Ibungano lya Citungu Ilya 1994 Ilya “Akatiina ka Bukapepa”
1 Abaume ba busumino balilangisha “akatiina ka [bukapepa, NW]” ukufuma ku nshita ya kwa Abele na Noa ukufikila ndakai. (Heb. 11:4, 7) Ukubelesha akatiina ka bukapepa cipilibula ukulangisha “umwenso no kucindikisha kwashika kuli Kabumba no mwenso uutuntulu uwa kumufulwisha.” (it-1 ibu. 818) Mu kati ka August na September, tukalangisha uku kucindikisha kwashika ukupitila mu kusangwako kwesu kwi Bungano lya Citungu ilya “Akatiina ka Bukapepa.” Bushe ukabako ku kuipakisha programu onse, ukufuma ku lwimbo lwa kwiswila ukufikila ipepo lya kupelako?
2 Cila mwaka tupalamina kwi bungano lya citungu mu kuba no kwenekele fisuma kwaswatuka. Nangu ca kuti ukubombesha ukukalamba ukwa pa lwesu ne fipooswa kuti pambi fyabimbwamo, amapaalo ayali no kupokelelwa yengi. Tubwelela ku sha myesu mu kuba no kusekelela, abaikushiwa kabili abakuulililwa lwa ku mupashi. (Linganyako 1 Ishamfumu 8:66.) Ukubishanya kulaba ukwa kucincimusha, kabili ibungano litupayanishisha ukwaluka kwa musenselo. Lelo ibukisha, tulonganina ukupepa Yehova. Atukambisha ukucite fyo. Aletusambilisha ifya kuinonsha fwe bene.—Amala. 31:12, 13; Amalu. 122:1.
3 Ibungano lya Nshiku Shitatu: Programu uno mwaka akapeelwa pa mabungano 49 mu Zambia. Ukulunda ku Cibemba, amabungano yakacitwa mu Chicheŵa, Chitonga, ciLuvale, ciNgeleshi, na Silozi.
4 Programu akatendeka pa Bushiku bwa Kubalilapo pa 09:20 kabili akasondwelela pa Bushiku bwa Kulekelesha mupepi na 16:15. Pa Bushiku bwa Cibili, programu akatampa pa 09:00 na pa Bushiku bwa Kulekelesha, iciputulwa ca kulongana cikatendeka pa 09:30.
5 Ukucindikisha Kwashika Ukwa Kuli Yehova Kulatukunta Ukusangwako: Paulo afundile Abena Kristu abaHebere ‘ukupyungila Lesa ukumutemuna no bufuuke na katiina.’ (Heb. 12:28) Ibungano lyesu ilya citungu uno mwaka lipekanishiwe ku kutwaafwa ukucita ifyo fine fye. Kuti pambi twakumanya ifipindami fimo ifyo fingabika ku bwesho umupampamina wesu uwa kusangwako. Kuti pambi fyamoneka ifyalulubala nge mpili, lelo mu kuba no kwaafwa kwa kwa Yehova ifi kuti fyacimfiwa. (Mat. 17:20) Nga ca kuti tauli na maka ya kutantika cuti obe ku kusanshako ibungano lyonse, ukufuma pa Bushiku bwa Kubalilapo ulucelo ukupulinkana ukufika pa Bushiku bwa Kulekelesha icungulo, bushe walitununuka abakwingishe ncito mu kubamo ipepo ku kulomba ulusa lwa kukanaya ku ncito pali iyo nshita? (Yako. 1:6-8) Abana be sukulu abakalasangwa kuli limo ilya mabungano ya mu kubangilila ilyo amasukulu yashilaisalwa balingile mu kubamo umucinshi ukwishibisha bakafundisha babo ukuti tabakese ku sukulu pali Cisano pa mulandu wa ulu lubali lwakatama ulwa kupepa kwabo ukwa butotelo.
