Ibungano lya Citungu Ilya “Ukutetekela Icebo ca kwa Lesa” Ilya 1997
1 Umutumwa Paulo acinkwileko Timote ukuti “amalembo yonse yantu yapuutwamo kuli Lesa.” (2 Tim. 3:16) Apantu Icebo ca kwa Lesa calipuutwamo, kuti twacitetekela ukwabula ukutwishika. Umutwe we bungano lya citungu ilya uno mwaka uleti “Ukutetekela Icebo ca kwa Lesa.” Programu akatulenga ukukoselako mu kutetekela Baibolo, nampo nga twaishiba icine pa myaka iingi nelyo e lintu fye twishile mu kuteyanya kwa kwa Yehova. Bonse tulingile ukupekanya ukusangwa kuli programu onse. Fintu cikaba ica kukoselesha nga ca kuti abalesekelela abapya, ukucilisha abo tusambilila na bo Baibolo, basangwako capamo na ifwe!
2 Ibungano lya Nshiku Shitatu: Uno mwaka programu we bungano lya citungu uwa nshiku shitatu natantikwa pa kuti twinganonkelamo. Ukulunda pa mabungano 47 ayatantikwa mu Ubutumikishi Bwesu Ubwa Bufumu ubwa March 1997 ayakabako mu Zambia, kukabako ibungano lya Cibemba mu Lusaka. Ukufika ino nshita namwishiba ibungano ilyo icilonganino cenu capeelwako, kabili mulingile mwalipekanya kale kale ukusangwako inshiku shonse shitatu isha programu. Bushe mwalilanda na bamwingishe ncito pa kuti mwingapoka cuti wa nshiku mulekabila? Nga ca kuti mwalikwata abana baya ku masukulu, na bo bene balingile ukubako kuli ulu lubali lwa programu wa kukanshiwa kwabo mu kupepa apantu amabungano yakabako mu nshita amasukulu yesalwa umuku wa cibili. (Amala. 31:12) Amabungano yakabako mu Chichewa, Icibemba, iciLozi, iciLubale, IciNgeleshi na IciTonga,.
3 Cila bushiku programu akalatendeka pa 8:45 hrs. Bushe tukalangisha icikuuku ku bakoloci besu na bamunyina banakuka pa kubashila ifipuna mu ncende shalinga kabili ishisuma? Ibukisheni ukuti “ukutemwa . . . takuifwaila ifya kuko.”—1 Kor. 13:3, 5; Fil. 2:4.
4 Kuti Cawama Nga Mwayangwako: Umutumwa Petro acinkwileko Abena Kristu ba mu mwanda wa myaka uwa kubalilapo ifyo kuti cawama nga bayangilwe icebo ca busesemo nge nyali ileaka umwafiita. (2 Pet. 1:19) E cimo cine na ifwe. Ukwikala muli ici calo citekwa na Satana caba kwati tuli umwafiita. Tulatasha pa kwitwa ukufuma mu mfifi ya ku mupashi. (Kol. 1:13; 1 Pet. 2:9; 1 Yoh. 5:19) Pa kutwalilila ukuba mu lubuuto, tukabila ukutwalilila ne citetekelo cesu icakosa ukupitila mu kwangwa Icebo capuutwamo ica kwa Yehova. Ibungano lyesu ilya citungu uno mwaka likatukoselesha ukucita ifyo fine.
5 Nakalimo tukakabila ukubombesha ukukutikisha kuli programu, lelo mu kushininkisha cikatuwamina nga twacita ifyo. Tulingile ukutukusha ukwisa kwi bungano ninshi natutuusha bwino bwino pa kuti tukalekutika mu nshita ye bungano. Endesheni ukufika ku cifulo ce bungano cila bushiku pa kuti mwingekala mu cipuna cenu ilyo programu ashilatendeka. Lyene sangweniko ku lwimbo lwa kwiswila ne pepo ilyo programu aletendeka cila bushiku. Abakalamba balingile ukwimika ica kumwenako, kabili abafyashi balingile ukukansha abana babo.—Efes. 6:4.
6 Nga ca kuti twalolesha mu mitwe ya malyashi ilyo programu ashilatendeka ubushiku bumo bumo, kuti twaesha ukutontonkanya pa fishinka ifyo fingalandwa muli programu. Ici cikatulenga ukufwaisha ukukutika ku fyebo lintu filelandwa. Nakalimo kuti twaenekela ifishinka ifyo fikatwaafwa ukwebako bambi umulandu twacetekela Lesa no bulayo bwakwe ubwashininkishiwa ubwa kulambula abo abamufwayafwaya. (Heb. 11:1, 6) Calitashiwa ukuti tulelemba ifyebo ifipi ifya kutwaafwa ukwibukisha ifishinka fikalamba ifya muli programu. Nga ca kuti twacishamo ukulembe fyebo, nakalimo kuti twapusa ifishinka fikalamba fimo pa mulandu wa kuti tuli abapamfiwa nga nshi mu kulemba.
