Ifikuulwa fya Kupepelamo

YEHOVA alyeba Abena Kristu ba cine ukuti balelongana pamo pa kuti balesambilila no kukoseleshanya. (Heb. 10:23-25) Icikuulwa ca kubalilapo ico abena Israele abali abantu ba kwa Lesa balepepelamo, cali “cikuulwa ca mushilo.” (Ukufu. 39:32, 40) Pa numa ya myaka iingi, Solomone umwana wa kwa Davidi akuulile ing’anda nelyo itempele, ilyalengele Lesa acindikwe. (1 Isha. 9:3) Ilyo itempele Solomone akuulile balyonawile mu 607 ninshi Yesu talaisa pano isonde, abaYuda batendeke ukupepela Lesa mu fikuulwa ifyo baleita abati amasunagoge. Mu kupita kwa nshita, balikuulile itempele cipya cipya, kabili lyaishileba e cifulo cikalamba ica kupepelapo Lesa wa cine. Yesu alesambilisha abantu mu masunagoge na mwi tempele. (Luka 4:16; Yoh. 18:20) Limo alebasambilishisha na pa lupili.—Mat. 5:1–7:29.

² Pa numa ya mfwa ya kwa Yesu, Abena Kristu balelonganina mu fifulo fya cintubwingi na mu mayanda pa kusambilisha Amalembo no kukoseleshanya na ba bwananyina. (Imil. 19:8, 9; Rom. 16:3, 5; Kol. 4:15; File. 2) Limo Abena Kristu ba kubalilapo balelongana na mu bumfisolo pa kuti abalebacusha beishiba uko bali. Ukwabula no kutwishika, ababomfi ba cishinka aba kwa Lesa balitemenwe ukulongana pamo mu fifulo fya kupepelamo pa kuti ‘balesambilishiwa na Yehova.’—Esa. 54:13.

³ Na muno nshiku mwine, fwe Bena Kristu tulalonganina mu fifulo fya cintubwingi na mu mayanda ya ba bwananyina. Ilingi line tukumanina mu mayanda ilyo tushilaya mu mulimo wa mwi bala. Bamunyinefwe na bankashi abasumina ukuti tulekumanina mu mayanda yabo, bamona ukuti lipaalo nga nshi. Abengi abasumina ukuti tulekumanina mu mayanda yabo balanda ukuti balinonkelamo sana lwa ku mupashi.

ING’ANDA YA BUFUMU

⁴ Pa Ng’anda ya Bufumu, e po Inte sha kwa Yehova balonganina. Ilingi line, ba Nte bashita fye incende e lyo bakuulapo Ing’anda ya Bufumu, e lyo limo bashita fye icikuulwa e lyo baciwamya. Pa kuti belabomfya indalama ishingi ku kukuula Amayanda ya Bufumu, na pa kuti yalebomfiwa sana, limo ifilonganino ifingi fibomfya Ing’anda ya Bufumu imo. Mu ncende shimo, bamunyinefwe balonganina mu fikuulwa fya kusonkela. Nga bakuula Ing’anda ya Bufumu, nelyo nga bawamya ifintu ifingi ku Ng’anda ya Bufumu iyakuulwa kale, balapeela iyi ng’anda kuli Yehova. Lelo nga finono fye bawamyako, tabaipeela kuli Yehova na kabili.

⁵ Ing’anda ya Bufumu taifwile ukuba iya lulumbi pa kuti fye abantu balepapa nga baimona. Nangu ca kuti Amayanda ya Bufumu yalapusanapusana mu kumoneka ukulingana ne ncende bakuulilako, ico tuyakuulila, kulonganinamo. (Imil. 17:24) Na lyo line, Ing’anda ya Bufumu yonse ifwile ukuba iisuma ukulonganinamo, kabili ifwile ukuba pa ncende iisuma apo Abena Kristu bengalalongana bwino.

⁶ Aba mu filonganino fyonse ifya Nte sha kwa Yehova balasangula indalama ishibomfiwa mu kusunga bwino Ing’anda ya Bufumu iyo balonganinamo. Takuba ukusonkesha nelyo ukulombelesha indalama. Lelo mu Mayanda ya Bufumu mulaba akabokoshi ka misangulo umo abalelongana bengabika indalama sha kubomfya ku fifwaikwa pa Ng’anda ya Bufumu. Bonse abasangula indalama baitemenwa fye kabili bapeela ukufuma pa nshi ya mutima.—2 Kor. 9:7.

