Iseni ku Ibungano lya Citungu Ilya “Ukutetekela Icebo ca kwa Lesa”!

AMAMILIONI ayengi bakabapo pa myanda ya fifulo ukupulinkane calo conse. Muno Zambia fye mweka, mukaba amabungano 47. Aya kubalilapo yakaba pa August 11-13 na yakalekeleshako, yakaba pa August 29-31. Cilemoneke fyo kumo pali uku kubungana kwa nshiku shitatu kuli no kubela mupepi sana na kuntu mwikala.

Mukamwenamo mu makambisho yafula ayabomba aya mu Baibolo. Mu fifulo ifingi programu akalatendeka ulucelo lumo na lumo ne nyimbo pa 9:30. Pa bushiku bwa kubalilapo ulucelo pakaba amaminiti 25 aya kwipusha abantu abo ubumi bwabo bwasongwa ku fintu baatetekela mu Cebo ca kwa Lesa. Ico ciputulwa ca kutendekelako cikasondwelela ne lyashi likalamba, “Ukwendela mu Kutetekela, Te mu Kumona.”

Ilyashi lya kubalilapo pa bushiku bwa kutendekelapo akasuba likalalanda pa lubali lwakatama luntu imisepela yakwata mu cilonganino ca Bwina Kristu. Amalyashi yatatu ayakakonkapo yakalanda pa fipimo fya mu Baibolo ifyakuma ku mibele ya Bwina Kristu mu milandile, mu misango, na mu mimonekele. Amalyashi ayakakonkapo aya kuti “Cenjeleni ku Kubulwa Icitetekelo” e lyo na “Icebo ca kwa Lesa ca Mweo” yakatonta pa kukonkomesha kushaiwamina ukwaba mu AbaHebere ifipandwa 3 na 4. Programu wa pa bushiku bwa kubalilapo akasondwelela ne lyashi lya kuti “Icitabo ca Bantu Bonse.”

Ilyashi lya kubalilapo pa bushiku bwalenga shibili ulucelo lileti “Icitetekelo Icabule Milimo Ninshi Califwa.” Ilyashi na limbi ilyacindama lulya lucelo ilya kuti “Mube Abalimbwa Kabili Abaikashiwa mu Cine,” lilelondolola fintu ukukula kwa ku mupashi kwingafikwapo. Iciputulwa ca kulongana cikasondwelela mu kuba no lubali lwa lyonse ulwa pe bungano, “Ukutetekela Icebo ca kwa Lesa Kutungulula ku Lubatisho,” apakakonka ishuko lya kuti abasambi abapya bakabatishiwe.

Ilyashi lya kwiswila pa bushiku bwalenga shibili akasuba ilya kuti “Lwileni Icitetekelo,” lilelanda pa kukonkomesha kwa mwi buuku lya Baibolo ilya kwa Yuda. Ukukonkana kwa malyashi ukukasenda iawala limo no mutwe wa kuti “Tuleya ku Ng’anda ya kwa Yehova” kukalanda pa busuma bwaba mu kulongana kwa Bwina Kristu. Programu kalya kasuba akasondwelela mu kuba ne lyashi lya kuti “Umusango wa Kutetekela Kwenu—Uleeshiwa Nomba.”

Programu wa pa bushiku bwalenga shitatu ulucelo akwetemo ukukonkana kwa malyashi yatatu ayakalanda pe buuku lya mu Baibolo ilya kwa Yoele, ukusanshako na fintu libomba mu kasuba kesu. Lyene pakakonka icilangililo ca mu Baibolo ica mutwe wa kuti “Sungilileni Ilinso Lyenu Ilituntulu.” Icikapulamo mwi bungano cikaba lyashi lya pa cintubwingi icungulo kasuba ilikalati, “Icitetekelo ne Nshita Yenu iya ku Ntanshi.”

Cine cine mukanonshiwa lwa ku mupashi nga mwasangwako. Mukapokelelwa mu nshila ya bucibusa pa ciputulwa icili conse. Pekanyeni nomba ukuti mukasangweko. Pa kwishibe cifulo cipaleme kuntu mwikala, moneni Ing’anda ya Bufumu iya Nte sha kwa Yehova iya mu ncende yenu nelyo lembeleni kuli bakasabankanya ba magazini.