Ulupili “Ulusela”
KU MASAMBA ya Ireland, imimonekele yaibela iyapala akantotwa iya Croagh Patrick ilapulamo ukufuma pa mpili shashingulukako. Cila mwaka, pa bushiku bwa pa Mulungu ubwa kulekelesha mu July, pa muulu wa lupili pamoneka ukwenda lintu abantu abengi ukufika kuli 30,000, abanono na bakalamba capamo, banina ukuya pa muulu wa lupili (amamita 765) pa bulendo bwa mipepele ubwa pa mwaka.
Pali ubu bushiku, aba nyendo sha mipepele balanina no kwika mu kashila akafyenenkana, akakalabana, kabili, mu ncende shimo, aka busanso. Na kuba, apa kuninina apa kulekelesha (mupepi na mamita 300) palisulukisha nga nshi kabili ni cikanga pabe fye amabwe ayatelengana, ukulenga ukunina ukuba ukwa busanso kabili ukwa kunasha.
Bamo banina ukwabule ca kufwala ku makasa, kabili abanono kuti banina fye ne mbali shimo ku makufi. Mu nshita shapita, inyendo sha mipepele shaletendeka ninshi napafiita.
Mulandu nshi Croagh Patrick abela ca kukumanya cacindama muli uyo musango ku bafulishe fyo?
Caimikwa Kale nge Cifulo ca Nyendo sha Mipepele
Mu ciputulwa ca kubangilila ica mwanda wa myaka uwalenga busano C.E., Icalici lya ciRoma Katolika lyatumine Patrick pamo nga shikofu mishonari ku Ireland. Ubuyo bwakwe ubukalamba bwali bwa kwalula abena Ireland ku BuKristu, kabili mu kati ka myaka yakwe iya kushimikila no kubomba pa kati ka bantu, Patrick alipeelwo mucinshi wa kuti e waimike icitendekelo ce Calici lya ciKatolika kulya.
Umulimo wakwe walengele ukuti afike ku fifulo ifingi ukupulinkana cilya calo. Cimo ica ifyo fifulo cali ni ku masamba ya Ireland uko, ukulingana no tuli mbusha, apooseleko inshiku 40 akasuba no bushiku pa muulu wa lupili lumo ulo lwaishileinikwa ishina lyakwe, Croagh Patrick (icalola mu kuti “Akapili ka kwa Patrick”). E po aileleko kulya no kupepela ukutunguluka kwa mulimo wakwe.
Mu kupita kwa myaka imilumbe iingi yalipangwa pa lwa fintu apwishishishe. Umo uwa milumbe yalumbukisha wa kuti lintu aali pali lulya lupili, Patrick alitamfishe insoka shonse ukufuma mu Ireland.
Icishilano cicipampamika ukuti akuulile akalicalici kanono pa muulu wa lupili. Nangu cingati cilya cikuulwa tacabapo nomba pa myaka iingi, umufula wa kutendekelako ucilipo, kabili icifulo pamo pene no lupili fyaba ni ncende ya kucitilapo inyendo sha mipepele pa myaka iingi.
Imbali Isha Lwendo lwa Mipepele
Kuli umo uuli mu myaka yatantalila nelyo uushabelesha ukunine mpili, pa kupwisha fye ukutumbila bakilomita basano no kwika umutende waba mulimo ukalamba mu wine weka.
Pa fifulo fyacindama mu kashila, amabumba yengabomba mu kampampa yalaba ayaipekanya ukubomba ne fya kuicena fya misango misango.
Kwalibako ififulo fitatu, nelyo umwa kwiminina, lintu muli mu nshila umo abalendo ba mipepele bacite mibombele yalekanalekana iya cilapilo. Iyi mibombele ilalondololwa mu kukumanina pa cipampa ca fyebo apo batendekelo kunina.—Mona umukululo.
Mulandu Nshi Baninina?
Mulandu nshi abantu bafule fyo baila kuli ulu lwendo lwa mipepele ulwayafye fi? Mulandu nshi bambi bacishishamo lintu balenina?
