Amabungano ya Citungu na ya pa Kati ka Fyalo aya “Imikalile ya Bukapepa” aya 1998
1 Amapinda 10:29 yatucinkulako ukuti “Yehova e ca kushinamo.” Fintu umutwe we bungano uwa uno mwaka uwa kuti “Imikalile ya Bukapepa” uli uwalinga! Ni shani fintu uyu mutwe ukalundululwa muli programu wa nshiku shitatu? Bonse tulelolela mu kuswatuka ukumfwa ifintu tupekanishiwilwe. Kabili ifishinka fyacindama fikalondololwa.
2 Tacakabe Konaule Nshita Ukusangwako: Bamunyinefwe abengi balacula mu fyalo ifingi ifya mu Afrika pa mulandu wa nkondo ne fimfulunganya. Bamona amabungano ya bantu ba kwa Yehova ngo bumi bwabo. Bamo benda intamfu ishitali nga nshi pa kuti basangweko kwi bungano, nalyo line tabafwaya ukupuswako kwi bungano nangu limo. Munyina wa myaka ya bukulu 73 uwa ku calo ca Democratic Republic of Congo (icali kale Zaire) aendele amakilomita mupepi na 450 ku kuyasangwa kwi bungano. Afikile pa numa ya nshiku 16, na makasa ninshi nayafiimba, lelo ali uwa nsansa pa kuti alisangilweko. Pa numa ye bungano, aali no buseko nga nshi kabili alikoshiwe lwa ku mupashi, na kabili abwelelemo pa makasa. Lyonse e fyo enda pa myaka iingi!
3 Ku Mozambique kangalila wa citungu no mukashi wakwe baninike ulupili ulutali no kwenda pa masaka ukupita mu ncende yapala iciswebebe pa kuyasangwa ku kulongana kwa muputule. Baendele ubu bulendo bwa makilomita 90 mu mawaala 45. Bonse abasangilweko balikoseleshiwe nga nshi ku ca kumwenako cisuma ica aba abaupana. Indupwa shasangilweko shalibombeshe mu kupalako pa kuti shisangweko. Kangalila wa citungu ashimike ukuti bamunyina bamo, kumo na munyina wa myaka ya bukulu 60, baendele amakilomita 200 pa makasa.
4 Bushe mwalipanga amapange ayasuma pa kuti mukasangweko kwi bungano lya uno mwaka? Napamo imwe tamwakende intamfu iitali, lelo pa kuti mukayesangwako no lupwa lwenu ukubombesha no kuipusula kukakabilwa. Tantikeni ukusangwa kuli programu onse ukufuma pa kutendeka ukufika na ku mpela. Abasambi ba Baibolo abengi balelunduluka ukulola ku kuipeela. Ukusangwako kwi bungano kukabaafwa ukupingulapo bwino. Bushe mwalilaalikako Abasambi benu aba Baibolo na basekelela pa kuti bakasangweko capamo na imwe?
5 Programu wa Nshiku Shitatu: Uno mwaka programu ikabako pa mabungano 52 mu Zambia. Amabungano yakabako mu Chichewa, Icibemba, iciLozi, iciLubale, iciNgeleshi, ne ciTonga. Inshiku sha kulonganinapo ne fifulo fyalitantikwa mu Ubutumikishi Bwesu Ubwa Bufumu ubwa April 1998. Muli programu we bungano mukaba amalipoti ya fintu Yehova alepaala umulimo mu fifulo fya kubombelamo ifyapusanapusana.
6 Ukwishibisha Kwaibela: Cili cacindama sana ukuya kwi bungano kuntu icilonganino cenu cikasangwa. Twapaapaata mwipanga ukuyasangwa kwi bungano lya pa kati ka fyalo kano fye nga Sosaite yalimusala. Ififulo umukabela ukulongana kwa pa kati ka fyalo tafyakakwate apa kwikala bonse abalefwaya fye ukusangwako. Ukucindika kwenu uku kutantika no kubombela pamo kukalenga fyonse ficitwe busaka busaka kabili mu kukonkana.—1 Kor. 14:33, 40.
