Umulandu Ulingile Ukusangilwako
UKAPOKELELA inshiku sha kulambula shine isha makambisho ya ku mupashi pe Bungano lya Citungu ilya “Ukusambilisha kwa Bulesa,” ilikatendeka mu lusuba mu misumba ukushinguluka icalo. Mu Zambia mweka, 48 ukwa uku kubungana kukacitwa mu kati ka August na September. Mu cinkumbawile, programu akatendeka pali Cine pa 1:00 p.m. no kusondwelela pa Mulungu pa 4:15 p.m. Ifishinka fikalamba pa mabungano yamo fikaba malipoti kuli bamishonari, abaafwiwa ukubwelela ku calo cabo kuli aka kashita ka nsansa.
Nampo nga uli mukalamba nelyo mwaice—umulume, umukashi, wishi, nyina, umupungwe, nelyo umwana—ukapokelela ukusambilisha ukukapeelwa mu nshila yalengama, iya kwipukisha ukukakunonsha. Ku ca kumwenako, abengi ilelo balepusha abati, Cinshi caba e mifwaile ya bumi? Pali Cisano ulucelo, ukaipakisha ukumfwa ici cipusho ukulanshanishiwapo kabili ukabimbulwa ku cintu ukapokelela ku kwaafwa bambi ukumfwikisha uyu mutwe we lyashi.
Pali Cisano icungulo programu ikalangisha imbali “Ukulenga Icupo Ukuba Icikakilo Cebelelela,” “Bombesha ku Kupusunsuka kwa ba mu Ŋanda Yobe,” na “Mwe Bafyashi—Abana Benu Balakabila Ukusakamana Kwalamuka.” Ukukonka pali ifi, ukusakamana kwa kulungatika kukatontwa pa mpika abacaice balolenkana na sho na fintu bengabomba na sho. Balingile ukukoseleshiwa ku cilangililo ca muno nshiku ica mutwe wa kuti Imisepela Iibukisha Kalenga wa Iko Nomba.
Pa Cibelushi programu akalangisha ubusesemo bwa kwa Yesu pa nshiku sha kulekelesha no kucilisha amashiwi yakwe aya kuti: “Ilyo line pa numa ya bucushi bwa nshiku shilya, akasuba kakafiishiwa.” (Mateo 24:29) Ukafwaya ukumfwa ukulanshanya ukulosha ku lintu ubo bucushi bukacitikako. Programu ya pa Cibelushi na kabili ikapituluka mu calembwa ca Nte sha kwa Yehova mu nshita sha muno nshiku no kulangisha cintu bapwishishisha.
Pa Mulungu icilangililo na cimbi, ica mutwe wa kuti Mwilufiwa Nelyo Ukusenteka Lesa, cikalosha ku kusonsomba kuli bumpomfu bwa umo ubwa Bwina Kristu pa mulandu wa mavideo ya lelo ayatemwikwa ne nyimbo. Ilyashi lya cintubwingi icungulo likalangisha umutwe wa kuti “Ukusambilisha kwa Kwaafwa ku Nshita Shesu Ishayafya.” Programu akasondwelela mu kuba no kukonkomesha kwa kuti “Twalilileni Ukwikatilila ku Kusambilisha kwa Bulesa.”
Mu kushininkisha, ukanonkelamo pa kubapo inshiku shonse shine! Ulelaalikwa mu kukaba ukusangwako. Ku kusange cifulo cipalamishe ku mobe, ipusha pa Ŋanda ya Bufumu iya Nte sha kwa Yehova nelyo lembela bakasabankanya ba uyu magazini.