icifulo kuntu bumulopwe bwakwe bwa mu kubumbwa konse bucindikwa, uko kuntu ishina lyakwe lya bulesa lishishiwa, kabili uko kuntu amafunde yakwe ayalungama yomfwilwa.—5/1, ibula 16.

▫ Cinshi caba “fyonse ifyo akwata” ifyo Kristu Yesu apeela ku musha wakwe uwasontwa? (Mateo 24:45-47)

Ifi “fyonse ifyo akwata” filosha kuli fyonse ifintu fya ku mupashi pe sonde ifyasanguka icikwatwa ca kwa Kristu mu kulundana no bulashi bwakwe pamo nge Mfumu ya mu muulu. Ici mu kushininkisha cisanshamo umulimo wa kupanga abasambi ba kwa Kristu ukufuma mu bantu ba nko shonse. (Mateo 28:19, 20)—5/1, ibula 17.

▫ Ni shani fintu baeluda ba Bwina Kristu balanga “ukuitemenwa” mu kucema, ukulingana no kucincisha kwa kwa Petro pali 1 Petro 5:2?

Eluda wa Bwina Kristu uusakamana impaanga akabomba ubucemi bwakwe ku kuitemenwa, ku kuisalila kwakwe umwine, pe samba lya kutungulula kwa Mucemi Musuma, Yesu Kristu. Ukubomba ku kuitemenwa na kabili cipilibula ukuti kacema wa Bwina Kristu alanakila ku bulashi bwa kwa Yehova no kulangisha umucinshi ku kutantika kwa teokratiki.—5/15, ibula 20.

▫ Cinshi Yesu apilibwile lintu asosele ukuti uuli onse uulemukonka aali no ‘kuikaana’? (Mateo 16:24)

‘Ukuikaana’ cipilibula ukuti walubwila ubwine bobe kuli Yehova. (1 Abena Korinti 6:19, 20) Cipilibula ukuti uleikalila, te kuitemuna we mwine, lelo Lesa. (Abena Roma 14:8)—6/1, ibula 9.

▫ Cinshi cikabilwa ku kulenga umuntu uwa nsansa?

Ukuipakisha ukwampana kusuma na Yehova no kuisunga uwapamfiwa mu mulimo wakwe kulaleta insansa sha cine mu bumi bwa muntu.—6/1, ibula 22.

▫ Mulandu nshi Yehova asuminishe Abrahamu ukulanda mu kupama kwa musango yo pa lwa mifwaile Yakwe ku konaula Sodomu? (Ukutendeka 18:22-32)

Umulandu umo wali wa kuti Abrahamu aali cibusa wa kwa Lesa. (Yakobo 2:23) Mu kulundapo, Yehova alishibe ulwa kuyumfwa ukushikitika kwa kwa Abrahamu. Lesa alishibe ukuti umwipwa wa kwa Abrahamu Lote aikele mu Sodomu no kuti Abrahamu aali uwasakamikwa nga nshi pa lwa kucingililwa kwa kwa Lote. Pali iyi milandu Yehova aali uwaitemenwa ukwasuka amepusho ya kwa Abrahamu ukukuma ku mifwaile Yakwe ku konaula Sodomu.—6/15, ibula 16.

▫ Bushe Ukwaluka kwa ciProtestanti ukwa mu mwanda wa myaka walenga 16 kwaishibishe ukubwela kwa buKristu bwa cine?

Iyo, takwaishibishe! Ukucila ukuletako ubuKristu bwa cine cine, ukwaluka kwaleteleko impendwa ya macalici ya nko nelyo aya fifulo ayo yasenaminwa ku mabuteko ya bupolitiki na mu kucincila ukwafwilisha yene mu nkondo sha yako.—7/1, amabula 10-11.

▫ Finshi fili “ifyuma mu muulu” ifyo Yesu alandilepo pali Mateo 6:20?

Ifi fili fyuma ifishibonsa, ukusanshako ishina lisuma na Yehova ne calembwa cisuma ica mulimo wa Bwina Kristu uwa busumino. Ifi fyaba pa kati ka fintu ifyo Yehova ashilaba. (AbaHebere 6:10)—7/1, ibula 32.

▫ Mibele nshi Petro alumbula nge yakatama ku citetekelo cesu? (2 Petro 1:5-7)

Petro asosele ukuti ubulumba, ukwishiba, ukuilama, ukushipikisha, ukuipeelesha kwa bukapepa, ukutemwa aba bwananyina, no kutemwa filingile ukulundwa ku citetekelo cesu.—7/15, ibula 13.

▫ Kusoka nshi ku babomfi ba kwa Lesa ukwaba mu bulondoloshi bwalembwa ubwa lubembu lwa kwa Davidi na Bati-sheba? (2 Samwele 11:2-4)

Nangu ca kuti ali umuntungwa ukuipakisha ubuseko mu kati na nkati ka cupo cakwe ciine, Davidi alekele ulunkumbwa lwakwe ulwa kwampana kwa bwamba ukushili kwa mwi funde ukukula. Ukumona fintu umukashi wa kwa Uria aali uwayemba, anakile kwi tontonkanyo—ne ncitilo—ya kusanga ubuseko bushili bwa mwi funde na wene. Cimo cine kuti cacitika ku uuli onse uwa babomfi ba kwa Lesa nga ca kuti tasengawike uyu musango wa bufunushi. (Yakobo 1:14, 15)—8/1, ibula 14.