7 Pa nshiku shonse shitatu, programu akalatendeka pa 8:45 hrs. Pa bushiku bwa kubalilapo no bwa cibili, programu akalapwa pa 17:00 hrs, e lyo pa bushiku bwa citatu, akapwa pa 16:00 hrs.
8 Lintu tuleya kwi bungano lya citungu na pa kubwela, tufwile ukuba abaibukila ku mashuko ya bunte bwa mu lyashi. Pekanishisheni kabela ukupitila mu kusenda amatrakiti, bamagazini, amabroshuwa, nelyo impapulo shimbi pa kuti mwingashukila amashuko ya kushimikila ku bantu abo napamo te kuti bashimikilwe imbila nsuma.—2 Tim. 3:17.
9 “Cenjeleni ku fyo Muumfwa”: Cilimo amano ukuti abalesangwa kwi bungano bomfwile ukufunda kwa pali Luka 8:18. Bonse balekoseleshiwa ukwisa na Baibolo, icitabo ca nyimbo ne citabo ca kulembamo ifyebo. Kutikeni mu kusakamanishisha ku fishinka fyacindama ifye lyashi limo na limo, kabili lembeni ifyebo ifipi. Ipusheni mwe bene fintu mwingabomfya ifyo fyebo. Pa numa ya kulongana kwa bushiku bumo na bumo, ilyo mu shilaya ku kusendama, pitulukenimo mu fyebo mwacilemba no kumona fintu mulekakatila ku mikalile Yehova afwaya.—Amapi. 4:10-13.
10 Calimonwa ukuti mu nshita ye bungano, bamo balitemwa ukwikala muli bamotoka nelyo ku misakuta nelyo uko baleikala, muli fyo ukupuswako kuli programu. Bamo balimonwa baleendauka fye ilyo bafwile ukwikala mu cifulo ce bungano no kukutika kuli programu. Amabumba ya bacaice balimonwa balefuma pa cifulo ce bungano mu nshita ya cungulo kasuba. Bamo ababomfi ba kwa Yehova mu nshita sha kale balipangile ifilubo fyabipisha pa mulandu wa kuti tabakutike ku fya kucinkulako ifya kwa Yehova. Mu cine cine, tufwaya ukusengauka ukupanga ifilubo fyapalako. (2 Isha. 17:13-15) “Umusha wa cishinka kabili uwashilimuka” napekanya ukufunda uko ifwe bonse tulekabila. Cili icacindama maka maka ukuti ‘twangweko kucila ifyo twaumfwa’ mu ciputulwa cimo na cimo ica programu we bungano uwa nshiku shitatu. Kukaba ifintu fyaibela pa bushiku bumo na bumo, ukusanshako ne fyebo ifyo mu cine cine fikawamyako imikalile yesu ku ntanshi. Ukupitila mu kwangwako ku fintu fya ku mupashi Yehova apayenye pa mabungano yaleisa, no kufibomfya mu kukumanina, isubilo lyesu likakoshiwa mu kushangila, pa kuti ‘twisensenunwako’ ukufuma ku mikalile ya bukapepa.—Mat. 24:45; Heb. 2:1.
11 Imifwalile Icindika Yehova: Muli shino nshiku sha kulekelesha, tufwile ukwangwako pa kuti tatwambukilwe no mupashi wa calo. (1 Kor. 2:12) Imifwalile yesu ne misakwile ifwile ukuba iya bufuuke kabili ilingile ukulangilila umucinshi kuli Lesa tupepa. (1 Tim. 2:9, 10) Te fya kufwala fyaumo mutengo ififwaikwa pa kuba pa “bapulamike isambilisho lya kwa Lesa Umupusushi wesu muli fyonse.” (Tito 2:10) Moneni ukufunda kubomba kabili ukwa mu Malembo mu Ulupungu lwa kwa Kalinda ulwa June 15, 1997 pa mabula 17 na 18, amaparagrafu 14-18. Te kwesha ukusuula fintu ukufwala mu nshila icindika Yehova kwingashimikila apakalamba kuli bambi.