⁷ Bonse mu cilonganino balishiba ukuti cisuma ukusangula indalama no kubombako imilimo pa Ng’anda ya Bufumu pa kuti ilemoneka bwino. Ilingi line, eluda nelyo umubomfi utumikila e utantika ifya kuwamya Ing’anda ya Bufumu. Mu filonganino ifingi, amabumba ya mulimo e yabomba umulimo wa kuwamya Ing’anda ya Bufumu, kabili kangalila we bumba nelyo kaafwa e utungulula. Ing’anda ya Bufumu ifwile ukuba iya busaka mu kati na ku nse pa kuti ilemoneka ukuti ni ng’anda ya kwa Yehova iyo abantu bakwe balonganinamo.

⁸ Nga ca kuti pa Ng’anda ya Bufumu paba ifilonganino ifingi, baeluda muli ifyo filonganino balapanga Komiti ya Ng’anda ya Bufumu iya kulolekesha pa Ng’anda ya Bufumu ne cifulo conse. Aba baeluda e basala na munyinefwe uwa kuba kampanya wa iyi komiti. Iyi komiti ibombela pamo na baeluda ilyo ilelolekesha pa mulimo wa kuwamya Ing’anda ya Bufumu, kabili balashininkisha ukuti fyonse ififwaikwa pa Ng’anda ya Bufumu e po fili. Pa kuti uyu mulimo ule-enda bwino, ifilonganino fyonse fifwile ukulabombela pamo.

⁹ Nga ca kuti ifilonganino ifingi fibomfya Ing’anda ya Bufumu imo, baeluda balatantika ukuti ifilonganino filealula inshita sha kulonganinapo. Baeluda mu filonganino bafwile ukumfwana bwino no kulangulukilana pa kutantika inshita sha kulongana. (Fil. 2:2-4; 1 Pet. 3:8) Takufwile ukuba icilonganino icifwile ukulapingwilako ifilonganino fimbi. Kangalila wa muputule nga atandalila icilonganino cimo pali ifi, ifilonganino fimbi kuti fya-alula inshita ya kulongana muli uyo mulungu ukulingana no kukabila kwa cilonganino ico aletandalila.

¹⁰ Ing’anda ya Bufumu kuti yabomfiwa nga kuli icililo nelyo ubwinga, cikulu fye Komiti ya Mulimo iya Cilonganino yasuminisha. Nga kwaba uwalomba ukubomfya Ing’anda ya Bufumu, baeluda balakonka bwino bwino ifyo babeba kwi ofeshi lya musambo ilyo tabalamusuminisha.

¹¹ Nga ca kuti Komiti ya Mulimo iya Cilonganino yasuminisha bamo ukubomfya Ing’anda ya Bufumu, ifyo balecita pa Ng’anda ya Bufumu, fifwile ukulanga ukuti Bena Kristu ba cine. Tabafwile ukucita ifingakalifya aba mu cilonganino nelyo ifingaleta umuseebanya pali Yehova na pa cilonganino cakwe. (Fil. 2:14, 15) Iofeshi lya musambo kuti lyasuminisha no kuti Ing’anda ya Bufumu baibomfye ku masukulu pamo nga, Isukulu lya Bapainiya e lyo na Isukulu lya Butumikishi bwa Bufumu.

¹² Aba mu cilonganino balingile ukulacita ifilanga ukuti balicindika Ing’anda ya Bufumu. Ifyo bafwala, ifyo bamoneka ne mibele yabo fifwile ukulanga ukuti balicindika Yehova uo bapepa. (Luk. Mil. 5:1; 1 Tim. 2:9, 10) Nga tulekonka ifi twalandapo ninshi twalicindika ukulongana kwa Bwina Kristu.

¹³ Nga tulelongana, tatufwile ukucita ifingapumfyanya abanensu. Abana bafwile ukwikala na bafyashi babo. Kuti cawama nga ca kuti abafyashi ababa na bana abanono, baleikala apo bashingapumfyanya sana bambi nga balefwaya ukufumisha umwana pa nse, pa kuti bamusakamane nelyo ukumusalapula.

