Ibungano lya Citungu Ilya “Bakalumbanya ba Buseko” Ilya 1995
1 Milandu inga twakwata iya kubela aba buseko? Napamo ubwingi bwesu tatwaeshako fye no kuipenda. Te mulandu no kwikala mu calo ca cimfulumfulu kabili icishashininkishiwa, twalikwata imilandu iingi nga nshi iya kubela aba buseko. Nga fintu cabilishiwe mu Ubutumikishi Bwesu Ubwa Bufumu ubwa March 1995, umutwe wa kuti “Bakalumbanya ba Buseko” uwa mabungano ya citungu aya 1995 uli wa kukoselesha nga nshi.
2 Tulumbanya Yehova pantu alitusambilisha icine. (Esa. 54:13; Yoh. 8:32) Mu kukonkapo, mu buseko tulaakana icine na bonse fye abalesapika umutelelwe ne nsansa. (Esek. 9:4; Imil. 20:35) Bumunyina bwesu ubwa Bwina Kristu na bo bulatuletela ubuseko. Ulupwa lwa ku mupashi ulwa kutemwa lulaleta ukwikusha no kusansamusha. Iyi ili milandu fye iinono iyatulenga ukuba no buseko ubutukunta ku kulumbanya Yehova. Amalyashi ya pe bungano ne filangililo fikatulanga imilandu ya mu Malembo iyalundwako iya kubela aba buseko muli shino nshiku sha kulekelesha isha macushi.
3 Ibungano lya Nshiku Shitatu: Bushe walilanda no wa kwingishe ncito ukulomba cuti pa kuti ukasangwe kwi bungano inshiku shonse shitatu? Abafyashi bakwete abana baya ku sukulu abakasangwa kuli limo ilya mabungano ayakacitwa lintu amasukulu tayalafungwa mu mucinshi balingile ukweba bakafundisha ukuti abana babo tabakabeko ku sukulu pantu bakasangwa kuli ulu lubali lwacindama ulwa kupepa kwabo. Ni kwi kukabela ibungano ilipalamishe na kuntu wikala? Ubutumikishi Bwesu Ubwa Bufumu ubwa April bwatantike inshiku ne fifulo ku mabungano yonse 45 mu Zambia. Ukufika pali ino nshita kalemba wenu uwa mu cilonganino alimweba ifyebo fyafulilako ifikumine icilonganino cenu. Ukulunda pa lya ciNgeleshi, kukabako amabungano mu Chichewa, iciTonga, Icibemba, iciLubale ne ciLozi.
4 Programu akatendeka pa bushiku bwa kubalilapo ne nshita ya 9:20 hrs. no kusondwelela pa bushiku bwa kulekelesha mupepi na 16:45 hrs. Pa bushiku bwa cibili no bwa citatu, programu akatendeka pa 9:00 hrs.
5 Bushe Ukasangwako?: Tulecincishiwa ukusangwako inshiku shonse shitatu ishe bungano. Mulandu nshi cibelele fyo? Yehova alefwaya ukuti tukabe kulya. Ilelo icitetekelo cesu no butuntulu bwa ku mupashi filesanswa icabipisha. Paulo afundile ukukuma ku ‘kukanaleko kulongana’ pa nshita lintu Abena Kristu mu Yudea baletitikishiwa apakalamba. (Heb. 3:12, 13; 10:25) Abena Filipi baleikala “mu kati ka nkulo iyapondama kabili iyapuuluka.” Lelo, ‘balemoneka nge fyengelo pano nse.’ (Fil. 2:15) Mulandu nshi aba Bena Kristu ba mu mwanda wa myaka uwa kubalilapo babelele abapusanako? Pa mulandu wa kuti mu cumfwila bakonkele ukutungulula kwa mupashi wa mushilo ukwabakambishe ukulongana capamo ku “kucincimushanisha ku kutemwa kabili ku kubombe milimo isuma.”—Heb. 10:24.
6 Nga tatulelongana capamo icalo kuti catusonga, ukunenuna ukufwaisha kwesu ukwa kulongana na bamunyinefwe no kulumbanya Yehova. Luno lusuba tulelaalikwa ukunakila umupashi wa kwa Yehova no kuipakisha inshiku shonse shitatu ishe bungano. Bushe natupampamina ukusangwako no lupwa lwesu lonse? Tulekabila ukukosha ukutemwa kwesu ne citetekelo pa citendekelo ca lyonse. Yehova alatupayanishisha amabungano ya cila mwaka ku kutwaafwa muli kuno kuloshako.