12 Imyendele Iilumbanya Yehova: Twalishiba ukuti imibele yesu iya Bwina Kristu kuti yayambukila fintu bambi bamona ukupepa kwa cine. E co, pa nshita ili yonse tulefwaya ukuba ne mibele iyawaminwa imbila nsuma na kabili iingaleta ilumbo kuli Yehova.—Fil. 1:27.
13 Umwaka wapwile, kwali ibungano lya citungu pa muku wa kubalilapo ku kapinda ka kuso aka Angola. Pa bushiku bwa cibili bakapokola babili balituminwe ukwabelele ibungano mu kumona ukuti umuyano walesungwa. Bali kulya akasuba konse. Ilyo ukulongana kwapwile, balitemenwe ica kuti balandile fyo baumfwile ne mibele isuma intu bamwene. Umo kapokola asosele ukuti: “Mulandu nshi batutumine kuno? Twalishiba ukuti Inte sha kwa Yehova shilasunga umuyano pa mabungano ya shiko.”
14 Uwa mu kabungwe ka bupolitiki mu calo cimo ica mu Afrika abutukile ku Bulaya lintu bonse abali mu kabungwe kakwe baipaiwe. Alipitile mu mafya ayengi kabili ali uwafuupulwa nga nshi. Asukile asumine ukusambilila Baibolo. Ilintu asangilwe kwi bungano pa muku wa kubalilapo, alitemenwe pa kumona abantu ba fikulilo fyapusanapusana balelongana mu mutende kabili mu kwikatana. Alishininwe ukuti alisangile icine, kabili pali lilya ibungano apingwilepo ukuleka ifya mapolitiki. Mu kupita kwa nshita alibatishiwa, kabili pali nomba alebombela Yehova capamo na bana bakwe.
15 Ni shani fintu imibele yesu pe bungano lya uno mwaka ikambukila abo napamo bakasangwako pa muku wa kubalilapo? Bushe bakamona imibele ya kubombela capamo lintu tulebomba pamo nga bakuitemenwa? Bushe bakatemwa ukumona ubusaka bwa cifulo ce bungano no kumone fyo pa kufuma, ifwe na bana besu twatoola ifisooso ifyo napamo fyacipoosaikwa mupepi na po twikele? Bushe bakamona imyendele yesu iisuma lintu tukalaya kwi bungano na lintu tukalabwelelamo uko tukalasendama? Bushe bakamona ukuti nga bafyashi tulasunga abana besu mu kusakamanishisha pa nshita yonse? Shi tukashininkishe ukuti bambi bakatemwe ukumona imibele yesu isuma nga nshi.
16 Ukulipila Indalama Shilebomfiwa pe Bungano: Itiketi lya kwingilila mu cibansa umuli ifyangalo nelyo mu ciyanda ca kubunganinamo kuti lyaba ilya mutengo muli cino calo catemwa ifya ku mubili. Umulandu umo wa kuti umutengo wa kubomfyako icibansa nelyo icikuulwa mu misumba ya fyalo ikalamba waliluma. Ico Sosaite yaimika pa mabungano yonse ca kuti, “takuli kulipila pa kwingila, takuli kulombelesha indalama.” Lyene, ni shani fintu indalama sha kwashimina icifulo ce bungano ne sha kubomfya ku fintu fimbi shikalipilwa? Kupitila mu misangulo ya kuitemenwa iya bakasangwako. Tuli abashininkisha ukuti mukalangisha umupashi wa bukapekape uwakweteko ababomfi ba kwa Lesa ku kale mu kupashanya Yehova Lesa na Yesu Kristu. (2 Kor. 8:7) Imisangulo yonse ilasakamanwa no kubikwa bwino, ukulembwa, no kubomfiwa ku mifwaile ya iko. Imisangulo iya cheke ilingile ukupeelwa kuli “Watch Tower.”
