Bushe Kuti Bamunonsha?

MAGAZINI mukwete mu kuboko kwenu apekanishiwa ukuba intulo ya kukoselesha, ukuleta ku muntontonkanya ubutungulushi bwa Baibolo ku kushikatalika indupwa no kusungilila bumpomfu bwa muntu pa lwakwe. Alanga ukuti inshita sha lelo ishacushiwa shalisobelwe muli Baibolo, kabili ebekesha ukupikulula—kamfulumende wa Bufumu bwa kwa Lesa. Bushe kuti mwanonkelamo ukufuma mu Ulupungu lwa kwa Kalinda na Loleni!, magazini munankwe?

Ukufuma ku Philippines umwanakashi we shina lya Vilma alembele ati: “Nga ca kuti kuliko ishiwi ilili lyonse ilya kulondolwelamo impapulo shenu, ndemona kuti nasala ilya ‘kusungusha.’ Nalimwene no kubelenga pa muku wa kubalilapo Loleni! wenu no Ulupungu lwa kwa Kalinda lintu nali muli basi ukubwelela ku ŋanda ukufuma ku Manila. Ilingi line nsenda inyunshipepala lintu ndi pa lwendo, lelo uno muku nshasendele iili yonse.

“Uwaikele mupepi na ine pa lwendo aali mwaume wa mushinku wa pa kati uwakwete impapulo shenu. Pa numa abelengele Loleni!, afumishe magazini na umbi, Ulupungu lwa kwa Kalinda. Nakwete ishuko lya mu nshita ilya kwashima Loleni! Mu bufumacumi, naliipakishe icine cine ukubelenga balya bamagazini pa mulandu wa kuti ifipande fyonse fyali ifya kusekesha, ifyalingana ne nshita, kabili ifya kukoselesha.”

Umwanakashi asondwelele ukuti: “Ndefwaya ukulapokelela bamagazini benu. Napaapaata lekeni njishibe ifyo ningalapokelela bene.” Iofesi lya musambo ilya Nte sha kwa Yehova mu Philippines lyali ilya nsansa ukulunda uyu mwanakashi ku mutande wabo uwa abo batumina bamagazini mu melu.