Cinshi Cintu Ukusalapula Kusanshamo?

MU KULUMBULULA ukutemwa kwakwe, Yehova alasalapula abantu bakwe. (Amapinda 3:11, 12) Alabapeela ukufunda uko kulungika imimwene yalubana kabili uko kumumunga amaka yabo aya mintontonkanya ne myendele. Ku bena Israele mu nshita ya kwa Mose, ukusalapula kwasanshishemo ukwikalilo bunte ku bukulu bwa kwa Lesa. Kwaliko ukulangisha kwa maka yashingalinganishiwako lintu Yehova aputunkenye ubupingushi pa milungu ya mu Egupti yonse, ukulubula abantu bakwe, no konaula umulalo wa bena Egupti muli Bemba Wakashika. Amapingushi ya kutiinya yaliputunkanishiwe pa bena Israele babulwe cumfwila. Kabili ifya kulya na menshi fyalipayanishiwe mu cipesha amano ifyo kabili fyabasambilishe ubucindami bwa kumfwila no kukonka fyonse ifyo Yehova asosa. Uku ukusalapula konse kwabeleleko ku kubalenga ukuba abaicefya no kubebekesha pa lwa kukwata akatiina kalinga aka kuli Yehova, akaali no kulangwa ukupitila mu citetekelo ne cumfwila.—Amalango 8:3-5; 11:2-7.

Ilingi line ukusalapula kwa kwa Yehova kwishila mu beminishi bakwe, ubulashi bwalaswa mwi funde. Umwina Israele uwabepeshe umukashi wakwe ukuti taali nacisungu pa nshita alemuupa aalesalapulwa na bakalamba ababombele nga bapingushi.—Amalango 22:13-19.

Tulakabila Ukusalapula Abana Besu

Abafyashi bemininako Yehova lintu basalapula ubufyashi bwabo mu kulungama. Kabili abana bafwile ukumona ukusalapula kwa musango yo pamo ngo kulumbulula kwa kutemwa kwa bufyashi, ukwabelako ku busuma bwabo ububelelela. (Amapinda 1:8; 4:1, 13; 6:20-23; 13:1, 24; 15:5; 22:15; 23:13, 14; Abena Efese 6:4) Lisambililo nshi lyawamisha pali yonse?

Ni mwe. Ica kumwenako cenu. Ni mwe ca kupashanya umwana wenu. Alakutikisha ku co mwaba ukucila ku co musosa. Alomfwa amashiwi yenu, lelo apashanya incitilo shenu. Umwana wenu ni kapashanya. E co, cinshi cintu mulefwaya umwana wenu ukuba? Uwa kutemwa, uwa cikuuku, kapekape, uwatemwo kubelenga, uwaswatuka, uupikintika, umusambi wa kwa Yesu, kapepa wa kwa Yehova? Icili conse ico mulefwaya ukuti abe, e fyo mube mwe bene. Ku bafyashi ba Bwina Kristu, kanshi, ukusalapula abana kusanshamo ukubaafwa no kubakansha ukuba abasambi bene bene aba kwa Yesu Kristu.

E ico, kansheni umwana wenu ukufuma ku bunya, lintu bongobongo wakwe alekula ulubilo, ukufipilila ifyebo no kuyumfwa ifya kubika mu muntontonkanya no mutima. Lelo cinshi cingacitika nga ca kuti iyo myaka yakakala iya kumumunga yapita kabili ubuntu bwa bukapepa tabulimbilwe mu mwana wenu? Mwiyumfwa abapelelwa. Ukwaluka kuti nalyo line kwacitikako kabili kulecitika ku mamilioni, bonse abanono na bakalamba, ukupitila ku maka ya kwa Lesa. “[Fuuleni] ubuntu bwa kale pamo ne micitile ya buko,” e fisosa Icebo ca kwa Lesa, “no kufwalo buntu bupya, ubo mu kwishiba bulelengwa cipya cipya nge cipasho ca kwa Kalenga wa buko.”—Abena Kolose 3:9, 10.