Abapwishe Sukulu lya Gileadi Abaswatuka Ukwananye Mbila Nsuma

“ICINTU cacilishapo kuwama ico tatwabalile atwelenganyapo.” Iyo e nshila Anders na Amalia Groth bayumfwilemo pa lwa kukansha kwabo ukwa bumishonari. Balumbulwile ukuyumfwa kwa bapwishishe sukulu bonse 48 abe kalasi lyalenga 97 ilya Watchtower Bible School of Gilead ilyo balundileko kuti: “Ukukansha kwa Gileadi nakutukunta no kutupekanya, e co tuli abaswatuka ukuya ku kupeelwa kwesu ukwa mulimo ukupya.”

Twalamona ukuti abasambi bali no buseko ilyo balelanda pali programu wa kupwishe sukulu; 6,420 balilongene pa September 4, 1994, kuli ici ca kucitika.

“Theodore Jaracz uwe Bumba Litungulula aiswile programu pa kulanda pa mutwe wa kuti ‘Ukusambilishiwa na Yehova,’” e fyasosele David Abel no mukashi wakwe, Kelli. “Icishinka tushakabale atulaba cali ni lintu Munyina Jaracz atile: ‘Tufwile ukusumina ubuce bwesu bwine lintu twalinganishiwa kuli Yehova,’ no kulangilila cene ukupitila mwi sambililo lya maka ilisangwa muli Yobo ifipandwa 38 na 39. Munyina Jaracz alondolwele ukuti ilintu natwingilishako ukwishiba kwesu ukwa Baibolo ukupitila mwi Sukulu lya Gileadi, tatwishibe icasuko ku cipusho icili conse. Tufwile ukutwalilila ukusambilila Icebo ca kwa Lesa.”

Christian na Angele Coffy e balandile nomba: “Twalyebekeshiwe ku lyashi lyapeelwe na Max Larson pa mutwe wa kuti ‘Cinshi Caba E Bucindami bwa Mufula Usuma?’ Twalitemenwe lintu atulingenye ku cikuulwa ico cikabila umufula washika mu mushili wakosa pa kuti cingatwalilila ukuba icashangila mu nshita ya cinkukuma. Pa kusambilila mu mukoosha, kuti twalundulula ukwampana kwapalamisha na Yehova kabili kuti twashimpa icitetekelo cesu pa kwishiba kwashika pa kuti twingatwalilila ukuba abashangila mu nshita shayafya.”

“Ilyashi kuli Milton Henschel, presidenti we sukulu, pa mutwe wa kuti ‘Amabala Yabuutilo Kuseepa’ likebukishiwa pa nshita ntali,” e fyalandile Gary na Lynn Elfers. “Ilembo apashimpilwe ilyashi, Yohane 4:35-38, lyakomaile pe shuko twakwata ilya kwingila mwi bala ilyo kale kale lyatandwa kuli bakabomba ba ku numa. Ici cikatucincisha ukubomba mu kuba ne tontonkanyo lye pamfya.” Ukusuminisha ici, Jan na Sirpa Vaahtola balandilepo kuti: “Munyina Henschel abimbwile ukwenekela kwesu ukukuma ku kuseepa ukucili ku ntanshi pa kupeela lipoti wa nomba line ukufuma ku fyalo fya ku Baltic. Ukwingilishiwako mu Estonia kwali maperesenti 51, mu Latvia maperesenti 106, kabili mu Lithuania maperesenti 51. We kucincimusha! Bamunyina kulya balelomba Umwine wa kulobolola ukuti atume ababomfi bafulilako. Ukucilisha twali aba nsansa ukumfwe ci, apantu ukupeelwa kwesu ukwa mulimo kuya ku Estonia!”

“Joel Adams alikonkelepo pa mutwe wa kuti ‘Tetekela Yehova,’” e fyaibukishe Kevin na Evelyn Cortina. “Atupandile amano ukukanatontonkanya ukuti inshita shimo shimo kuti twatetekela Yehova kabili inshita shimo shimo kuti twashintilila pa kutontonkanya kwesu kwine. Mu mulimo wesu tukalolenkana no kusonsomba ukwingi—ubutuntulu bwa bumi, ifya kulya, ululimi, imyata, ne fyalundwapo. Konse kwine kukafwaya ukuti tutetekele Yehova.”