6 Shukila Ubukumu: Bukumu nshi ubo? Inshita na maka ifipooswa mu kusangwa kwi bungano. Te kuti cibemo amano ukucita amapekanyo yasakamanisha aya kusangwa kwi bungano lya citungu ilya uno mwaka e lyo ukubwelela ku ŋanda pa Bushiku bwa Kulekelesha natupusa iciputulwa cikalamba ica programu. Bushe kuti washiila umutebeto pa kati pa kuti wingayasakamana imilandu imbi? Nangu cibe fyo, ukukosoka kwesu ukwa ku mupashi na katiina ka bukapepa tafilingile ukutusuminisha ukupusa icili conse ico Yehova atupekanishishe.—Linganyako 1 Abena Korinti 2:9, 10.
7 Abengi aba ifwe napamo te kuti tutontonkanye ukufumapo mu kubangilila. Nangu ni fyo, nalyo line kuti twapusa iciputulwa cikalamba ica programu. Ni shani fintu ici cingacitika? Pa kukanacitila libela amapange ku kushininkisha ukuti twapokelela ukunonkelamo kwakumanina ukufuma mu mbali shilepeelwa. Tulefwaya ukutampa ubushiku bumo na bumo mu kubangilila icalinga ukulya umwikulo walinga no kusakamana imilandu imbi iyakabilwa pa kuti twingaba mu fipuna fyesu ilyo programu talatendeka. Ukukwata ukusendama kwalinga na ko kwine kwaliba ukwakatama pa kuti tukabe abapempwila kabili na maka ya kutontomesha pali programu wa kasuba konse.
8 Inshila yashininkishiwa iya kulobolola ukunonkelamo kukalamba ukufuma muli programu yaba kulemba ifyebo fyalinga. Caliba icakatama ku bacaice ukulembe fyebo nga fintu fye caba ku bakalamba. Kasabankanya wa myaka ya bukulu 16 atila: “Ndalemba amalembo ayalumbulwa mu lyashi. Lyene kuti napituluka mu lyashi ku ŋanda.” Umusepela wa myaka ya bukulu 16 na umbi alundapo ukuti: “Ndandika ifishinka fikalamba. Cilalenga umuntontonkanya wandi ukutontomesha.” Ilingi line nga nshi fintu fye ukabila kuli programu fyaba ni Baibolo, icitabo ca lwimbo, noti buku walinga, na bopeni nelyo pensulo. Kwena, abafyashi abali na bana banono bafwile ukusakamana ukukabila kwabo, lelo caliba icawamisha ukukanaipumfyanya no kupumfyanya bambi mu kuba ne fya kutalalika ifikalamba ne fipe fya pa lwenu ifingi nga nshi.
9 Bamunyina bamo balakopa programu, ukubomfya tepu nelyo kamera wa video, ku kulisha pa numa ku ŋanda. Ukucite fi cili ku muntu pa lwakwe, lelo ico bamo bakumanya cili ca kuti lintu babwelela ku mibombele yabo iya lyonse, takuba inshita ya kulisha ifyo bakopele. Mu kulundapo, ifishinka fya mpikwe fimo mu lyashi kuti pambi fyapuswa ilintu ulebombela pa ca kukopa.
10 Tulingile ukucita ukubombesha kwafumaluka ukuba mu fipuna fyesu pa ntanshi programu talatendeka. Nangu ca kuti tuli pa kati ka kushimika ifya kukumanya fya nsansa ne fibusa fya kale lintu ceyamani abilisha ukuti programu alaswa atendeke, cilangisha umucinshi kuli abo abali muli programu, na kuli bamunyinefwe mu cinkumbawile, nga ca kuti mu kwangufyanya twaputula ukulanshanya kwesu no kwikala mu fipuna.
