Mwaiseni kwi Bungano lya Citungu Ilya “Akatiina ka Bukapepa”!

EE, inshita naifika iya mabungano ya citungu aya 1994 aya Nte sha kwa Yehova. Ukufuma mu June 1994 ukufika January 1995, abantu bakomfwa programu we bungano uwa nshiku shitatu mu myanda ya misumba ukushinguluke calo conse—ukubalilapo mu North America, lyene mu Eastern na Western Europe, Asia, Central na South America, Africa, Australia, na mu fishi fya bemba.

Mwandi mutwe wa kubimbule tontonkanyo—“Akatiina ka Bukapepa”! Uyu tauli mwenso wa kulwalika uwa umo uo ubumi bwakwe buli mu busanso lelo katiina ka kuli Lesa, akatiina ako kapeela umutende wa muntontonkanya no buseko. Ipinda lya Baibolo litila: “Icilambu ca kufuuka na katiina ka kuli Yehova, bucindami no bukata no mweo.” (Amapinda 22:4) Ni shani fintu ukutiina Lesa kwingafumamo “bucindami no bukata no mweo”? Ico cikaba icamonekesha ilyo umutwe we bungano ukalalundululwa mu nshiku shitatu ishaisulamo amalyashi, ukulanshanya, ifilangililo, ne cilangililo cikalamba cimo.

Umutumwa Paulo alembele ukuti tatulingile ‘ukuleko kulongana.’ (AbaHebere 10:25) Inte sha kwa Yehova shalikatamike co, shilakumana imiku itatu mu mulungu ku kusambilila kwa cilonganino no kupepa. Nangu cibe fyo, ibungano lya cila mwaka lyaliba ilyaibela. Inte shilolesha ku ntanshi kuli lyene mu kuba no kwenekela ifisuma kabili balanda pali lyene pa myeshi iingi pa numa lyapita. Tulekulaalika mu kukaba, te mulandu no butotelo bobe, ku kuilunda kuli shene pe bungano lyabo no kuipakisha ukubishanya kwakaba ukwa Bwina Kristu ne fyebo fya ku mupashi ifyakatama. Icilundwa ca cilonganino ca cikaya ica Nte sha kwa Yehova akaba uwa nsansa ukukweba ni kwi kabili ni lilali ibungano lipalamishe na kuntu wikala likacitwa.