Mu kukonkapo kwaishile Gerrit Lösch, icilundwa ce Bumba Litungulula, uwalundulwile umutwe wa kuti “Twalilila Ukubelebesha Inkumbu sha kwa Yehova.” Alen na Ann Marie Gokavi batile: “Alondolwele ukuti caba ca kupiminako ukukosoka kwesu ukwa Bwina Kristu ukutambulula inkumbu kuli bamishonari banensu na kuli abo twakanako imbila nsuma. Ukupeelwa kwa mulimo ukwa cilendo kubimbamo amalambo, lelo nga ca kuti inkumbu shabulila, lyene ninshi amalambo yesu yakaba ya mutengo unono.” (Mateo 9:13) Peter na Fleur Hupston balundileko kuti: “Munyina Lösch atile tulingile ukuba aba nkumbu na kuli bamunyinefwe ne nkashi, ukubamwena ku lubali lumbi ulwa maglasi ya binocular, ukulandila mu mampalanya, pa kuti ifilubo fyabo fingacefiwa ukucila ukukushiwa.”

“Jack Redford, umo uwa bakafundisha besu aba Gileadi, alikonkelepo pa mutwe wa kuti ‘Bushe Kuti Wabaka Ukwebaulwa?’” e fyaibukishe Mickey na Sherry Minsky. “Alondolwele ukuti icilumba cilenga cene ukuba icakosa ukupokelela ukwebaulwa no kuti nga ca kuti tuli abakuntukilwa bwangu lintu twafundwa, tukapusulwa ubunonshi bwa kuko. Lyene apeeleko imitubululo ibomba pa kupokelela ukufunda ukushimpwa pa Inyimbo sha Bulanda 3:27-31.” Charles na Joan Held balinyantukilemo ukusoso kuti: “Ubwingi bwa nshita tatwibukila ulwa kupelebela kwesu kwine; e ico, tufwile ukumona ukwebaula nge nshila ya kwiswilamo amenso yesu ku fintu ifyo tatwaishiba. Ukwebaula nelyo ukufunda ukufuma kuli Yehova bushininkisho bwa kutemwa kwakwe kuli ifwe.”

“Kafundisha na umbi, Ulysses Glass, alandile pa mutwe wa kuti ‘Nonka Amano Yene Yene Ayatungulula ku Bumi.’ Aipwishe ukuti: ‘Cinshi mukacita na cintu musambilile?’” e fyasosele Kenneth na Lisbeth Ardkäll. “Lyene apeele icilangililo ukushimpwa pa Amapinda 30:24-26 pa lwa bapati bacepesha na fintu Yehova abapangasha mu kukumanina pa kuti bengatwalilila ukuba abatuntulu. Ifwe, pa lubali lumbi, tatwakwata amano ya mununshe pula, e co tulekabila ukuibikilishako fwe bene ukunonka amano. Yehova alitupangasha mu kuba na fyonse ifyo tukabila pa kucite co. Kulila fye twapalamina kuli Yehova na kuli umo no munankwe mu kutemwa, tukapwilikisha ifingi.”

Ilyashi Likalamba

“Munyina Karl F. Klein, icilundwa ce Bumba Litungulula, mu cikabilila alangulwike Ilumbo 19 lyalenga 19 capamo na ifwe mu lyashi lyakwe ilyaleti ‘Icibekobeko Capulishamo,’” e fyasosele Jay na Gwen Abraczinskas. “Aebekeshe ukutesekesha kwashika ukwa kwa kemba wa malumbo Davidi ukwa kuli Yehova no kubekwa akwete ku Cebo ca kwa Lesa.” “Munyina Klein ayakenye ilumbo mu mbali shitatu,” e fyalandile Keith na Donna Hornback. “Ulubali 1 (Ps 19 ifikomo 1-6) lulangisha ukutesekesha kwa kwa Davidi ku bubumbo bwa kwa Lesa, ulubali 2 (Ps 19 ifikomo 7-10) lulumbulula ukutesekesha kwakwe ku mafunde ya kwa Lesa, no lubali 3 (Ps 19 ifikomo 11-14) lutucinkulako kuti, ukupala Davidi, tulingile ukufwaya ukukwata ukwampana kusuma na Yehova.”