11 Amabungano ya citungu yaba lyonse tushita twa buseko pa mulandu we paalo lya kwa Yehova ilyapaka. Tupokelela ukunonkelamo kwa ku mupashi no kwa ku mubili. Cifwile ukwibukishiwa ukuti ifipooswa ifingi filabimbwamo mu kusonkela icifulo ce bungano. Ni shani fintu ifi ifipooswa ne fyalundwapo fifimbwa? Ukupitila mu misangulo yesu iya kuitemenwa, atemwa mu ndalama nelyo ukupitila muli cheke iili no kulipilwa ku “Watch Tower Society.” Ici caba mu kumfwana no mupashi wa Ilumbo 96:8, ilitukoselesha ‘ukutuutubwila Yehova ubukata no kulete ica bupe mu mansa shakwe.’
12 Bushe Imyendele Yobe Ikaleta Ilumbo? Cila mwaka Ubutumikishi Bwesu Ubwa Bufumu ubwa July mu cikuuku bulatucinkulako ulwa kukatama kwa myendele isuma ilintu tulesangwa kwi bungano lya citungu. Kwena, imyendele yesu ilingile lyonse ukuba iya ca kumwenako, lelo lintu tulongene mu mpendwa shikalamba, ilingi line twisa pe samba lya kuceeceeta kwapalamisha ku ba ku nse ya cine. Imyendele yesu, iisuma nelyo iibi, kuti pambi yalanda ifingi pa lwa ifwe ukucila ukushimikila kwesu. Tulefwaya Yehova ukulumbanishiwa pa cintu tusosa no kucita.—Amapi. 27:2; 1 Pet. 2:12.
13 Pa numa ye Bungano lya Citungu ilya mwaka wapwile ilya “Ukusambilisha kwa Bulesa,” malonda umo pali limo ilya mamotela alandile ukuti: “Ili e bumba lya bacaice ilyawamisha ilyo nali no kulinda pa nshita ntali.” Lyene, pa numa ya kulanda pa lwa mibele yabipa no bonaushi bwa mabumba yambi aya bacaice, alundilepo pa lwa bana ba Nte ukuti: “Balaisunga bwino kabili basuma ukubapo. Kanshi ukubungana konse ukucitilwa kuno nga kuba nge li bungano.”
14 Kalemba wa mikululo ya mu nyunshipepala ya mu United States acitile uku kulandapo pa lwe bungano ukuti: “Abanakashi na bakashana bafwele ifya kufwala ifisuma, kabili abaume na bakalume bafwele amajaketi na matai. Mu kuswatuka balelembe fishinka ilyo balekutika ku nshiku shine isha bakalanda. Kabili nga ca cine ukuti ubusaka bwapalamina kuli bukapepa, kwena, Inte sha kwa Yehova basenda iyo mfundo ukufika ku cipimo cipya.” Nangula ni fyo te yonse amalipoti ayaba ayasuma nge fyo.
15 Pe bungano limbi cacitilwe lipoti ukuti kwali ukwendauka ukwafulisha mu kati ka fiputulwa fya kulongana. Ukucila pali 1,000 (abengi aba bene abali bana) balipendelwe mu cibansa mu kati ka programu wa cungulo kasuba pa Cibelushi, icingalangilila ukuti ukukansha ukwafulilako no kusopa filekabilwa ku bafyashi. Ukwendauka ukwingi mu cibansa kulenga icongo cakulisha ico caba ca kupumbula kuli abo abaleesha ukukutika. Impendwa inono balakwata imilandu yakabilwa iya kusakamana mu kati ka programu, lelo bushe ifwe fwe bashala tatulingile ukuba mu fipuna fyesu, ukukutika mu kusakamanishisha?
16 Abafyashi bafulilako baliba abakosa ku bana babo pa lwa kusangwa ku kulongana cila mulungu. Bushe tabalingile ukuba abakosa mu nshila imo ine lintu caisa ku kushininkisha ukuti abana babo baikala mupepi na bene kabili tabalelulumba mu cibansa mu kati ka programu? Icibansa ce bungano cisangulwa ukuba Iŋanda ya Bufumu iikalamba, lelo ino ili micitile ya kwa Satana, kabili kuti caba icayanguka ku bantu bashakwata fishinte ukwingila mu cibansa mu kuba ne mifwaile yalubana. MULEKABILA UKWISHIBA UKO ABANA BENU BALI NA CINTU BALECITA PA NSHITA SHONSE.
