Ibungano lya “Imikalile ya Bukapepa” Ilya 1998—1999 Nalipalama!

MU ZAMBIA mweka, amabungano 52 nayapekanishiwa ukutendeka mu August ukufika mu September. Cilemoneka ukuti, kumo pali uku kubungana kwa nshiku shitatu kukabela ku ncende iyapalamina no ko mwikala. Mu ncende ishingi, programu akalatendeka ne nyimbo pa 9:30 hrs pa nshiku shonse shitatu.

Programu wa pa bushiku bwa kubalilapo ulucelo akashimika ifipulilemo pa lwa kulunduluka kwa kushimikila Ubufumu mu ncende shalekanalekana ishe sonde. Kabili umutwe we bungano ukalondololwa mu lyashi likalamba ilikalati, “Icilubula ca kwa Kristu—Inshila Lesa Apayanya ku Kupusukilamo.”

Mu cungulo ukukonkana kwa malyashi ukukalati: “Mwe Bafyashi—Sambilisheni Abana Benu Inshila ya kwa Lesa,” kukapayanya imitubululo pa fyo abacaice bengacincishiwa ukutemwa no kubombela Yehova. Programu wa cungulo akasondwelela ne lyashi likalati “Bushe Kwalibako Ubumi pa Numa ya Mfwa?”

Programu wa pa bushiku bwalenga shibili ulucelo akalanda pa mulimo wa Nte sha kwa Yehova uwa kupanga abasambi mu malyashi yatatu ayakakonkana ayakalati, “Ukwaafwa Abantu Ukwenda mu Nshila ya ku Mweo,” “Ubwafya bwa Kusanga Abantu,” na “Ukusambilisha Abasambi Fyonse Ifyo Kristu Atwebele.” Pa kusondwelela programu wa lucelo, kukabako imitantikile ya kuti abapya bakabatishiwe.

Ilyashi likabalilapo pa bushiku bwalenga shibili icungulo ilikalati, “Ukubomba ne Subilo lya Kwikala Kuli Pe na Pe,” likatukoselesha ukutontonkanya kwabamo ipepo pa milandu tufwile ukubombela Lesa pa lwesu. Amalyashi yakalati “Ukutesekesha ‘Ifya Bupe mu Bantu,’ Abasambilisha Inshila ya kwa Lesa” ne lya kuti “Fuuleni Ubuntu bwa Kale—no Kufwalo Bupya” yakalondolola icikomo cimo na cimo ica Abena Efese icipandwa 4. Pa numa, ilyashi likalati “Ibakeni Ababula Akabi ku fya Pano Isonde” no kukonkana kwa malyashi yatatu ukukalati “Mwe Bacaice—Konkeni Inshila ya kwa Lesa,” fikapayanya ukukonkomesha kusuma ukwa mu Malembo. Programu wa cungulo akasondwelela ne lyashi likalati “Kabumba—Ubuntu Bwakwe ne Mibele Yakwe.”

Pa bushiku bwalenga shitatu ulucelo kukaba ukukonkana kwa malyashi yatatu ukukalondolola ifipandwa fya kusondwelela ifye buuku lya kwa Esekiele pamo na fintu ubu busesemo bulebomba. Icilangililo ca mingila icikashimpwa pa busumino bwa bacaice batatu abaHebere e cikasondwelela programu wa lucelo. Icikaba icikalamba pe bungano mu cungulo, lyashi lya cintubwingi ilikalati “Inshila fye Yeka Iitwala ku Mweo wa Muyayaya.”

Cine cine mukanonkelamo lwa ku mupashi pa kusangwako inshiku shonse shitatu. Mulelaalikwa mu kukaba ukusangwako ku malyashi yonse, ayo, nga fintu caba, yakalandwa apabula ukulipilisha. Nga mulefwaya ukwishiba incende ya kulonganinapo iipalamine no ko mwikala, kabiyeni ku Ng’anda ya Bufumu iya Nte sha kwa Yehova iya mu ncende yenu nelyo lembeleni abalemba uno magazini.