Kwena, bamo basumina ukuti pa kupepa lintu bali pa lwendo lwa mipepele, ukulomba kwabo ukwa kumwenamo kwa pa lwabo mu kupalishako kuli no kumfwika. Bambi bacita cene mu kukonkelela ukulekelelwa pa kulufyanya kumo. Kuli bambi, iyi iba ni nshila ya kulangilamo ukutasha. Mu kushininkisha, abengi batemwako fye ulubali lwa kwangalila pamo. Uwa mu bulashi umo alandilepo ukuti kwali ‘kulumbulula kwa mupashi wa bwikashi no kutemwana kwa mu bwikashi.’ Na kabili atile ukunina Croagh Patrick “yali e nshila yabo iya kukonkela mu nkasa sha kwa St. Patrick no kwishiba imisha balya kuli wene mu citetekelo.” Alundileko kuti, icacilapo kucindama, ukunina waba “musango wa cilapilo pa mulandu wa kuti ukuibikilishako kwa ku mubili ukubimbwamo kwaba mibombele ya cilapilo iya cine cine. Ukunina kwakokomoka ukuyafika pa muulu yaba ni ncitilo yalepa iya kulanga ukupetama.”
Umwaume umo alandile mu cilumba ukuti aninine imiku 25! Atile acitile cene, “ku kucitako icilapilo!” Umwaume umbi alondolwele fye ukuti, “Ukwabulo kukalipwa, takuli bunonshi!”
Nangu cingatila tacaba icafwaikwa, abengi banino lupili ukwabule fya kufwala ku makasa. Mulandu nshi bacitile fyo? Ica kubalilapo, balanguluka umushili ukuba “uwa mushilo” e co bafuulilako insapato. Ica cibili, caba mu kumfwana no buyo bwabo ubwa ‘kucitako icilapilo.’ Ici na kabili cilangilila umulandu bamo bacitile mibombele ya cilapilo iya mu fifulo fya kwimininamo ukubomfya amakufi.
Ukuseshiwa ku Kutesekesha Kabumba
Lelo ni shani nga ca kuti umo taleakanako ukuyumfwa kwa balendo ba mipepele abanina ulupili pa bushiku bwaibela? Mu kuba ne miceele isuma ne nsapato ishashangila bwino, ulupili kuti lwaninwa pa nshita iili yonse. Ifwe tatwaninineko pa bushiku lintu cinkupiti waleenda uwa balendo ba mipepele alenina. Mu kati ka kwiminina kwesu ukwa libili libili ku kutuusha, twali na maka ya kubelebesha pa kunina kwine no kwambukila kwakwete pali cilya cinabwingi. Ukwelenganya amakana ya balendo ba mipepele ukupilikita pali uku kunina no kucita imibombele yalekanalekana iya cilapilo, twapatikishiwe ukulanguluko kuti, ‘Bushe ici e cintu Lesa afwaya? Bushe ukusefya kwa lutambi ukwa kunina nelyo ukwenda ukushinguluka ifyaimikwa fimo lintu ulepepa amapepo yasungilwa ku mutwe mu kubwekeshabwekeshapo mu cine cine cilakulila uuli onse mu kupalamina kuli Lesa?’ Ni shani pa lwa kufunda kwa kwa Yesu pali Mateo 6:6, 7 pa lwa mapepo ya cisosesose?
Mu kushininkisha, tatwaninine ulupili pa kukwatako ica kukumanya ca mipepele. Nalyo line, twayumfwile abapalamisha kuli Kabumba wesu pa mulandu wa kuti twalitesekeshe ububumbo bwakwe, impili ukuli konse ukuba ngo lubali lwa fipapwa fya pe sonde. Ukufuma pa muulu twali na maka ya kuipakisha ukumona ukwabulo kupumfyanishiwa ukwa mimonekele ya mpanga, no kumona fye na pantu umushili wakumanina na bemba mukalamba uwa Atlantic. Ifishi finono ifyalemoneka icibuutubuutu mu katoto mwi samba ku lubali lumo fyapusene mu kumonekesha ne citungu ca mpili icakalabana kabili icaumba icali bushilya.
