Amabungano ya Citungu aya 1999 Ayaleti “Icebo ca Kusesema Ica kwa Lesa”
1 Lintu abena Israele bali mupepi no kwingila mu Calo Calaiwe, Mose abakoseleshe ukutesekesha amakambisho ya kwa Lesa. Abebele ukuti: “Te cintu ca fye kuli imwe; mweo wenu.” (Amala. 32:45-47) Bushe tatutasha kuli Yehova ukuti amona ubumi bwesu ngo bwa mutengo ica kuti atwalilila ukututungulula ukupitila mu Cebo cakwe icauma umutengo? E co tulefulukisha Ibungano lya Citungu ilya nshiku shitatu ilya “Icebo ca Kusesema Ica kwa Lesa” no kumfwa ifyo Yehova atukwatile.
2 Uno mwaka, amabungano ya citungu muno Zambia onse yapekanishiwe ukubela mu fifulo 55 ifiliko mupepi. Programu we bungano akaba mu Chichewa, IciTonga, Icibemba, iciNgeleshi, iciLubale, iciLozi, iciSwahili na mu ciTumbuka.
3 Ukwabulo kutwishika mwaliipekanya kale ifya kuyasangwako pa nshiku shonse ishe bungano pantu mwalishiba ukuti Yehova enekela imwe ukuba kulya. Ishibeni ukuti alamona ukubombesha konse uko ababomfi bakwe babombesha no kuipusula pa kuti bakasangweko, kabili alebukisha fyonse ifyo no kutasha. (Heb. 6:10) Ukupitila mu kusangwa kwi bungano inshiku shonse ukutula pa lwimbo lwa kwiswila ukufika kwi pepo lya kusondwelela, tulangisha Yehova ukuti twalikatamika ifyebo fyakwe ifyo atweba. (Amala. 4:10) Na kabili tulango kuti tulatasha bamunyinefwe pa kubombesha babombeshe mu kupekanya ifya pe bungano.
4 Ukutantikila kabela no kuteyanya ifintu bwino filakabilwa pa kuti iminshipendwa ya bantu ba kwa Lesa bateyanishiwilwe ukubungana pa cifulo ce bungano cimo na cimo. Ukwishiba ukuti amateyanyo ye bungano yacitilwe mu kutemwa kufwile ukutulenga ukumfwila ifilekabilwa, pa kuti “fyonse ficitwe busaka busaka kabili mu kukonkana.” (1 Kor. 14:40) Ifyebo fyakonkapo ne fya kucinkulako nafipayanishiwa pa kuti ilyo mukafika pe bungano ninshi namuipekanya ukuipakisha ifya kulya fya ku mupashi no kubishanya kwa Bwina Kristu.
Ilyo Ibungano Lishilatendeka
5 Bushe abo musambilisha Baibolo na bambi abafwaya ukusambilila icine balekabila ukubafwa pa kuti bengaiteyanya ukuyasangwa kwi bungano? Fintu bengayamona no kumfwa kulya kuti fyabalenga ukusanguka bakapepa ba kwa Yehova. (1 Kor. 14:25) Baeluda balingile ukwibukila pa lwa uli onse uwingakabila ukwafwiwa mu fya misendamine ne myendele, maka maka abakoloci aba mu cilonganino, no kushininkisho kuti babalanga ukutemwa no kubacitila ifyo balekabila.— Gal. 6:10.
6 Bushe namupwishishisha ukupekanya uko mukalasendama? Ukufika pali ino nshita mufwile mwalituma kale Formu wa Kulomba Umuputule ukubomfya akeyala kalinga ake bungano ukupitila muli kalemba wa cilonganino. Nga ca kuti balimupeela umwa kusendama ukupitila muli iyi mitantikile nomba mulefwaya ukuteulula ifintu, twapaapaata ishibisheni Dipartimenti wa fya Miputule uwaba uko mwikala bwangu bwangu fye pa kuti iyo miputule ipeelwe kuli bambi.
7 Apo Dipartimenti wa First Aid uwa pe bungano abelako ifya bukangalume epela, tulemukoselesha ukusenda umuti wenu pamo nga aspirini, amabandeci, ifya kwafwa ukusungulula ifya kulya, na fimbi ifyapalako nga mwamona ukuti kuti mwafikabila cine cine pe bungano. Nga ca kuti imwe no mutemwikwa wenu mwalilwala ubulwele bwayafya, pamo nga ubwa ku mutima, ubwa shuga, atemwa ukufunta, twapaapaata mukasende umuti mubomfya pa kwisa kwi bungano pa kuti mukeseubomfya nga filya fine mucita nga muli ku ng’anda atemwa lintu mwaya pa cuti. Ca mano ukuti lupwa nelyo cibusa wapalamisha uwaishiba bwino ifyo uyo muntu alwala ukulaba nankwe inshita yonse, pantu e wingamwafwa bwino lintu fimo fyaimako.
