Bakabilisha ba Bufumu Bacita Lipoti

“Tabalekele”

UKUTENDEKA mu nshiku sha kwa Yesu Kristu na batumwa bakwe, intungulushi sha fya mapepo balifika ukwalepa mu kwesha kwabo ukucilikila ukushimikila imbila nsuma iya Bufumu bwa kwa Lesa. Abatumwa mu kubwekeshabwekeshapo kabili mu kushininkisha ‘balikambishiwe’ (NW) ku balashi ba cikaya mu Yerusalemu ukuti “belandila mwi shina lya kwa Yesu.” (Imilimo 5:27, 28, 40) Nangu ni fyo, ubulondoloshi bwa Baibolo bulando kuti “icebo ca kwa Lesa calelunduluka; yalefushiwa apakalamba ne mpendwa ya basambi mu Yerusalemu.”—Imilimo 6:7.

Amakana yabili aya myaka pa numa tucili tulesanga intungulushi sha mapepo mu Israel abasonga abalashi ba cikaya ukucilikila umulimo wa Bena Kristu ba cine muli cilya calo. Pe samba lya kutitikisha kwa fibombelo fya mipepele ifyacishamo, mu November 1987, abalashi ba cikaya mu Tel Aviv, Israel, bakambishe baNte ukuleka ukulongana kwa Bwina Kristu pa Ŋanda ya Bufumu iyabela pe ofesi lya musambo ilya Watch Tower Society. Ili kambisho lyatendeke ukubomba mu October 1989. Pa kumfwila ilyo ikambisho, baNte balelonganina mu fikulwa fya kusonkela muli yo ncende pa myaka itatu ilintu Iŋanda yabo iya Bufumu yatwalilile ukukanabomfiwa.

Pali iyo nshita, umulandu waletelwe ku kusakamana kwa cilye ca mu Israel ica High Court of Justice. Iofesi lya kwa shimafunde uwa buteko lyapitulwike mu kupelulula ukwapeelwe ne Nte kabili lyabilishe ukuti takwali icali no kucincintila ukupaapaata kwabo pa mulandu wa mpatila ya fya mipepele iishaibipila iyabimbilwemo. E co, abalashi ba cikaya balipatikishiwe ukubweshamo ubupingushi, kabili Inte sha kwa Yehova mu nsansa balibwelele ku Ŋanda yabo iya Bufumu.

Bushe umulimo wa kushimikila icine ca Baibolo walibwelele ku numa muli iyo myaka? Nakalya! Pa nshita Iŋanda ya Bufumu yaiselwe, mwalimo ifilonganino fibili mu Tel Aviv ne bumba lye sambililo lya Baibolo ilyaibela mwi tauni lyapalemeko ilya Lod. Imyaka itatu pa numa, lintu Iŋanda ya Bufumu yaiswilwe na kabili, Inte sha kwa Yehova bafushiwe ukufika ku filonganino fine, kabili ibumba lipya ilye sambililo lya Baibolo lyalekumanina pa Beersheba.

Ukutanunuka mu Israel takwapelela fye ku mabumba ya ndimi shikalamba fye, iciArabic ne ciHebere. Kwalibako ukukonkomokelamo kwa balebeshi abengi ukufuma mu yali kale Soviet Union, e co Inte sha kwa Yehova abalanda iciRussian nomba bali abapamfiwa ukwakana imbila nsuma na bene. Ukulongana kwa mu ciRussian kulacitwa mu filonganino fitatu; ukucila pa bantu umwanda umo balibungene pali nomba line ku kulongana kukalamba ukwa mu ciRussian.

Ukwabulo kutwishika, intungulushi sha fya mapepo shikatwalilila ukwimina ukupepa kwa cine. Lelo bakabilisha ba Bufumu balatwalilila ukupashanya Abena Kristu ba mu mwanda wa myaka uwa kubalilapo abo, ukukanasakamana ukukaanya, “tabalekele ukusambilisha no kubila mwi tempele na ku myabo ukuti Yesu e Kristu.”—Imilimo 5:42.