7 Bwelela ku Mobe mu Kuba ne Cuma: Ni shani fintu winganonkelamo ifyafulisha ukufuma mwi bungano? Mwi shiwi fye limo icasuko cili ca kuti ni pa “kukutikisha.” Ici tacayanguka muli ino mikalile yaisulamo ukupamfiwa. Abacaice ba lupikwe kuti bafilwa ukukutikisha, lelo ciba e bwafya ubo ifwe bonse tulolenkana na bo lintu tulesangwa kwi bungano lya citungu. Kuti cacilapo kwanguka ukukutikisha nga ca kuti twapekanishisha libela. Ipushe we mwine auti, ‘Umutwe we bungano uleti shani?’ Etetula pali wene! ‘Mulandu nshi ndeilako, kabili cinshi nkalacita pali ishi nshiku shitatu? Bushe nkacishamo ukukokoloka mu fyungulo bushiku, nelyo bushe nalitantika ukuti kukaleshalako inshita yakumanina iya kutuusha ne ya kupituluka mu fishinka fikalamba ifye bungano?’
8 Icipande ca mu Ulupungu lwa kwa Kalinda ulwa July 15, 1984 icaleti, “Bushe Uletetula nelyo Ukulota fye Ubwiminine?” calangilile imitubululo yafulilako pa fya kunonkelamo mu kukumanina mu kulongana kabili lyene casondwelele ukuti: “Ukusalapula umuntontonkanya nakalimo e ca kusangwilako cacilishapo kucindama.” Lintu kalanda atendeka fye, ilingi line tulakutikisha, lelo cilya fye ilyashi lyafika lwa pa kati, tuleka umuntontonkanya wesu ukululumba. Ni shani fintu twingacilikila ici ku kucitika?
9 Cili bwino ukuti tubwekeshepo imitubululo twalandapo kale pa mulandu wa kuti ilabomba. Nga cingacitika, sendama bwangu cila bushiku. Ici lyonse tacayanguka pa mulandu wa kuti ukwenda kuti kwabimbwamo, kabili nga ca kuti uleikala mwi hotela, te kuti usendame bwangu nelyo ukusendama nga fintu wingasendama ku mobe. Ukupekanya bwino ilingi line kuti kwakwaafwa ukutuusha mu kukumanina.
10 Ukulemba ifyebo fyayanguka kwalishinina ukuba ica kwaafwa ukupeepeka. Nga ca kuti waesha ukulemba ifyebo fyafulisha, kuti wapuswa ifishinka fimo ifyacindamisha. Tuletubulula ukuti, ulelemba ifyebo mu kuba ne mifwaile ya kuyasupawila programu ku musambi wa Baibolo nelyo ku mulwele uushenda. Nangu cingati te kuti ukwate umuntu umo mu muntontonkanya, cili bwino ukulemba ifyebo, kabili pa numa ye bungano kuti washukilako utushita twa kulondolola ifishinka fikalamba ifya programu ilyo ulecitilo bunte bwa mu lyashi ku filundwa fya lupwa abashasumina. Pa kulemba ifyebo no kwakana cintu waumfwile, tawakalabe bwangu ifyo fyebo. Ukufilumbulula kulengilishako ukwibukisha.
11 Nangu ca kuti takwakalebako ifya kulya na kabili, kucili kukalaba ifipooswa fishaikulila pa kusonkela icifulo ce bungano, ifyo ilingi line fisanshamo ifipooswa fyalundwapo pa fisoselo, impapulo, na fimbipo. Ni kwi kufuma indalama sha kulipila ifi fipooswa fyonse? Shifuma ku bupe bwa kuitemenwa, napamo ukupitila mu ndalama nelyo ceke uwalipililwa mwi shina lya “Inte sha kwa Yehova.” Ici cumfwana ne Ilumbo 96:8 na 2 Imilandu 31:12.