17 Imifwalile ne Misakwile: Twikala mu nkulo umo imimonekele ya kuilekelesha, nelyo fye iya busanku, imonwa nge yapokelelwa. Abantu abengi balasangwa ku macalici na ku fiila nelyo ku kulya mu fikuulwa fya kuliilamo mu mifwalile ya kuilekelesha nga nshi. Ukulandapo ukwambwilwe mu paragrafu 14 kulangisha ukuti kwaliba abo abacili bakumbwa imifwalile ya mucinshi, ukucilisha mu kulundana no kupepa. Imifwalile ya busanku, iya kuilekelesha ne misakwile iishalinga filanda ifingi pa lwa ifwe. Te kwesha ukulaba ukuti icifulo ce bungano ni Ŋanda ya Bufumu iyakushiwa. Bamo balafwala mu mucinshi kwi bungano lelo pa numa ya fiputulwa fya kulongana baya bafwele mu kukanalinga nelyo mu kukanayana ku fifulo fya kuliilamo ifya cikaya no kuli konse kumbi.
18 Abaleya ku lubatisho balekabila ukucinkulwako ukuti ifya kusaamwina fimo fimo tafyaba ifyalinga kuli ici ica kucitika. Ifya kusaamwina filingile ukuba ifyalinga kabili ifyayana. Ni ani alingile ukupime ci? Baeluda e bashingamwa ku kusakamana ukuti uuli onse uulebatishiwa ukufuma mu cilonganino cabo tabikile ca kupunwisha. (2 Kor. 6:3, 4) Ici cilepilibula ukuti takufwile ukubako ifya kusaamwina ifya lubeebeelu na basikipa abakwatapo imicincisho nelyo ukusabankanya kwa ku calo. Kuti caba icalinga kuli baeluda ukulanshanya uyu mulandu no uleya ku lubatisho ilintu balepituluka mu fipusho fya mu citabo ca Ubutumikishi Bwesu.
19 Ifibombelo fya Kukopela: Nga fintu cilondolwelwe mu kubangilila, ukubomfiwa kwa fibombelo fya kukopela, ukucilisha ifya kukopelako video, fyaba kupingulapo kwa umo umo. Nga ca kuti wapingulapo ukukopa, twapaapaata langisha ukulangulukilako kuli abo abakushingulwike. Kuti caba kupumbula nelyo fye lintu ukukopa kulecitilwa apo pene umo ekele. Takuli nangu umo uulekabila ukucinga bambi abasangilwe kwi bungano ilyo alekopa. Ukulundapo, takuli ifibombelo fya kukopela ifili fyonse ifili no kukulikwa ku ntambo sha malaiti nelyo isha fisoselo, kabili tafilingile ukucilika umwa kupita.
20 Ukwikala: Impika yaampana no kusungila ifipuna icili ilekabilwa ukusakamana. Na kabili kuti twatemwa ukumucinkulako ukuti: IFIPUNA KUTI PAMBI FYASUNGILWA FYE IFILUNDWA FYA LUPWA LWENU IFYAPALAMISHA NA BALI BONSE ABO MULEENDA NA BO MULI MOTOKA WA PA LWENU. Pa fifulo fya mabungano fimo, bamunyina ne nkashi baalebutukila pa kwingila. Camwenwe ukuti “abo abaleenda fye ukuya ku fipuna mu nshila ya lyonse baali fye no kusanga ifipuna ku numa ya cibansa. Abengi balesungila ifipuna ifingi nga nshi, kabili lyene ifipuna fyasungilwe tafyaikelwepo.” Ifi fibelesho fyabulo kulangulukilako fimoneka ukutwalilila te mulandu no kucinkulako kwa lyonse. Bushe tatulingile ukubebeta imitima yesu pali uyu mulandu no kwetetula pa fishinte mu Abena Filipi 2:3, 4?