7 Umwaka wapwile mu fifulo fimo abakalamba na bacaice na kabili balimwenwe balelulumba no kubungana capamo pa nse, ukulalanshanya na bambi mu nshita ya programu, mu cifulo ca kulakutika ku cintu “umusha wa cishinka kabili uwashilimuka” apekenye pa kuti tunonkelemo. Yesu alaile ukutupeela ica kulya ca ku mupashi mu nshita iyene. (Mat. 24:45-47) E co, tufwile ukubapo pa kuti twinganonkelamo muli ico ca kulya no kusengauka ukukanatasha. (2 Kor. 6:1) Na kabili calimonekesha ukuti lintu abana bapenampena, ilingi line babepekesha ukuya ku cimbusu kanshi balefwaya fye ukuya mu kwendauka. Abana nga bakanshiwa bwino ku ng’anda, kuti bacefyako ukulaya ku cimbusu iciyeyeye. Inshita shimo, abakalambako balekala pamo mu fifulo fyafisama, balelanshanya, ukutepeleshanya, no kupeleshanya utumakalata. Abacaice besu, abatitikishiwa apakalamba na mafya ilelo, balekabila ukukutikisha ifyebo filelandwa, te kulacita ifintu fimbi mu nshita ya programu. Ifyo abacaice bakumbwa ifishumfwana ne fishinte fya Baibolo filingile ukusengaukwa. (Linganyeniko 2 Timote 2:22.) Ilintu bonse bakutikisha, abakalamba na bacaice, bakacindika Yehova no kumulenga ukusekelela.
8 Nga ca kuti kapyunga acimona icakabilwa ukufunda uuli onse pa lwa iyi milandu, alingile ukucipokelela pamo nga ukupayanya kwabamo ukutemwa ukwafuma kuli Yehova. (Gal. 6:1) Bonse balekabila ukwibukisha ukuti umulandu tubombesesha ukusangwa kwi bungano wa kuti ‘tumfwe no kusambilila.’ (Amala. 31:12) Na kabili, ‘uwa mano alomfwa no kulundako ukusambilila.’ (Amapi. 1:5) Kuti mulesendama bwangu cila bushiku. Mu nshita yashalako ilyo mushilaya kwi bungano, lanshanyeni pamo nga ulupwa ukuti mulekabila ukwikala capamo mwi bumba, ukutwalilila ukwikala mu nshita ya programu, no kukutikisha, pa kuti mwinganonkelamo muli programu.
9 Ukusaama Ukutemuna Yehova: Abantu ba kwa Yehova baba fye pa lwalaala kuli bonse mu calo ku kubamona. (1 Kor. 4:9) Ilingi line tulamonwa pa lwa mifwalile yesu iisuma no kupempenkana. Ukubomfya ifishinte fya mu Malembo ifisangwa pali 1 Timote 2:9, 10 na pali 1 Petro 3:3, 4 kwalilenga ukwaluka apakalamba mu mimonekele ya bengi ukulinganya ku fintu balemoneka lintu batendeke ukulongana ne cilonganino ca Bwina Kristu. Ici calipusanininako nga nshi ku mifwalile no kupempenkana ifiletwalilila ukubotelela ifyo tulemona mu calo. Tulekabila ukupempwila ukuti tatulemoneka nga abantu ba mu calo—ukufwala ifya kufwala fyacishamo, ukusumbula amafashoni ya ku calo mu misakwile, nelyo ukukanafwala mu nshila yalinga. Imifwalile yesu iya ca kumwenako no kupempenkana filingile ukwaafwa abapya abasangwa kwi bungano ukumona fintu Abena Kristu bakabila ukuisaamika abene.
10 Ilintu imibele ya mu cinkumbawile iyaliko pa mabungano ya mwaka wapwile yali bwino nga nshi, imifwalile ya ku calo no kuipempenkanya fitwalilila ukuba ubwafya kuli bamunyina bamo na bankashi, ukucilisha mu nshita ya bwanalale. Ilintu tulepekanya ukusangwa kwi bungano, tulingile ukuibebeta ukulosha ku mifwalile no kupempenkana. Mwe bafyashi, mano mano bebeteni fintu abana benu abanono na bapungwe bali no kufwala. Shininkisheni ukuti tatulesuminisha imifwalile ya ku calo na mafashoni ukwambukila imimonekele yesu iya Bwina Kristu mu nshila yabipa.