12 Bakalumbanya ba Buseko Balacindika Yehova Ukupitila mu Myendele ya Bukapepa: Umwaka wapwile twalipokelele ukulandapo kwa kukoselesha pa lwa myendele yesu ukufuma ku babomba mu mamotela na babombela mu fifulo twabunganinemo. Umukalamba wa pa hotela limo alondolwele ukuti: “Lyonse tulayumfwa aba buseko ukupokelela Inte mwi hotela pa mulandu wa kuti baba abatekanya kabili ababombela pamo kabili balasopa abana babo.” Dairekita wa pa hotela umbi na o atile Inte bamoneka ukucilapo kuba aba nsansa kabili abateyanishiwa ukucila amabumba yambi. Nangu cingati ukubungana kwesu e kwakulishepo pa kubungana konse ukwabala akucitwapo muli ilya ncende, dairekita asosele ukuti: “Bantu fye abanono bailishenye kabili abakwete amafya ukucila ifyo tukwata ku mabumba yambi ayashifula nga fintu bafulile.”
13 Umubomfi wa pa hotela na umbi asokolwele ukuti ababungene nomba line ilyo ifwe tatulalongana balyonawile ifipe ifingi, ukulundapo fye no kwiba, nangu cingati ababomfi ba pa hotela bonse e po baali. Lelo ukukuma kwi bungano lyesu, atwalilile ukusoso kuti: “Tatukabila ukusakamikwa pa lwa ico ukukuma ku Nte. . . . Lintu bali pano, tushapo fye umuntu umo nelyo babili aba kulungishako fimo, e lyo uku kwine kulungisha ni kulya ukwa kumona fye ukuti fimashini filebomba bwino.”
14 Kanshi nga e fintu amalipoti yonse twapokelele yaali, lelo ku ca bulanda, te fintu cali. Ceyamani we bungano limo alandilepo kuti: “Pa numa ya kulongana, abapungwe abengi balabungana umufikila abeni umwa [pa hotela] ukufika fye ubushiku, baleseka mu kupongomoka no kulumbilisha. Ici cilapumfyanya abatandashi bambi . . . , abamoneka ukukalipa. Abacaice bamo balabutauka mu lukungu, ukupunkaula ifiibi ilyo baletandashanya no kulanshanya mu kupongomoka mu miputule.”
15 Impika na imbi iyatwalilila pa myake iingi yaba bwingi bwa bamunyina abashinguluka mu lukungu na pa nse ya cifulo ilyo ukulongana kulecitwa. Pe bungano limo umwaka wapwile, akapepala ukufuma ku musambi wa Baibolo umo kasangilwe mu kabokoshi ka misangulo. Kalembelwepo aya mashiwi: “Nshabala mpeshiwa amano nga fintu ndi pa lwa congo, incitilo, imilandile, no kubutauka mu lukungu lintu amalyashi yalepeelwa . . . Nshilati mbe Nte, e lyo fye ndeishiba no kusambilila akatiina ka bukapepa no mucinshi.” Mu kushininkisha, takuli uuli onse pali ifwe uwingafwaya ukulangisha icikope ca kuti tatutasha pa kupayanya kwa kwa Yehova.
16 Pa nshita shonse tulingile ukuipusha atuti: ‘Nani ndeimininako, kabili mulandu nshi ndesangilwa kuli lino ibungano?’ Bumupashi bwesu no kuipeelesha kwa bukapepa filabelebeshiwa mu milandile yesu, imyendele, no kutasha pa kupayanya kwa ku mupashi. (Yako. 3:13; 1 Pet. 2:2, 3, 12) Bamunyina abashipikisha imyaka iingi iya fibindo ilingi line bamoneka ukucilapo ukukutikisha no kukwatisha umucinshi pa mabungano, ukutwalilila ukwikala, ukukonka amalyashi yonse ne filangililo.
17 Imifwalile Yobe ne Misakwile Filakwishibisha Cintu Waba: Pali 1 Samwele 16:7, tulacinkulwako ukuti “umuntunse amona pa menso, lelo Yehova amona mu mutima.” Muli ifyo, abantu ilingi line batupingwila ku fyo tulemoneka. Imifwalile yesu ne misakwile filaceeceetwa sana, ukucilisha lintu tulesangwa kwi bungano ku kupepa no kufundwa mu mikalile ya Bwina Kristu. Nga ca kuti uli wacaice uuya ku sukulu nelyo nga ca kuti incito yobe iya ku calo ikulenga ukukumana na bantu abakonka inshila sha ku calo, kuti caba icayafya nga nshi ukukakatila ku fipimo fya Bwina Kristu ifya mifwalile yayana.