21 Ibungano limo na limo lilacita ukupayanya kuli abo abakwata ukukabila kwaibela, pamo nga bacikoloci na balemana. Twapaapaata shininkisheni ukukanaikala pa fipuna muli cimo ica ifi fiputulwa nga ca kuti tamufikilepo. Na kabili, beni abapempwila ukwafwilisha abo abakwata ukukabila kwaibela ku kusanga icipuna nga ca kuti tabali na umo uushingemwe ukubasakamana.
22 Umulimo wa fya Kulya: Pa mabungano yamo calimonwa ukuti bamunyina balaibimba mu kushitisha umunani ne fintu fimbi kuli bamunyinabo. Tapalingile ukubapo umushiika pa cifulo ce bungano. Dipartimenti wa Mulimo wa fya Kulya alingile ukushininkisha ukuti umunani ne fya kulya fimbi kuti fyashitwa ukufuma ku main store. Nga ca kuti bamunyina baleta umunani kwi bungano ku kushitisha balingile ukushitisha ku main store ye bungano pa mutengo walinga pa kuti wingashitishiwa kuli bamunyina ukufuma kulya. Umulandu wesu uwa kusangilwa ku mabungano ulingile ukuba kunonkelamo lwa ku mupashi te kucita ubusulwishi. Imishiika tayakasuminishiwe ukuli konse mu kati ka cifulo ce bungano pe bungano lya uno mwaka.
23 Pa August 12, 1994, Ibungano lya Citungu ilya “Akatiina ka Bukapepa” ilya kubalilapo likatendeka. Bushe nupwisha amapekanyo yobe, kabili bushe nuipekanya ku kuipakisha inshiku shitatu isha kubishanya kwa nsansa ne fintu fisuma ifya ku mupashi? Cili lipepo lyesu ilyafumaluka ukuti Yehova apaale ukubombesha kobe ku kubungana luno lusuba no kuliishiwa pa cintamba ca kwa Yehova ica fisuma pe Bungano lya Citungu ilya “Akatiina ka Bukapepa.”
[Akabokoshi pe bula 6]
Ifya Kucinkulako fye Bungano lya Citungu
Ulubatisho: Abaleya ku lubatisho balingile ukuba mu fipuna fyabo mu ciputulwa capeelwa kuli bene pa ntanshi programu pa Bushiku bwa Cibili ulucelo talatendeka. Calimonwa ukuti bamo balafwala umusango wa fya kufwala ifishili fya mucinshi kabili ifingapumbula ukufuma kuli ici ica kucitika. Ica kusaamwina icalinga ne taulo filingile ukuletwa kuli umo umo uulepekanya ukubatishiwa. Pa numa ya lyashi lya lubatisho ne pepo kuli kalanda, ceyamani wa ciputulwa ca kulongana akapeela amakambisho ayepi ku baleya ku lubatisho kabili lyene no kwita ku kwimba ulwimbo. Pa numa ya cikomo ca kulekelesha, bakapyunga bakatungulula abaleya ku lubatisho ku cifulo ca kwibishiwa. Apantu ulubatisho mu cilangililo ca kuipeela kwa umo mulandu wabamo isenge kabili uwa pa lwakwe pa kati ka muntu umo umo na Yehova, takwabako ukupayanya kwa ciitwa ulubatisho lwa bunabo uko abaleya ku lubatisho babili nelyo abafulilako bakumbatana nelyo ukwikatana amaboko lintu balebatishiwa.
Amabaji: Twapaapaata fwaleni baji wa 1994 pe bungano kabili na lintu muleenda pa kwisa na pa kuya ukufuma ku cifulo ce bungano. Ici ilingi line cicilenga ukucitikako kuli ifwe ukupeela ubunte busuma lintu tuleenda. Ici cali mu kumonekesha ica cine umwaka wapwile ukukuma ku mabungano yacitilwe mu Moscow na Kiev. Amabaji no tumanikilo filingile ukupokwa ukupitila mu cilonganino cenu, apo tayakabeko pa mabungano. Ibukisha ukusenda kardi obe uwa Medical Directive uwa nomba line. Ifilundwa fya lupwa lwa Bethel na bapainiya balingile na bo bene ukukwata amakardi yabo aya kwishibikilwapo.
