Mwaiseni kwi Bungano lya Citungu Ilileti “Bakasambilisha Wa Cebo Ca Kwa Lesa”!

IMINSHIPENDWA BAKASANGWAKO ku mabungano yakaba mu fifulo ifingi mwi sonde lyonse. Muno Zambia amabungano 58 nayateyanishiwa. Aya kubalilapo yakabako pa August 10-12, kabili aya kulekelesha yakaba pa September 7-9. Limo pali aya amabungano ya nshiku shitatu kuti lyaba mupepi na kuntu mwikala.

Mu fifulo ifingi programu ikalatendeka ne nyimbo cila bushiku pa 08:45 hrs. Pa numa ya lyashi lya kusengela pa bushiku bwa kubalilapo, pakakonka amalyashi yambi ayakwete imitwe ikafuma muli Baibolo, iya kuti: “Ukusambilisha Bambi pa lwa Bufumu Kulaleta Ifisabo Fisuma,” “Ukucincishiwa ku Fikalamba fya kwa Lesa,” na “Bekelweni Ubulungami bwa kwa Lesa.” Ilyashi lya kulekelesha mu lucelo likaba lyashi likalamba ilikalati, “Abateyanishiwa nga Bakasambilisha wa Cebo ca kwa Lesa.”

Ilyashi lya kubalilapo akasuba, likalati, “Abantu Basangululwa ku Kubomba Imilimo Isuma.” Pakakonka ilyashi lya kukonkana ilya mbali shitatu ilikalati: “Ukuisambilisha Ilyo Tulesambilisha Bambi.” Likakomaila sana pa bucindami bwa kucita ifyo tusambilisha ukulosha ku mibele isuma, isambililo lya pa lwesu ilya Baibolo, na ku fyo tukabila ukukaana amatukuto ya kwa Kaseebanya aya kutulufya. Pakakonke lyashi lya kuti “Pateni Umusango Usekeele uwa Kutamba Ifye Shiku.” Lyene ukulanshanya kwa cipandwa 60, ice buuku lya kwa Esaya mu mutwe wa kuti, “Yehova Ayemfya Abantu Bakwe no Lubuuto,” e kukalekeleshako.

Amalyashi ya pa bushiku bwa bubili aya kuti “Sangeni Ukutuusha mwi Koli lya kwa Yesu,” “Pashanyeni Kasambilisha Mukalamba,” na “Bushe Mwaliba Abaitemenwa Ukubombela Bambi”? yakalanda sana pa fyo tufwile ukukonka ica kumwenako ca kwa Kristu. Pa bushiku bwa cibili kukaba amalyashi ya kukonkana ayakasenda amaawala yabili ayali ne mitwe ya kuti, “Bakapyunga Abalenga Bambi Ukutetekela” na “Nonkelenimo nga Nshi mu Masambililo ya Bulesa.” Mu lyashi lya kukonkana ilikabako ulucelo bakatupeela imitubululo pa lwa kupanga abasambi, kabili akasuba ilyashi likakomaila pa fyo twinganonkelamo sana mu kusambilila Baibolo no kusangwa ku kulongana kwa Bwina Kristu. Ulucelo ilyashi lya lubatisho e likalekeleshako, e lyo abafikilepo bakabatishiwa. Abengi bakafwaisha ukumfwe lyashi lya kusondwelela akasuba pa bushiku bwa cibili ilikalati, “Ifibombelo Fipya Ifya Kutwafwa Ukulunduluka lwa ku Mupashi.”

Programu wa bushiku bwa citatu akwete ne lyashi lya kukonkana ilya mbali shitatu ilikalanda pe buuku lya kwa Malaki kabili likatulanga ifyo lyakuma bwino ifilecitika pali lelo. Pa numa kukaba icilangililo ca mingila icikalanda pa fyo Kora, Datani na Abiramu bapondokele ubutungulushi Lesa apeele Mose. Pa numa, kukaba ilyashi ilikakomaila pa fyo icilangililo cikatusambilisha. Akasuba kukaba ilyashi lya pa cintubwingi ilikatila: “Ni Bani Balesambilisha Inko Shonse Icine?”

Cine cine bumupashi bwenu bukawaminako nga mwasangwako pa nshiku shonse shitatu. Pa kuti mwishibe icifulo ce bungano icili mupepi na kuntu mwikala, ipusheni pa Ng’anda ya Bufumu iya Nte sha kwa Yehova iyabela ku mwenu atemwa lembeleni bakasabankanya ba uno magazini.