18 Ifipimo fya mifwalile ne misakwile filapusanapusana ukupulinkana icalo conse. Abena Kristu benekelwa ukufwala ifiyene. Nani alingile ukupime ci? Abafyashi balingile ukushininkisha ukuti abana babo abapungwe tabafwele kwati misepela ya ku calo iyo basambilila na yo. Ubutungulushi bushaiwamina bwalipayanishiwa ku kutwaafwa ukupingulapo bwino pali uyu mulandu wakakala. Twamukoselesha ukupituluka mu cipande ca muli Awake! wa February 8, 1987, icaleti “What Do Clothes Mean to You?” (Cinshi Cintu Ifya Kufwala Fipilibula Kuli Iwe?) Cinshi twamwene pa mabungano yesu yamo aya mwaka wapwa?
19 Pa numa ya limo ilya Mabungano ya Citungu aya “Akatiina ka Bukapepa,” twapokelele aya mashiwi: “Bamunyina na bankashi nabawamyako apakalamba mu mifwalile yabo, imisakwile, ne myendele pe bungano uno mwaka. . . . Nangu cibe fyo, kucili kuliko imibele imo ne fibelesho ifilekabila ukuwamyako kwalundwapo.” Pa numa ye bungano limbi cacitilwe lipoti ukuti imifwalile ishalinga yalimoneke nga nshi. Lipoti yalumbulwile ukuti inshila bamo bafwalilemo yalepunwisha bambi. Aba ku nse bamo abasangilweko na bo bene balimwene iyi mifwalile ishayana. Bamo balefwala ifyapepuka sana kabili ifyapapatila ku mubili.
20 Icinabwingi ca bamunyina na bankashi balafwala ifya kufwala fyayana, ifyabamo mucinshi lintu bali pa cifulo ce bungano. Pa numa, nangu cibe fyo, bamunyina na bankashi bamo, ninshi bacili nabafwala na mabaji yabo, bafwele utuputula utwipi nga nshi, ne . . . fya kufwala fya mafashoni ya pali nomba ayashalolamo ku bantu ba kwa Lesa. Nga ca kuti baeluda bamona ukuti bamo bakongamine ku kufwala mu kukanayana, kuti calinga ukupeela ukufunda kwa cikuuku lelo ukwashangila pa ntanshi ye bungano ukuti imifwalile ya musango yo tayalinga, ukucilisha pamo nga makombe yalesangwa kwi bungano lya Bwina Kristu. Twapaapaata pitulukeni na basambi benu aba Baibolo abakasangwa kwi bungano ifi fya kutungulula pa myendele ne mifwalile ifyalondololwa pa muulu.
21 Bakamera ne fya Kukopelako pa Tepu: Cili bwino ukucinkulako mu cikuuku pa lwa bakamera ne fya kukopelako pali tepu. Twapaapaata ibukisheni, nga ca kuti mulepanga ukubomfya bakamera, nelyo umusango uuli onse uwa fya kukopelako pali tepu, twapaapaata langulukileniko abo mupalamene na bo. Ukulaendauka mu kati ka kulongana nelyo fye ukukopa lintu wikeleko kuti pambi kwapumfyanya bambi. Takuli ifya kukopelako pali tepu ifili fyonse ifilingile ukusuntinkanishiwa ku malaiti nelyo ku fisoselo fye bungano, kabili ifibombelo tafilingile ukucilika inshila. Nampo nga wapingulapo ukukopa ifikope nelyo ukukopa pali tepu imbali shimo isha programu pa kubomfya icilimba ca makaseti ciba mulandu wa pa lobe. Ifikope ne fyakopwa pali tepu kuti fyakulenga ukwibukisha ifintu ifisuma lintu wapitulukamo pa nshita ya pa numa. Ifibombelo fya musango yo fyonse filingile ukubomfiwa mu kushilimuka, mu nshila iishilepumfyanya bambi nelyo ukucilikila iwe ku kunonkelamo mu kukumanina muli programu. Pa numa ya kubwelela ku ŋanda, bushe ukakwata inshita ya kupituluka mu fyo ukopele pali tepu? Kuti pambi wasanga ukuti ukulemba ifyebo kuti kwabo ukwakumanina.