Twatontonkenye ulwa mwa kwiminina mutatu. Twaibukishe amashiwi ya kwa Yesu umwine, lintu aebele abakonshi bakwe aba cine ukuti: “Pa kupepa, mwisosa cisosesose nga ’Bena fyalo; pantu batila ni ku fyebo fyabo ifingi bakomfwilwa.”—Mateo 6:7.
Twalishibe ukuti ulu lupili lwalisanguka ulubali lwa cishilano ico cakakilila amakana ya bantu mu kusefya kwa ntambi ukwapikana. Twalangulwike fintu ico capusene no buntungwa ubwalandilwe no mutumwa Yohane lintu atile: “Tunakile amafunde yakwe [aya kwa Lesa]. Kabili amafunde yakwe tayayafisha.”—1 Yohane 5:3.
Twaliipakishe ukutandala kwesu, ukusanshako no kunina ukuyafika pa Croagh Patrick. Catukuntile ukulolesha ku ntanshi ku nshita lintu umutundu wa muntu onse ukalubulwa ukufuma ku fishilano no kuba na maka ya kupepa Kabumba wa kutemwa uwe sonde “mu Mupashi na mu cine.”—Yohane 4:24.
[Akabokoshi pe bula 27]
Imbali Shikalamba Isha Lwendo lwa Mipepele
Umulendo uuli onse uwa fya mipepele uunina ulupili pa bushiku bwa St. Patrick nelyo mu kati ka nshiku cinekonsekonse, nelyo inshita iili yonse mu kati ka mweshi wa June, July, August na September, NO KUPEPA MU KATI NELYO MUPEPI NA KALICALICI ku kufwaya kwa kwa Papa pambi kuti aelelwa pa kusumina ukuya ku Kuyebelela no Kulye Ciimuno pa Kalume pene nelyo mu kati ka mulungu.
UMWA KWIMININA UMWA CISHILANO
Mwaliba “umwa kwiminina” mutatu (1) Pe samba lya capala akantotwa nelyo Leacht Benain, (2) Pa muulu, (3) Roilig Muire, intamfu imo ukutentemuka ku lubali lwa lupili ukwabela Lecanvey [itauni].
Apa Kwiminina apa Kubalilapo - LEACHT BENAIN
Uwa lwendo lwa fya mipepele enda imiku cinelubali ukushinguluke cibumbili ca mabwe ukupepa ba We Shifwe 7, ba Nakucelela Maria 7 ne Cisumino ca Basole umuku umo
Apa Kwiminina Palenga Bubili - PA MUULU
(a) Uwa lwendo lwa mipepele alafukama no kupepa ba We Shifwe 7, ba Nakucelela Maria 7 ne Cisumino ca Basole umuku umo
(b) Uwa lwendo lwa mipepele apepela mupepi na Kalicalici ku kufwaya kwa kwa Papa
(c) Uwa lwendo lwa mipepele enda ukushinguluka Akalicalici imiku 15 ukupepa ba We Shifwe 15, ba Nakucelela Maria 15, ne Cisumino ca Basole umuku umo
(d) Uwa lwendo lwa mipepele enda ukushinguluka [Umusengele wa kwa Patrick] Leaba Phadraig ukupepa ba We Shifwe 7, ba Nakucelela Maria 7 ne Cisumino ca Basole umuku umo
Apa Kwiminina Palenga Butatu - ROILIG MUIRE
Uwa lwendo lwa mipepele enda imiku 7 ukushinguluka icibumbili cimo na cimo ica mabwe ukupepa ba We Shifwe 7, ba Nakucelela Maria 7 ne Cisumino ca Basole umuku umo pa cibumbili cimo na cimo [kwabako ifibumbili fitatu] na mu kulekelesha ashinguluka Roilig Muire onse pantu apela imiku 7 no kulapepa.