17 Ifipuna: Amakambisho yalondololwa pa myaka iingi yakatwalilila ukubomba, ayatila, IFIPUNA KUTI FYASUNGILWA FYE ABA MU LUPWA LWENU ABAPALAMISHA NA BALI BONSE ABO MULEENDA NA BO MULI MOTOKA WENU. Caliwamisha ukumona ukuti natuwamyako muli pali ulu lubali, kabili ici calingilishako imibele ya kutemwa ilangwa pa mabungano. Pa fifulo ifingi, calyanguka ukwikala pa fipuna fimo ukucila fimbi. Twapaapaata langulukileniko, kabili shileni abakoloci ifipuna ifili bwino na bambi abo imibele yabo ilekabila ukuti bekalepo. Ibukisheni ukuti ‘ukutemwa takuifwaila ifya kuko.’—1 Kor. 13:4, 5; Fil. 2:4.
18 Bakamera, Camcorders (Bakamera ba vidio) ne Filimba fya Makaseti: Amakamera ne fya kukopelako amalyashi kuti fyabomfiwa pa mabungano. Nangu cibe fyo, tatulekabila ukupumfyanya bambi lintu tulefibomfya. Ukulaendauka ilyo umo alekopa ifikope mu nshita ye bungano kuti kwapumfyanya bambi abaleesha ukukutika kuli programu. Takuli ica kukopelako icili conse icilingile ukukulikwa ku fibombelo fya malaiti ifilebomfiwa nelyo ku fisoselo, kabili ifi fibombelo fya bantu pa lwabo tafilingile ukucilika utushila twa kupitamo, nelyo ukucinga bambi.
19 First Aid: Dipartimenti wa First Aid wa kundapa kwa fya mu kampampa fye epela. Twapaapaata muiletele amapilushi, umuti wa kwaafwa ukusungulula ifya kulya, babandeci, banapini bakumanikilako na fimbi ifyapalako, pantu ifyo fintu tafyakabepo pe bungano. Abali bonse ababa na cipumputu, abalwala shuga, aba malwele ya ku mutima, na fimbipo, balingile ukuisendela abene umuti ulekabilwa. Balingile ukwisa na lupwa nelyo uwa mu cilonganino uwaishibisha ubulwele bwabo kabili uwingabomba bwino nga balwala mu kupumikisha. Kwalibako amafya pa mabungano lintu abalwalilila bashilwe beka fye e lyo ubulwele bwabekata. Nga ca kuti bamo abalwalilila mu nshila yaibela tabakwete ba lupwa abengabafwilisha, baeluda ba mu cilonganino cabo balingile ukwebwa pa lwa iyo mibele no kutantika ifilekabilwa ku kwaafwa. Takwakabeko imiputule yaibela iikapayanishiwa pe bungano ku kwikalamo abambukilwa bwangu ku malwele.
20 Ifya Kulya pe Bungano: Bonse abakasangwako balingile ukwisa ne fya kulya mu cifulo ca kulafuma pa cifulo ce bungano no kuya mu kushita ku nse pa nshita ya kutusha. Ifya kulya fyayanguka ifyabamo umulyo kabili ifyayanguka ukusenda kuti fyaba ifyalinga fye. Ica mu kati ca Ubutumikishi Bwesu Ubwa Bufumu bwa July 1995, paragrafu 25, calitubulula ifya kulya ifingasendwa. Ubwalwa tabulingile ukuletwa mu cifulo ce bungano. Ifyakutalalikilamo nelyo ifyola filingile ukuba ifinono ifyalinga fye ukubikwa mwi samba lya cipuna cenu. Bamo mwi bumba balimonwa balelya no kunwa mu nshita ya programu. Ici tacilango mucinshi pe bungano.
21 Mu mabungano ya mu mishi, bamo basalapo ukuipikila abene pa nshita ya kutusha, icilenga abengi ukucelwa ku ciputulwa ca cungulo ice bungano. Bushe kuti mwakumanisha ukulaipika fye mu nshita ya cungulo bushiku? Ifya kulya fyaipikilwa libela pamo nga ifipushi, ifyumbu, na fimbipo, kuti fyamulenga ukwangukilwa ku kukutika ku maprogramu ya cungulo. Muli fyo, mukakwata inshita yakulilako iya kuipakisha ukubishanya na bamunyinenwe na bankashi.