11 Sungilileni Imibele Isuma: Imibele isuma ishibisha Abena Kristu ba cine. (1 Pet. 2:12) Imibele yesu ukuli konse kuntu twingaba—pe bungano, umwa kuliila ifya kulya, nangu fye ilyo tuleenda—kuti yatwimininako bwino no kwaafwa bambi ukumona fintu ukutetekela Lesa ne Cebo cakwe fingacitila abantu. Ici kuti pambi cakoselesha bambi ukufwaya ukwishiba Yehova. (Linganyeniko 1 Petro 3:1, 2.) Twalikwata ishuko lya kucindika Lesa ku mibele yesu. Abangalila ihotela limo mu Alabama batile abeni besu abesa kwi bungano “bacilapo ukuba abantu basuma nga nshi kabili abaisunga bwino pali abo bapokelela.” Balundileko ukuti: “Tukaba aba nsansa nga nshi ilyo mwabwela na kabili ku ntanshi.” Akabungwe kangalila ifipangano fya fyalo fyapusanapusana no buteko bupokelela abatandashi mu ncende yabela pa kati ka masamba na kapinda ka ku kuso ku United States balembele ukuti: “Cila mwaka, ubwikashi bwesu bonse bulapembelela ukumona ukubungana kwa baWatchtower Society. Abantu benu baliwamisha icine cine; baisunga abafuuka nga nshi kabili aba mucinshi. Aba mu bukwebo bwesu balishiba ici kabili balaipakisha lintu ‘abantu’ babo babwela cila mwaka.” Amalipoti ukupala aya yaliwamisha ukubelenga, bushe te ifyo? Nangu cibe fyo, tulekabila ukuba abasakamanishisha pa kuti twacingilila ukushimikwa kusuma ukwa bantu ba kwa Yehova.
12 Ifyebo fya kutucinkulako ifingi fyalilandwa pa lwa kusopa abana besu, ukukanabaleka ukulabutauka mu fifulo fye bungano, ukupumfyanya bambi. Cila mwaka, Sosaite ilapokelela amalipoti ya kuti abana besu bamo tababa na ba kubasopa mu fifulo filesonkelwa nelyo lwa mupepi umo nalimo mushifwile ukufika abalesangwa kwi bungano. Nangu cingati pa mabungano tulakwata inshita ya kutandala no kubishanya na bamunyinefwe, abafyashi bafwile ukutwalilila ukulaibukisha umulimo uwa kusopa abana babo inshita yonse. Uyu e mulimo Yehova apeela umufyashi onse. (Amapi. 1:8; Efes. 6:4) Imicitile ya bana bashili na balebasopa kuti yaonaula ukushimikwa kusuma uko Inte sha kwa Yehova bambi babombesha ukulundulula.—Amapi. 29:15.
13 Ukulipila Indalama Shilebomfiwa pe Bungano: Ifwe bonse tukaba ne fya kushita ifikumine amabungano. Kuli ifintu na fimbi ukwa kubomfya indalama ifyo tulingile ukutontonkanyapo. Ififulo fibomfiwa ku mabungano fyalikosa umutengo. Kuliko na fimbi ifya kubomfyako indalama ififwile ukusakamanwa. Imisangulo yesu iya kuitemenwa muli bukapekape pa mabungano ilatashiwa apakalamba.—Imil. 20:35; 2 Kor. 9:7, 11, 13.
14 Ifipuna: Amakambisho yalondololwa pa myaka iingi yakatwalilila ukubomba, ayatila, IFIPUNA KUTI FYASUNGILWA FYE IFILUNDWA FYA LUPWA LWENU IFYAPALAMISHA NA BALI BONSE ABO MULEENDA NA BO MULI MOTOKA WENU. Caliwamisha ukumona ukuti abengi baleumfwila aya makambisho mu myaka ya nomba line, kabili ici calingilishako imibele ya kutemwa iilangwa pa mabungano. Pa fifulo ifingi, calyanguka ukwikala pa fipuna fimo ukucila pali fimbi. Twapaapaata langulukileniko, kabili sheni ifipuna ifili bwino kuli abo imibele yabo ilefifwaya.
