Bakabilisha Ba Bufumu Bacita Lipoti

Akonkele Kampingu Wakwe Uwakanshiwa na Baibolo

IMFUMU ya Israele Davidi apepeele ukwaafwa kwa kwa Yehova lintu atile: “Lelo ine ndeenda muli bumpomfu bwandi; ndubuleni, no kunsenamina.” (Ilumbo 26:11) Lesa alimusenamine pa kusunga bumpomfu bwakwe. Yehova na kabili apaalile Yesu pantu acitile ukufwaya kwa kwa Wishi wa ku muulu, kabili apaalile umusepela mu Colombia uwakonkele kampingu wakwe uwakanshiwa na Baibolo kabili apampamine pa kucita ukufwaya kwa kwa Lesa. Uyu mulumendo ashimika ukuti:

“Lintu natendeke ukusambilila Baibolo ne Nte sha kwa Yehova, nali umusambi mwi sukulu lya ciKatolika. Nangu cibe fyo, kampingu wandi alencusha lintu nalesangwa ku Minsa, e co naile ku mukalamba we sukulu (uwali umupatili), iciŋombe, ne ntungulushi ye bumba lintu nalimo no kwipusha ukufumishiwa ku kulasangwa ku Minsa. Nangula ca kuti nalifumishiweko, bamo baeseshe ukumpatikisha ukusangwako. Ukutitikisha kwalikulileko pa numa fye ya lubatisho lwandi nga umo uwa Nte sha kwa Yehova. Tata antiinishe ukuntamfya pa ŋanda nga ca kuti nalitamfiwe isukulu. Ankwatile amasomo ya ku universiti ne ncito ya waishibisha mu muntontonkanya wakwe.

“Umukalamba we sukulu libili libili alesoka pa lwa uli onse uwafililwe ukubaka ukukakililwako kwa ciKatolika. Lintu inshita yaishile iya Minsa ya kubalilapo iya mwaka, nalifiseme ukufikila yapwile. Lyene napeele kafundisha (umupatili) kope wa broshuwa ya School and Jehovah’s Witnesses no kumweba ukuti nga umo uwa Nte sha kwa Yehova, nshali na kusangwa ku Minsa. Atile: ‘Ulingile ukutampa ukufwaya isukulu kumbi.’ Nalishibe ukuti ukutamfiwa kwandi isukulu kwali no kupilibula ukutamfiwa ukufuma pa ŋanda kuli tata. Nangu ni fyo, nalipepele kuli Yehova no kutwalilila ukucitilo bunte bwa kushimikisha ku banandi ba pa sukulu.

“Inshita ya kutuusha yalishile. Lyene, ukubwelela ku sukulu pa numa ya kutuusha, na kabili yali ni nshita ya Minsa. Umukalamba we sukulu na bapatili bambi baali ku ntanshi ya cikuulwa ce calici, abaipekanya ukumfwa ukutumbula kwa membu. Napene ncimfiwe ku mwenso. Nalingile no kwikala pa nshi, lelo kampingu wandi alincushishe. Lintu ukwimba kwatendeke, natontonkenye nati, ‘Cinshi ndecita muno? Yehova e Lesa wandi. Te kuti mbe kuuwe no kumufutuka. Te kuti mulenge nsoni. Takanshe.’ Napepeele ubukose. Lyene, nafumine mu cikuulwa ce calici no kwiminina mu mulongo wa baletumbula imembu. Lintu nafikile pa mukalamba we sukulu, namwebele nati: ‘BaKafundisha, nshishile ku kutumbula imembu.’ Atile: ‘Nacelenganya ifyo.’ Namwebele ukuti ndi uwaitemenwa ukucula ifya kufumamo lelo ukuti kampingu wandi tansuminishe ukwakana mu Minsa. Te kuti mombe mu kupusana ne fintu ifyo nasambilile ukufuma muli Baibolo.

“Alimfindamine, alimwentwile, no kutila: ‘Ndakukumbwa. Imwe bonse mwe Nte mwawaminwa ukukumbwa. Kuli imwe, Lesa e wisa intanshi, kabili mwaliba abaipekanya ukumfwila amafunde yakwe nangu cibe shani. Twalilila. Ulecita bwino nga nshi. Kanshi baKatolika bonse nga bali nga imwe, ukulangisha ukupimpa kwa musango yu, ukutemwa kwa musango yu ukwa kuli Lesa. Ukutula lelo, wafumishiwako ku kwakana ku mapepo ya butotelo bwesu.’ Fintu nali uwa buseko! Yehova aali napaala umupampamina wandi uwa kumfwila kampingu wandi uwakanshiwa na Baibolo.

“Ubushiku bwakonkelepo umukalamba we sukulu aebele abasambi ukuti: ‘Amabutotelo yambi yalitucila. Mulandu nshi tushabela nga yene, abapimpa, mu kuba no kutemwa kwashika ukwa kuli Lesa no kufwaisha kwa kumubombela ukucila pa cili conse cimbi? Ici e cintu cimo icilekabila ukuba mu mitima yesu.’

“Mu kupelako umukalamba we sukulu alikuushiwe ukuya ku Rome, kabili umukalamba we sukulu umupya asuulileko fye ukukanaakanamo kwandi. Tata alifumine mu ŋanda, ukunsha umuntungwa ku kufika pa buyo bwandi ubwa butumikishi bwa nshita yonse lintu napwishishe isukulu.”

Yehova apaalile uyu wacaice uwakonkele kampingu wakwe uwakanshiwa na Baibolo. Mu musango umo wine akapaala abo bonse abafwaya ukucita ukufwaya kwakwe.—Amapinda 3:5, 6.