22 Imikalile: Pe Bungano lya Citungu ilya “Akatiina ka Bukapepa” ilya 1994, bushe walimwene ukuti twaliwemyeko ukukuma ku kusungila ifipuna? Twalibombako bwino, lelo tucili tulekabila ukwibukisha uku kucinkulako: IFIPUNA KUTI PAMBI FYASUNGILWA FYE IFILUNDWA FYA LUPWA LWENU IFYAPALAMISHA NA BALI BONSE ABO MULEENDA NA BO MULI MOTOKA WA PA LWENU. Tuba palya nga beni ba Sosaite. Icifulo cisonkelwa ukupitila mu bupe bwa kuitemenwa. Bushe kuti cabamo kutemwa no kulangulukilako ukusungila icipuna ico tushishininkishe nga calabomfiwa? Ku ca bulanda te kuti cicitikeko ukupayanya incende shaibela nelyo imiputule ifya kubomfya abalwalilila pa mulandu wa fyashingulukako, ukupala abambukilwa bubi bubi.
23 Ibungano limo na limo lilapayanishisha abo ababa no kukabila kwaibela, pamo nga bakoloci na balemana lwa ku mubili. Twapaapaata shininkisheni ukuti tamwikele muli ifi fiputulwa nga ca kuti te imwe mufwile ukwikalamo. Na kabili, beni abaibukila ukwafwilisha ababa no kukabila kwaibela ukusanga apa kwikala nga ca kuti tabali no muntu umbi uubasakamana.
24 Ukusakamana Ukukabila kwa fya Kulya Ukwe Bungano Lyenu: Nga fintu mwishibe, takwakabeko ifya kulya fikalashitishiwa. Umo na umo alingile ukusenda ifya kulya fyakwe umwine ne fya kunwa. Ica mu kati mu Ubutumikishi Bwesu Ubwa Bufumu ubwa March 1995 calondolwele umulandu kubeleleko uku kuteuluka kabili calitubulwile bwino ukukuma ku fyo bonse bengasakamana ifya kulya fyabo abene ne fya kunwa balekabila pe bungano. Kuti caba bwino kuli bonse ukukanapituluka fye muli cilya ca mu kati pa lwabo beka lelo na kabili ukulanshanya cene na basambi babo aba Baibolo ilyo balepekanishisha ukusangwa kwi bungano. Cili icacindama ukuti abasambi ba Baibolo bebwe ukuti abakasangwa kwi bungano bonse balingile ukusenda ifya kulya fyabo abene ne fya kunwa.
25 Ku kwesha fye ukukomailapo, kuti mwafwaya ukwibukisha ifi fya kulya fyatubulwilwe ukusenda ifya kubomfya pa nshita ya kutuusha kwa kasuba: ifya kulya fyayanguka, ifyabamo mulyo ifingaliwa pa nshita ya kasuba ifyapala kuli filya abantu ilingi line basenda ku ncito, pamo nga isangwechi, imbalala, ifyafumbikwa, ne citwalo. Ifya menshi menshi kuti pambi fyasanshamo kofi, ifya kunwa fyatalala, amenshi yafumishiwa mu fitwalo, nelyo amenshi yalongelwa libela mu fya kusendelamo fishingatobeka. Nga ca kuti mulekabila ifya kutalalikilako ifinono, kuti mwaya na fyo kulila fye mwafibika mwi samba lya cipuna. Nangu cibe fyo, ifya kutalalikilamo fikalamba ifyo ulupwa lusenda pa lwendo lwa kukokoloka, ifya kunwa fikola, nelyo ifya kusendelamo fye botolo tafilingile ukusendwa ku cifulo ce bungano. Mulingile ukusengauka ukulya nelyo ukunwa mu kati ka programu wa kulongana. Ici kuti caba kukanacindika ica kulya ca ku mupashi icilepeelwa.
26 Cili bwino ukwibukisha ukuti inshita ya kutuusha kwa kasuba ipimwa pa kuti twingalya ifya kupembesula fyayanguka no kuipakisha ukubishanya kwa teokrasi pamo na bamunyinefwe ne nkashi. Pamo nga abantu ba kwa Yehova, twaishiba ukuti ica kulya ca ku mupashi pa mabungano e cacindamisha ukucila ifintu fya ku mubili, kabili tulingile ukupekanya mu kuba ne co mu muntontonkanya.