15 Bakamera, Camcorders (Bakamera ba Vidio) ne Filimba fya Makaseti: Bakamera ne fibombelo fya kukopelako pambi kuti fyabomfiwa pa mabungano. Nangu cibe fyo, tatulekabila ukupumfyanya bambi mwi bumba lintu tulefibomfya. Tatulekabila ukulaendauka mu nshita ye bungano ukulakopa, apantu ico kuti capumfyanya bambi abaleesha ukukutika kuli programu. Takuli ica kukopelako icili conse icilingile ukukulikwa ku fibombelo fya malaiti ifilebomfiwa nelyo ku fisoselo, kabili ifi fibombelo fya bantu pa lwabo tafilingile ukucilika utushila twa kupitamo, nelyo ukucinga bambi.
16 First Aid: Dipartimenti wa First Aid wa fya mu kampampa epela. Te kuti asakamane abalwalilila. Uyu e mulandu wine mulingile ukutontonkanishisha libela pa fya kundapa ubulwele bwenu no bwa lupwa lwenu. Twapaapaata muiletele aspirin wenu, umuti wa kwaafwa ukusungulula ifya kulya, babandeci, banapini ba kumanikilako, na fimbi fyapalako, apantu ifyo fintu tafyakabepo pe bungano. Abali bonse abalwala cipumputu, abafwa icipuupu, aba malwele ya mutima, na fimbipo, balingile ukwenekela ukubombela pali fyo ukufika apo bengapesha. Balingile ukukwata umuti ulekabilwa, kabili lupwa lwabo nelyo uwa mu cilonganino uwaishibisha imibele yabo alingile ukuba capamo na bo inshita yonse pa kubafwilisha muli conse icilekabilwa. Kwalibako amafya pa mabungano lintu abantu balwalilila bashilwe fye beka e lyo ubulwele bwabekata. Aba mu bwangalishi bwe bungano balebutushisha aba musango yo ku cipatala. Nga ca kuti abalwalilila mu nshila yaibela tabakwete balupwa abengabafwilisha, baeluda ba mu cilonganino cabo balingile ukwebwa pa lwa iyo mibele no kutantika ifilekabilwa ku kwaafwa. Takwakabeko imiputule yaibela iikapayanishiwa pe bungano ku kwikalamo abambukilwa kuli fimo.
17 Ifya Kulya pe Bungano: Ukukanakwata umulimo wa kwipika ifya kulya pa mabungano kwalenga abafulilako ukulubuka mu nshita yonse iye bungano ku kukutika ku ca kulya ca ku mupashi. Twalipokelela amakalata ya kutasha ayafulilako pa lwa uku kwangushako ukutula fye apo iyi mitantikile yaimikilwe. Bonse balingile ukupekanya ukuiletela ifya kulya ifyayanguka, ifisuma ifya kasuba, pamo nga ifyo fyatubululwa mu ca mu kati ca Ubutumikishi Bwesu Ubwa Bufumu ubwa July 1995, paragrafu 25. Ubwalwa tabulingile ukuletwa mu cifulo ce bungano. Ifya kutalalikilamo filingile ukuba ifinono ifyalinga fye ukubikwa mwi samba lya cipuna cenu. Bamo mwi bumba balimonwa balelya no kunwa mu nshita ya programu. Ukucita ifyo kubulwa umucinshi. Ukuli abaleshitisha ku nse ya cifulo ce bungano, bamunyina bamo balimonwa baleshita ifintu kuli aba bantu mu nshita ya programu. Ico cibelesho tacawama.
18 Mu cine cine tulatasha ica kulya cesu ica ku mupashi ne mibele ya mutalalila, iya mutende capamo no kubishanya na bamunyinefwe mu nshita iipi iya kutuusha iya kasuba. Mu kumfwana no mulandu kwabelako inshita ya kutuusha akasuba, mu cifulo ca kusha icifulo ce bungano inshita ya kasuba ukuya mu kushita ifya kulya, twapaapaata muiletele ifya kulya mwe bene. Mu mabungano ya mu mishi, bamo basalapo ukuipikila abene pali iyi nshita, icilenga abengi ukucelwa ku ciputulwa ca cungulo ice bungano. Bushe kuti mwakumanisha ukulaipika fye mu nshita ya cungulo bushiku? Ifya kulya fyaipikilwa libela pamo nga ifipushi, ifyumbu, na fimbipo, kuti fyamulenga ukwangukililwa ku kukutika ku maprogramu ya cungulo. Muli ifyo, mukakwata inshita yakulilako iya kuipakisha ukubishanya na bamunyinenwe na bankashi.
