Inshita ya Kuseepa!
MULANDU NSHI ilyashi lya kale ilya “buKristu” lyapusanina no bwina Kristu umusango yu? Abantu batontonkanya ilingi balepusha ici cipusho, lelo Yesu ayaswike cene mupepi ne myaka 2000 iyapitapo mu mulumbe. Alandile ulwa ‘muntu uwatandile mbuto shisuma mu cilime.’ Lyene, “umulwani wakwe aliishile; atandile na mankumba mu ngano.” Lintu imbuto shalimbwike, ababomfi balimwene amankumba kabili bafwaile ukuyanukula. Lelo uyu muntu atile: “Lekeni fimenene pamo fyonse fibili ukufika pa kuseepa.” Pa nshita ya kuseepa, ingano shali no kupaatululwa ukufuma ku mankumba.—Mateo 13:24-30.
Yesu, pa kulondololo mulumbe, atile wene e watandile “imbuto shisuma”—Abena Kristu ba cine. Umulwani aali ni Satana, uwatandilemo “amankumba”—Abena Kristu ba cimbepa abasokelele mu cilonganino. Yesu asuminishe Abena Kristu ba bufi na ba cine ukubako capamo—lelo kufikila fye ukuseepa. Lyene baali no kupaatulwa.—Mateo 24:36-44.
E co, tatupapushiwa lintu twaishiba ukuti amateyanyo ya “Bwina Kristu” ukupulinkana imyanda ya myaka yaliseebanya Lesa pa kupokelela ififundisho fya cisenshi, ukutekelesha bucisenene, ukwafwilisha imbuli sha kucandila, no kutungulula ukulubulwisha kwakaluka ukwa butotelo. Tumona muli ifi imbuto shabipa ishatandilwe na Satana. Nangu cibe fyo, lintu twabelenga ulwa bantu umo umo ababikilwe mu fifungo no kwipaiwa ukucila ukunasha ifishinte fya Baibolo, tumona ukuti imbuto shisuma tashafumishiwepo umupwilapo.
Yesu atile ukuseepa “kusondwelela kwa micitile ya fintu” (NW) Apantu tuleikala mu kusondwelela kwa micitile ya fintu iya calo ca ndakai, ino ifwile ukuba e nshita ya kuseepa! E co ukupaatukanya kufwile kwalicitwa pa kati ka Bena Kristu ba cine na ba bufi. Ilelo, kulingile ukubako abantu, te bantu umo umo fye abasalangana, abalinga ubulondoloshi bwa kwa Yesu ubwa Bena Kristu ba cine—abanakila ku Bufumu bwa kwa Lesa kabili abashimikila imbila nsuma pa lwa bwene, abasumbula imibele yashimpwa pali Baibolo no kukaana ififundisho fya cisenshi ukusalapo icine ca Baibolo, abalenge shina lya kwa Lesa ukwishibikwa kabili abashaba lubali lwa calo.—Mateo 6:33; 24:14; Yohane 3:20; 8:32; 17:6, 16.
Tulemwebekesha, abantu ba musango yo e ko baba! Bushe mulefwaya ukubombela Lesa mu kupokelelwa? Lyene fwailisheni aba bantu, kabili bombeleni Lesa pamo na bene.