Umulimo wa Kuitemenwa: Bushe kuti walubulako inshita pe bungano ku kwaafwa muli imo iya madipartimenti? Ukubombela bamunyina, nangu fye ni pa nshita iinono, kuti kwaba kwa kwaafwa nga nshi no kuleta icipimo cisuma ica kwikushiwa. Nga wingaafwa, twapaapaata cita lipoti kuli Dipartimenti wa Mulimo wa Kuitemenwa pe bungano. Abana abali bonse pe samba lya myaka 16 nabo bene kuti bacita ukusangwilako kushaiwamina pa kubomba pe samba lya butungulushi bwa mufyashi nelyo umukalamba umbi uwashingamwa.
Amashiwi ya Kusoka: Pa kuba abapempwila pa lwa mpika shingacitikako, kuti twaipususha fwe bene ukufuma ku mafya yashikabilwa. Ilingi line abapuupu na bantu bambi abashaba na fishinte bakasansa abantu abatalwike ukufuma ku fyashingulukako fya pa mwabo. Ba uwashininkisha ukuti motoka obe nakomwa inshita shonse, kabili te kwesha ukusha icili conse icilemoneka ku kutunka uuli onse ukutoba. Abapuupu na basompola mu matumba basanga icibwesha cabo ukuli ukubungana kukalamba. Te kuti cibe ica mano ukusha icili conse ica mutengo pa mupando obe. Te kuti ube uwashininkisha ukuti onse uukushingulwike Mwina Kristu. Mulandu nshi uwa kucitila ukutunka ukuli konse? Amalipoti yalipokelelwa aya kwesha ukucitwa kuli bamo ku kusembeleka abana ukuya na bo. SUNGENI ABANA BENU MUPEPI LYONSE.
[Akabokoshi pe bula 6]
Ififulo fya Mabungano ya 1994
Aug. 12-14 Chililabombwe (CB-11b); Kitwe Kamitondo (CB-6, CB-13); Kitwe Chamboli (CB-7, CB-8); Luanshya (CB-2); Lusaka Eng. (EC-1); Mufulira (CB-10); Mufulira Eng. (EC-2); Mumbwa (C-1); Nsama (N-6, N-8a); Senga Hill (N-4, N-5); Luwingu (N-7, N-8b)
Aug. 16-18 Malambanyama (C-2a, b; C-3); Luswishi (CB-9); Manyinga (NW-1); Kabula (L-4, CB-12b); Kalungu (N-2a, N-3); Mununga (L-1)
Aug. 19-21 Mansa (L-5); Lundazi (E-8a); Chipata (E-6, E-7, E-8b); Ndola Chifubu (CB-4); Ndola Mushili (CB-5); Chingola (CB-11a, c; NW-4a)
Aug. 22-24 Kasempa (NW-2); Muyombe (N-2c); Kawambwa (L-2, L-3); Lualaba (C-5); Senanga (W-4); Mwandi (W-5); Mpongwe (CB-1)
Aug. 23-25 Katete (E-4, E-5); Samfya (L-6, L-7, L-8); Ukwimi (E-10)
Aug. 26-28 Solwezi (NW-3, NW-4b, NW-5); Chinsali (N-2b); Kabwe (C-4); Mongu (W-2a, W-3); Kalomo (S-1, S-2); Lusaka Matero (LK-1, LK-3); Lusaka Woodlands (LK-5); Kashitu (C-6, CB-3); Lusaka Chelston (LK-2, LK-4)
Aug. 29-31 Nyanje (E-2, E-3, E-9); Nyimba (E-1); Kawa (Turn-Off); (C-9, C-10, C-11)
Aug. 30-Sept. 1 Kaoma (W-1, W-2b)
Sept. 2-4 Mkushi (C-7, C-8); Mpika (N-1); Kafue (S-3, S-4)