19 Fintu tuli aba nsansa ukuti Amabungano ya Citungu aya “Ukutetekela Icebo ca kwa Lesa” yalatendeka nomba line fye! Bonse tulekabila ukushininkisha ukuti natuipekanya ukusangwa kuli programu onse, pa kuti twingaipakisha umutebeto wa ku mupashi uwawamisha uyo Yehova atupekanishishe ukupitila mu kuteyanya kwakwe. Muli iyo nshila tukaba ‘abaiteyanya ku kubombo mulimo onse usuma.’—2 Tim. 3:17.
[Akabokoshi pe bula 5]
Ifya Kucinkulako fye Bungano lya Citungu
Ulubatisho: Abaleya ku lubatisho balingile ukwikala mu ciputulwa capekanishiwa ilyo programu talatendeka ulucelo ubushiku bwa cibili. Umo umo uulepekanya ukubatishiwa alingile ukuiletela ica kufwala ca kusaamwina icalinga ne taulo. Akale bamo balefwala ifya kufwala ifishayana kabili ifyalepusana no lubatisho. Baeluda abalepitulushamo abaleya ku lubatisho ifipusho fya mu citabo ca Ubutumikishi Bwesu balingile ukushininkisha ukuti umo umo aumfwikisha ifi fishinka. Pa numa ya lyashi lya lubatisho ne pepo na kalanda, ceyamani wa iyo nshita akabilisha ukwimba ulwimbo. Pa numa ya cikomo ca kulekelesha, bakapyunga bakatungulula abaleya ku lubatisho ku cifulo ca kwibishiwako. Ulubatisho lwimininako ukuipeela lwaba mulandu wa bucibusa kabili uwa muntu umo umo pa lwakwe na Yehova. Muli ifyo, tacalinga ku baleya ku lubatisho ukukumbatana nelyo ukwikatana mu minwe ilintu balebatishiwa.
Amabaji: Twapaapaata fwaleni baji wa 1997 inshita yonse ilintu muli mu musumba we bungano na lintu muleya kwi bungano no kubwela. Ilingi line ici cilatupeela inshita sha kushimikila bwino nga nshi. Mulingile ukushita amabaji no tumanikilo mu cilonganino cenu, apantu tafyakabepo pe bungano. Mwipembela kushita amabaji yenu na ya lupwa lwenu ukufikila kwashala inshiku shinono ilyo ibungano lishilatendeka. Ibukisheni ukusenda kardi wenu uwa ndakai uwa Advance Medical Directive/Release.
Ukulembesha Bamagazini: Tuleeba bakasabankanya ba mu mishi ukuti kukabako itebulo likalabomba no kulembesha Loleni! na Ulupungu lwa kwa Kalinda capamo no kulembesha cipya cipya.
Umulimo wa Kuitemenwa: Bushe kuti mwapaatulako inshita pe bungano ku kwafwilisha muli imo iya madipartimenti? Ukubombela bamunyinefwe, nangu fye pa maawala ayanono, kukaba ukwa kwaafwa nga nshi kabili ukwa kwikusha apakalamba. Nga kuti mwayafwilisha, twapaapaata kabiyeni kuli Dipartimenti wa Mulimo wa Kuitemenwa pe bungano. Abana bashilafika imyaka 16 na bo bene kuti babombako, ukutungululwa no mufyashi nelyo umukalamba umbi uwasakamanishisha.
Amashiwi ya Kusoka: Mube abaibukila ku masanso yengabako pa kuti mwingasengauka amafya ya kuiletelela fye. Ilingi line abapuupu na bantu bambi ababulwa ubufumacumi kuti bashukila abantu bashili ku mwabo. Shininkisheni ukuti motoka wenu nakomwa inshita yonse, kabili mwisha icili conse icilemoneka ku kutunka umo ukutoba. Aya mashiwi ya kusoka yalebomba na ku ba macinga na bo bene. Abapuupu na beba mu matumba ya bantu batemwa ukusangwa ukuli ibumba ilikulu. Te kuti ciwame ukusha ifipe ifili fyonse pa cipuna cenu. Te kuti mushininkishe nga ca kuti onse untu mupalamene nankwe Mwina Kristu. Mulandu nshi uwa kutunka bambi mu nshila iili yonse? Twalipokelela amalipoti pa lwa bantu ba ku nse bamo abesha ukubeleleka abana banono ku kufwaya ukubasenda. SOPENI ABANA BENU INSHITA YONSE.
[Akabokoshi pe bula 5]
Inshita sha Kulongana
Ubushiku bwa kubalilaponobwa Cibili
8:45 hrs.-16:50 hrs.
Ubushiku bwa Citatu
8:45 hrs.-15:50 hrs.