Sangwa kwi Bungano lya Citungu Ilya “Akatiina ka Bukapepa!”

Bushe walicita amapekanyo aya kusangwa kwi Bungano lya Citungu ilya “Akatiina ka Bukapepa” ilya Nte sha kwa Yehova ilya 1994? Mu kushininkisha, ukanonkelamo pa kubako inshiku shonse shitatu! Mu kuba na mabungano ayacila pali 49 ayatantikwe mu Zambia mweka, mu kupalishako ibungano limo likacitilwa mupepi na kuntu wikala.

Umwenso umo kuti watompola ubukose no konaula isubilo; nangu cibe fyo, ilyashi likalamba ilya pa bushiku bwa kubalilapo ulucelo likalondolola akatiina ka bukapepa no kulondolola ubunonshi bwa kako ubwingi. Mu cituntulu, programu onse uwe bungano akebekesha ubu bunonshi.

Pa bushiku bwa kubalilapo akasuba ukomfwa fintu akatiina ka bukapepa kengakosha icupo no bumi bwa lupwa, pamo pene na fintu kengafwilisha abacaice ukutwalilila abashangila muli bucishinka bwabo kuli Lesa. Iciputulwa ca cungulo kasuba cikasondwelela ne lyashi lya kukafyo mutima ilya kuti “Ukusansamusha ku Bafwilwa.” Ukatesekesha ifyebo fibomba ifikapayanishiwa muli lilya lyashi ku kwafwilisha abo abalufya abatemwikwa mu mfwa.

Programu wa pa bushiku bwalenga shibili akalanga ifyo akatiina ka bukapepa kengakosha ukukakatila kwesu ku butungulushi bwa kwa Yehova ukukuma ku cilonganino no butumikishi bwesu. Mu lyashi lya kuti “Belenga Icebo ca kwa Lesa, Baibolo wa Mushilo, Cila Bushiku,” amakombe yakapokelela imitubululo ibomba iya kubelenga no kusambilila Baibolo. Programu wa pa bushiku bwalenga shibili akasondwelela mu kuba ne lyashi pa mutwe wa kubimbulo buseko uwa kuti “Akasuba ka kwa Yehova aka Kupuutamo Mwenso Nakapalama.”

Icikaba muli programu wa pa bushiku bwa kulekelesha lyashi lya kuti “Kukabako Ukubuuka kwa Balungama.” Mu lyashi likakonkapo, “Ukupusushiwa Abomi Ukupula mu Bucushi Bukalamba,” ubulondoloshi bukapayanishiwa ubwa bulayo bwawamisha ubwa kwa Yesu ukukuma kuli abo abashakatale abafwa nakalya.—Yohane 11:26.

Iciputulwa ca pa bushiku bwa kulekelesha ulucelo cikasondwelela mu kuba ne cilangililo ca kubimbule tontonkanyo ica maminiti 40 icikwete umutwe wa kuti Ukusalapo Ulolenkana na ko. Ibumba lyonse likabweshiwa ku numa ku kasuba ka kwa Yoshua kabili bakamona ukupingulapo kwakwe ukwashangila ukwa kubombela Yehova ukulangililwa. Ubwesho bwa mulilo mu kasuba kwa Eliya na bo bukapeelwa, kabili amasambililo yakabuulwa ukufuma muli ifi fya kucitika fibili ayakafwilisha amakombe ukulangisha akatiina ka bukapepa ilelo. Mu cungulo kasuba, ilyashi lya cintubwingi, “Umulandu wa Kutiinina Lesa wa Cine Nomba,” likaba e nkonta ye bungano.

Cita amapekanyo nomba ku kusangwako. Pa kusanga icifulo icipalamishe ku mobe, fika pa Ŋanda ya Bufumu iya Nte sha kwa Yehova nelyo lembela kuli bakasabankanya ba uno magazini.

[Abatusuminishe Ukubomfya Icikope pe bula 32]

T. Rosenthal/SUPERSTOCK