8 Ukwabulo kutwishika kukabako inshita ya kushimikilako ubunte bwa mu lyashi lintu mukalaya kwi bungano na pa kubwelela ku ng’anda. Bushe mukaipekanya ukwebako bambi icine? Ifwe bonse na bacaice besu pamo kuti twashalikako amatrakiti ku babomba palya banwensesha bamotoka amafuta na kuli bambi abo mwingakumanya pa lwendo. Kukabako inshita lintu mwingashalika bamagazini, amabroshuwa, nelyo impapulo shimbi ku balefwaya ukusambilila icine. Ipekanyeni ukushimikila ku bantu mu bunte bwa mu lyashi abo pambi bashingashimikilwa ukupitila mu nshila shibomfiwa lyonse pa kushimikila.
Pa Nshita ye Bungano
9 Pa nshiku shonse shitatu ibungano likalatendeka pa 8:45 hrs. Ni balupwa fye abapalamisha nelyo abo mwendele na bo muli motoka e bo mwingasungila ifipuna. Bamunyina na bankashi abakoloci bakapekanishiwilwa apa kwikala apengawama, kabili abalemana na bakabila ukwendela mu ficinga fya balemana bakapayanishiwilwa incende yalinga. Abalwala nelyo abafulumwapo fimo lintu baba mu cifulo cimo tabakapayanishiwilwe icifulo beka pe bungano. Cila bushiku ilyo mulefuma apo mwikele shininkisheni ukuti mwasenda ifipe fyenu fyonse.
10 Pa kuti tusuminishiwe ukubungana pamo abengi pe bungano lya citungu tukabila ukumfwila amafunde, imitubululo pa fya mulilo na makambisho yambi aya kuicingilila. Ukulangulukilako bambi kukatulenga ukukanabika ifipe fyesu apo fingacinga bambi atemwa ukubaponya. Apo tuli bekashi abomfwila ifunde, twalishiba no bucindami bwaba mu kumfwila amafunde ya pa musebo. Bamunyina abasendako bambi pa kwisa kwi bungano na pa kufuma pe bungano muli bamotoka babo balingile ukubombesha ukumfwila amafunde ya pa musebo. Ici cibimbamo no kushininkisha ukuti motoka ilebomfiwa intu yasuminishiwa ukwenda pa musebo. Bamo balalipila kuli bamotoka ba kubaleta kwi bungano. Aba bamotoka balalonga sana abantu pa kuti bacefyeko ishiposwa. Nangu ca kuti abantu balibelesha ukucite cintu ca busanso nge ci tacipilibula ukuti bakapokola ababa palya balondela bamotoka tabamona ificitika. Bushe kuti twaishiba shani ukuti iyi motoka ‘nailonga sana’ abantu? Ni lintu abantu nelyo ifipe fyalongwa muli motoka atemwa pali motoka ukucila pa cipimo uyo motoka alingile ukusenda. Nga ca kuti bamweba ukwikala babili pa cipuna apalingile ukwikala umuntu umo nelyo bamweba ukwikala ku numa ukushili incende apo ne fipe fyenu fishingekala bwino, lyene ninshi uyo motoka nalonga sana kabili ninshi, inshita iili yonse kuti aba mu busanso. Ukutoba amafunde ya pa musebo kuti kwamuletelela kabili kuti kwalenga no kuti mupuswe ku maprogramu yamo aye bungano nangu fye ukupuswa kuli programu onse uwe bungano. E co, nampo nga tulebomfya motoka wa kwa munyina nelyo uwa kulipila fye, ukupoosa amano ku milandu ya musango uyu kuti kwaletela Yehova umucinshi kabili kuti kwalangilila fintu cine cine twacindika Lesa, ubuteko ne ca bupe ca bumi.—Rom. 13:2-4.
11 Bushe muli no kubatishiwa pe bungano lya citungu? Pa ciputulwa ca lucelo pa bushiku bwalenga cibili, abakalaya ku kubatishiwa bakapekanishiwilwa apa kwikala, kabili bakapyunga bakamutungulula kuli iyi ncende. Kuti cawama nga mwingekala mu fipuna ilyo ici ciputulwa ca kulongana cishilatendeka. Mukese na Baibolo wenu, ulwimbo, itaulo, ne fya kufwala fyalinga ifya kubatishiwilwamo. Ama sikipa ayalembwapo fimo, ne fya kufwala fyapalako tafyalinga kufwala pa cintu cacindama nge ci. Baeluda abalepitulushamo abaleya ku kubatishiwa mu citabo ca Abateyanishiwa balingile ukushininkisha ukuti aba bonse baumfwikisha ifi fishinka. Apo ulubatisho lulangilila ukuipeela kwa umo pa lwakwe kuli Yehova Lesa, tacingalinga abaleya ku kubatishiwa ukwikatana amaboko ilyo balebatishiwa.