“Twaliipakishe icishinka ca kuti akatiina ka kuli Yehova kalikatama nga ca kuti tuli no kusengauka icabipa. Ici citutungulula ku kucita icasanguluka mu menso yakwe,” e fyasosele David na Raylene Long. Frank na Vibeke Madsen balisuminishe. “Ukulandapo kwa kwa Munyina Klein ukukuma ku fyo ifishimiko, amafunde, ne fipope fya kwa Yehova fyaba ifya kunonsha fyasupawilile bwino bwino ifyo twasambilile mwi sukulu lya Gileadi,” e fintu basosele. “Ico catulengele ukuba abacilanapo kupampamina pa kukakatila ku Cebo ca kwa Lesa ku nshita ya ku ntanshi no kumona cene nge cipao ca fibekobeko.”

“Ukukonka pa lyashi likalamba, abasambi bapokelele amadiploma yabo, no kupeelwa kwabo ukwa mulimo ukwa cilendo kwalibilishiwe. Pa numa ya kutuusha kwa kupembesuka, bonse balibwelele ku ciputulwa ca cungulo. Abalepwishe sukulu baakene mu kwasuka ifipusho fyalelangulukwapo mwi Sambililo lyaipifiwa ilya Ulupungu lwa kwa Kalinda.

“Lyene kwakonkelepo programu wa basambi uwaleti ‘Abakanshiwa ku Kuba Bakabilisha ba Bufumu mwi Sonde Lyonse,’” e fyaibukishe Bob na Shannon Lakatos. “Iciputulwa ca kubalilapo ica programu cabombele ne fya kukumanya fya basambi mu mulimo wa mwi bala mu kati ka kosi wesu uwa myeshi isano. Catontomeshe pa kubomfya kwalamuka ukwa fipusho mu butumikishi bwesu. Iciputulwa ca kulanshanya kwa kwipusha calangile inshila shashininkishiwa isha kulolenkana no kusonsomba ne mibele yaluka iya bumi bwa bumishonari. Amaslaidi yalelanda pa fyalo fitatu, Costa Rica, India, na Malawi, yatupeeleko icitontonshi ca kuteyanya kwa kwa Yehova ukwa mu kusaalala kwa calo.”

“Icilangililo cakonkelepo icaleti, Ba Uwa Teokratiki, Te wa ku Calo, calangishe ifya kufumamo fyabipa ifyo balupwa bamo aba ku calo, aba bucaibela bengakwata,” e fyalandile Jesse na Michelle Duncan. “Calangile ukuti Abena Kristu bafwile ukwishiba ifya kutungulula fya Teokrasi nge fyakabilwa kabili ifya kunonsha,” e fyalundileko Wenzel na Kelly Koula.

Ulwimbo lwa kupelako ne pepo fyaletele uyu programu wa kucincimusha ku mpela. Ilyo abapwishishe isukulu baleanduluka mu kwenekela ukuya kwabo ku kupeelwa kwa mulimo mu fyalo fya cilendo 18, amatontonkanyo yabo yalilumbulwilwe bwino kuli uku kulandapo kwa kushalikapo ukwa kwa Tommi na Jael Kauko ukwa kuti: “Tuli abaswatuka nga nshi ukuya ku mulimo wesu no kubomfya cintu tusambilile. Natupokelela ifishaifulila—nomba ni nshita yesu iya kupeela.”

[Icikope pe bula 26]

Ikalasi lya Balepwisha Isukulu lya Watchtower Bible School of Gilead Ilyalenga 97

Mu mutande uli pe samba, imitande naipeelwa amanambala ukufuma ku ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo na umo.

(1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.