27 Pa August 11, 1995, ibungano lya citungu ilya kubalilapo ilya “Bakalumbanya ba Buseko” likatendeka. Bushe walipwishishisha amapekanyo, kabili bushe nomba nuipekanya ukuipakisha inshiku shitatu isha kubishanya kwa nsansa ne fintu fishaiwamina ifya ku mupashi? Tulepepa mu kufumaluka ukuti Yehova engapaala ukubombesha kobe ku kusangwa kwi bungano lya uno mwaka pamo na bamunonko ne nkashi ilyo tukalabelebesha pa fya kuba bakalumbanya ba buseko aba kwa Yehova.
[Akabokoshi pe bula 5]
Ifya Kucinkulako fye Bungano lya Citungu
Ulubatisho: Abaleya ku lubatisho balingile ukwikala mu fipuna fyabo mu ciputulwa capekanishiwa ilyo programu talatendeka ulucelo lwa pa bushiku bwalenga shibili. Calimonwa ukuti bamo balafwala imisango ya fya kufwala fishabamo umucinshi kabili ifipusanako na aka kashita. Umo na umo uulepekanya ukubatishiwa alingile ukusenda ica kusaamwina cayana ne taulo. Pa numa ya lyashi lya lubatisho ne pepo kuli kalanda, ceyamani wa ico ciputulwa akapeela amakambisho ayepi ku baleya ku lubatisho kabili lyene akabilisha ulwimbo. Pa numa ya cikomo ca kulekelesha, bakapyunga bakatungulula abaleya ku lubatisho ku cifulo ca kwibishiwako. Apantu ulubatisho pamo nge cishibilo ca kuipeela kwa muntu lwaba cintu cabamo isenge kabili icikuma fye umuntu umo umo na Yehova, takwakabeko ukupayanya kwa lubatisho umo abantu babili nelyo abafulilako bakumbatana nelyo ukwikatana iminwe ilintu balebatishiwa.
Amabaji: Twapaapaata fwaleni baji wa 1995 pe bungano na lintu muleya no kufuma ku cifulo ce bungano. Ilingi line ici cicilenga ukucitikako kuli ifwe ukupeelo bunte bushaiwamina ilintu tuleenda. Amabaji no tumanikilo filingile ukushitwa ukupitila mu cilonganino, apantu tafyakabeko kwi bungano. Ibukisheni ukusenda kardi wenu uwa Advance Medical Directive/Release uwa uno mwaka. Ifilundwa fya lupwa lwa Bethel na bapainiya balingile ukukwata amakardi yabo aya kwishibikilwako.
Umulimo wa Kuitemenwa: Bushe kuti wapaatulako inshita imo pe bungano ku kwaafwako muli imo iya madipartimenti? Ukubombela bamunyinefwe, nangu fye pa maawala yanono, kuti kwaba kwaafwa nga nshi kabili kuti kwatwikusha apakalamba. Nga kuti waafwa, twapaapaata kabiye ku Dipartimenti wa Mulimo wa Kuitemenwa uwa pe bungano. Abana bashilafisha imyaka ya bukulu 16 na bo bene kuti basangwilako pa kubomba pe samba lya butungulushi bwa bafyashi nelyo umukalamba umbi uwasakamanishisha.
Amashiwi ya Kusoka: Pa kuba abaibukila ulwa mpika shingabako, kuti twasengauka amafya yashakabilwa. Ilingi line abapuupu na bantu bambi ababulwa ubufumacumi kuti bashukila abantu abashili mu cifulo ca ku mwabo. Shininkisheni ukuti motoka wenu nakomwa pa nshita yonse, kabili te kwesha ukusha icili conse icilemoneka ku kutunka umuntu ukwiba cene. Abapuupu na basompola mu matumba balatemwa ukubombela ukuli ukubungana kukalamba. Te kuti cibemo amano ukusha ifipe fya mutengo ifili fyonse pa cipuna cenu. Te kuti mushininkishe nga ca kuti onse uuli mupepi na imwe Mwina Kristu. Mulandu nshi uwa kushiila ifilecebusha? Twalipokelela amalipoti pa lwa kwesha kwacitwa ku ba ku nse bamo ukwa kubeleleka abana banono ukufuma pa ncende ye bungano. SOPENI ABANA BENU PA NSHITA SHONSE.