12 Kuti mwabomfya bakamera, amacamcorders, ne filimba fya makaseti pe bungano. Nangu cibe fyo, tamufwile kufibika umulepita abantu, apo fingacinga abantu, atemwa apo fingapumfyanya abantu ukukutika kuli programu. Tamufwile kufisuntinkanya ku malaiti nelyo ku fisoselo fya pe bungano, fifwile ukuikwatila ifi fyonse.
13 Lintu batelefoni ba kusenda ku minwe ne fya kumfwaninamo fimbi fileya filefulilako, twapaapaata shininkisheni ukuti ifi tafimupumfyenye atemwa ukupumfyanya abo mwikele na bo ukukutika kuli programu. Ifi fisolobelo tafilingile ukupanga icongo lintu mwe bene mwikele mwi bumba. Nga ca kuti cakabilwa ukuti mubomfye telefoni wa kusenda ku minwe, twapaapaata kalandileni ku nse ya nkambi.
14 Pa kuti mwionaula nshita na pa kwangushako ifintu, Sosaite naitulomba ukuisendela ifya kulya cila bushiku lintu tuleisa kwi bungano. Bamunyina abengi balyumfwila ifi fyebo kabili balisango kuti pa nshita ya kutuusha akasuba, kuti baikala no kulya ifya kulya basendele ne ndupwa shabo pali ubo bushiku. Abengi balilandapo ukuti balaipakisha ukutuusha pali iyi nshita intu babishanya na bamunyina ne nkashi. Ici cikabila ukushitila kabela ifya kulya ne fya kunwa no kufilonga mu cipe cinono atemwa mu ca kutalalikilamo icingalinga mwi samba lya cipuna cenu. Tulelomba ukuti bonse abakasangwako bakakonke ili ikambisho. Nomba line fye, abesa mu kushitisha ifya kulya mu nkambi ye bungano balimona uko bamunyina bamo bafuma pe bungano no kuya mu kushita ifya kulya kuli balya bashitisha mu nshila na pa mashitolo yapalaminako. Bamo pali aba abashitisha ifya kulya mu nkambi ye bungano nomba balefwaya ukuti basuminishiwe ukuti baleisula amashitolo yabo pa kuti baleshitisha ifya kulya ku beshile kwi bungano. Nga ca kuti twasuminishe ica musango uyo, abantu ba ku calo abengi kuti balabishanya na ifwe inshita ya kasuba. Na kabili, kuti caba nga filya caleba kale, kuti kwalaba ukutantama imilongo iitali ukushinguluka utu tuntemba, ici kuti calenga fye icimpungili pe bungano no kupumfyanya umutalalila. E co, tulelomba cila muntu ukwisa ne fya kulya ne fya kunwa fyakwe kwi bungano cila bushiku. Na balefwaya ukusambilila icine abo mwishile na bo kwi bungano balingile ukuisendela ifya kulya fyabo. Tacasuminishiwa ukuleta ifya kunwa fikola pe bungano.
15 Bushe kuti mwaitemenwa ukuwamyako icifulo ce bungano pa numa ya kulongana cila bushiku? Nelyo bushe kuti mwafwaya ukubombako muli dipartimenti umbi uwa pe bungano? Nga kuti mwabomba, twapaapaata mukaye kuli Dipartimenti wa Mulimo wa Kuitemenwa pe bungano. Abana ba myaka iishicilile pali 16 na bo bene kuti babombako cikulu fye balebomba na bafyashi nelyo umukalamba umbi uwingalabatungulula. Kwena, onse fye kuti ayafwilishako ukuwamya mu nkambi ukupitila mu kutoola ifisoso fyonse ifingamoneka no kufipoosa uko fifwile ukupooswa.