22 Fintu tuli aba nsansa ukuti Amabungano ya 1998 ayaleti “Imikalile ya Bukapepa” yalatendeka nomba line! Bushe mwalipwisha amapange yenu yonse aya kuti mukasangweko? Shi mukende umutende no kubwelela ku sha myenu abapembesulwa, abapampamina pa kutwalilila mu mulimo wacindamisha uwa kwa Yehova no kutwalilila ukukonkelela imikalile ya bukapepa, icikafumamo ipaalo lya muyayaya.
[Akabokoshi pe bula 5]
Ifya Kucinkulako fye Bungano lya Citungu
▪ Ulubatisho: Abaleya ku lubatisho balingile ukwikala mu ciputulwa capekanishiwa ilyo programu talatendeka ulucelo ubushiku bwa cibili. Umo umo uulepekanya ukubatishiwa alingile ukuiletela icakufwala ca kusaamwina icalinga ne taulo. Akale bamo balefwala ifya kufwala ifishayana kabili ifyalepusana no lubatisho. Baeluda abalepitulushamo abaleya ku lubatisho mu citabo ca Ubutumikishi Bwesu balingile ukushininkisha ukuti umo umo aumfwikisha ifi fishinka. Ulubatisho ulwimininako ukuipeela lwaba mulandu wa bucibusa kabili uwa muntu umo umo pa lwakwe na Yehova. Muli fyo, tacalinga ku baleya ku lubatisho ukukumbatana nelyo ukwikatana mu minwe ilintu balebatishiwa.
▪ Amabaji: Twapaapaata fwaleni baji wa 1998 inshita yonse lintu muli mu musumba we bungano na lintu muleya kwi bungano no kubwela. Ilingi line ici cilatupeela inshita sha kushimikila nga nshi. Mulingile ukushita amabaji no tumanikilo mu cilonganino cenu, apantu tatwakabepo pe bungano. Mwipembelela kushita amabaji yenu na ya lupwa lwenu ukufikila kwashala inshita inono ilyo ibungano lishilatendeka. Ibukisheni ukusenda kardi wenu uwa ndakai uwa Advance Medical Directive/Release.
▪ Ukulembesha Bamagazini: Tuleeba bakasabankanya ba mu mishi ukuti kukabako itebulo likalabomba no kulembesha Loleni! no Ulupungu lwa kwa Kalinda capamo no kulembesha cipya cipya.
▪ Umulimo wa Kuitemenwa: Bushe kuti mwapaatulako inshita pe bungano ku kwafwilisha muli imo iya madipartimenti? Ukubombela bamunyinefwe nangu fye pa maawala ayanono, kukaba ukwakwafwa nga nshi kabili ukwakwikusha apakalamba. Nga kuti mwayafwilisha, twapaapaata kabiyeni kuli Dipartimenti wa Mulimo wa Kuitemenwa pe bungano. Abana bashilafika imyaka 16 na bo bene kuti babombako, ukutungululwa no mufyashi nelyo umukalamba umbi uwasakamanishisha.
▪ Amashiwi ya Kusoka: Shininkisheni ukuti motoka nakomwa inshita yonse, kabili mwisha icili conse insansalila ku kutunka umo ukutoba. Aya mashiwi ya kusoka yalebomba na ku ba macinga na bo bene. Abapupu na beba mu mapoketi ya bantu batemwa ukuli ibumba ilikulu. Te kuti ciwame ukusha ifipe ifili fyonse pa cipuna cenu. Pantu te kuti mwishibe nga ca kuti onse untu mupalamene nankwe Mwina Kristu. Mulandu nshi uwa kutunkila bambi mu nshila ili yonse? Twalipokelela amalipoti pa lwa bantu ba ku nse bamo abesha ukubeleleka abana banono ku kufwaya ukubasenda. SOPENI ABANA BENU INSHITA YONSE.