16 Twalipokelela ifyebo fya kututungulula pa lwa fya kufwala ne misakwile ifingatungwa ukuba ifyalinga pa mabungano yesu. Ku ca kumwenako: Twalikwata ifyebo fya kutungulula pali uyu mulandu mu fya mu kati ifya mu Butumikishi Bwesu Ubwa Bufumu, mu mpapulo shesu mwaliba ifilangililo ne fikope fya kumwenako, ne cacindamisha pali fyonse, twalikwata ifyebo fya kwa Yehova ifya mu Baibolo pali uyu mulandu. (Rom. 12:2; 1 Tim. 2:9, 10) Abantu balitwishiba bwino, balishiba no mulandu tulonganine. E co, imifwalile yesu ne misakwile filashimikila kuli bambi icine cine. Inte sha kwa Yehova ishingi shilalanga ica kumwenako cisuma mu mifwalile ne misakwile. Nangu cibe fyo, limo limo, tulamona ukuti bamo abasangwa ku mabungano yesu balambukilwako ne mifwalile ya ku calo ne misakwile. Ukufwala ifya kufwala filanga mu kati ifya musango uuli onse kulenga uuleitunga ukuba umuntu wa bumupashi ukutwishikwa. Ifya kufwala ifisuma ni filya ifishacilamo, ifya busaka, kabili ifyaciswa bwino. Imitwe ya ndupwa, kanshi, e ifwile ukumona bwino ifyo aba mu lupwa balepekanya ukufwala. Ici cifwile ukubomba na lintu fye twafuma pe bungano. Ukufwala amabaji pa kuya kwi bungano na pa kubwela kutwishibisha fye ukuti tuli bantu ba kwa Yehova aba busaka.—Linganyeniko Marko 8:38.
17 Imfumu ya mano Solomone alipuutilwemo lintu alembele ukuti “ubupumbu bwakakatila ku mutima wa mwaice” kabili “umwaice uwalekeleshiwa alenga nyina insoni.” (Amapi. 22:15; 29:15) Abaice abalekeleshiwa pa nshita ukulongana kulecitwa, balapumfyanya bamunyina ne nkashi abalefwaya ukumwenamo muli programu. Apantu abafyashi e bakalubulula kuli Yehova pa mibele ya bana babo, banyina nelyo bawishi kuti bashininkisha ukuti abana nabaicindika kabili balekutika ku kufunda kwa kwa Yehova lyeka fye lintu baikala pamo na bana babo. Bakapyunga bakalaya pa uli onse uulepumfyanya ibumba no kumulesha ukucite fyo, kabili bakamweba mu nshila ya cikuku ukuti alekutika ifilelandwa muli programu.
18 Apantu tulasengela ne cintubwingi ku mabungano yesu, cisuma ukusakamana sana abana ne fipe fyesu. Abana besu fikwatwa fyafuma kuli Yehova. Lelo twalishiba ukuti aba pano isonde bakwata imibele ya kwa Satana iya bukatu. E co, twapaapaata lyonse muleishiba ukuli abana benu. Na kabili mwilasha bakamera, ifikwama, ne fintu fimbi ifya mutengo pa fipuna, mulefisenda inshita yonse. Shininkisheni ukuti motoka wenu nakomwa, no kufisa ifili fyonse ifyashalamo atemwa ukufisenda fye. Ici cikalenga ukuti bekatoba motoka no kwibamo. Incinga na sho lumo lwine, shifwile ukukomwa.
19 Cilakoselesha ukumona bamunyina ne nkashi ukulalemba ifyebo pe bungano. Ukulemba ifyebo ifinono kukamwafwa ukupoosako amano no kumucinkulako ifishinka fikalamba. Ukupituluka mu fishinka no lupwa nelyo ifibusa kukamwafwa ukwetetula pa fishinka fikalamba ifye bungano pa kuti mwikafilaba.
20 Abantu ba kwa Yehova lyonse ni bakapekape pa lwa misangulo ya fya bulesa. (Ukufu. 36:5-7; 2 Imila. 31:10; Rom. 15:26, 27) Imisangulo yenu iya kuitemenwa ku kwafwilisha umulimo wa mwi sonde lyonse ilabomfiwa ku kusangako ishipooselwe ku kusonkela ififulo fya mabungano. Nga ca kuti mwasangula ukubomfya cheke, twapaapaata lembenipo ukuti ikalipilwe ku “Watch Tower.”
21 Nga fintu calembwa pali Amose 3:7, Yehova atile “tacita kantu, kano abala asokolwele ca nkama cakwe ku babomfi bakwe bakasesema.” Pamo nga “uusokolole fya nkama,” Yehova alilemba ukusesema ukwingi mu Baibolo uko kwafikilishiwa mu kulungatika kabili mu kukumanina. (Dan. 2:28, 47) Amalayo yawamisha yacili ku ntanshi. Ibungano lya Citungu ilya 1999 ilileti “Icebo ca Kusesema Ica kwa Lesa” lili no kukosha ukutetekela kwesu mu malayo ya kwa Lesa. Mukakutikishe ifyebo Yehova akatweba. Fintu mukomfwa no kumona mukafibomfye mu butumikishi, mu cilonganino, na mu mikalile ya pa lwenu. Tulepepela ipaalo lyacindama ilya kwa Yehova ukuba pa mapekanyo yenu yonse aya kuti mukasangwe ku bushiku bumo na bumo ubwa uyu mutebeto wa ku mupashi uwa mabwenge!
[Amashiwi pe bula 3]
Pekanyeni ukusangwako inshiku shonse shitatu!