¹⁴ Bamunyinefwe abafikapo balabapeela umulimo wa kubomba bukapyunga mu Ng’anda ya Bufumu. Bafwile ukulamona ifilecitika no kwiluka ifyo balingile ukucitapo, kabili tabafwile ukuba abaifinya. Pa milimo babomba paba no kusengela abapya, ukulanga abacelelwe apa kwikala, ukulemba impendwa ya basangilwe ku kulongana, e lyo no kushininkisha ukuti mu Ng’anda ya Bufumu mulepita umwela. Limo bakapyunga balacinkulako abafyashi ukubika sana amano ku bana pa kuti bela-angalila pa cisebele, nelyo ukubutauka ilyo ukulongana takulatendeka na pa numa ya kulongana. Bakapyunga kuti baeba abafyashi cikuuku cikuuku ukuti bafumye umwana wabo pa nse nga ca kuti alepumfyanya sana abantu. Imilimo bakapyunga babomba ilalenga bonse banonkelamo mu kulongana. Cilawama nga ca kuti baeluda na babomfi batumikila e balebomba bukapyunga.

AMAKUULE YA MAYANDA YA BUFUMU

¹⁵ Mu nshita ya batumwa, Abena Kristu bamo balikwete sana ifyuma ukucila bambi. E ico umutumwa Paulo alembele ukuti: “Kube ukulingana, ifyapula pa fyo mukwete filunde pa finono ifikwete bambi, pa kuti na bo ifikapula pa fyo bakakwata fikalunde pa finono ifyo mukakwata, pa kuti kukabe ukulingana.” (2 Kor. 8:14) Na muno nshiku mwine, uku “ukulingana” kulabapo. Indalama isho aba mu filonganino mwi sonde lyonse basangula balashibika pamo pa kuti bashibomfye ku kukuula na ku kuwamya Amayanda ya Bufumu. Icilonganino ca kwa Lesa cilatasha sana pa misangulo aba bwananyina mwi sonde lyonse basangula, kabili aba mu filonganino ifinonkelamo muli iyi imisangulo nabo balatasha.

¹⁶ Iofeshi lya musambo e lyeba ifilonganino Ing’anda ya Bufumu iyo bafwile ukulalonganinamo. E balanda ilyo Ing’anda ya Bufumu ingakuulwa e lyo na po ingakuulilwa, kabili e balanda ilyo cingalinga ukuwamyako fimo ku Mayanda ya Bufumu ayakuulwa kale. Nga kwaba amasanso ayakalamba, iofeshi lya musambo lilapekanya ukuwamya Amayanda ya Bufumu ayonaike, e lyo limo no kuwamya na mayanda ya ba bwananyina ayonaike.

¹⁷ Iofeshi lya musambo lilabombela pamo na babomfi abaipeelesha ukubomba imilimo yalekanalekana pamo nga, ukushita incende ya kukuulapo Ing’anda ya Bufumu, ukupanga amapulani, ukupoka ifipepala ku buteko ifyo babasuminishishapo ukukuula Ing’anda ya Bufumu, ukukuula, e lyo no kuwamya ifyonaika ku Mayanda ya Bufumu. Apo mu fyalo ifingi Amayanda ya Bufumu ayengi yalefwaikwa, abantu abengi aba kubomba uyu mulimo nabo balefwaikwa. Bakasabankanya bonse ababatishiwa abengatemwa ukubombako uyu mulimo, balingile ukulemba formu ya kwipushishapo uyu mulimo no kupeela Komiti ya Mulimo iya Cilonganino babamo. Na bakasabankanya abashilabatishiwa nabo bene kuti babombako umulimo wa kukuula nelyo uwa kuwamya ifyonaika ku Ng’anda ya Bufumu iyo balonganinamo.

IFIKUULWA FYA KULONGANINAMO UKULONGANA KUKALAMBA

¹⁸ Ilingi line Abena Kristu ba kubalilapo balelongana mu mabumba ayanono. Lelo limo balelongana na mu ‘mabumba ayakalamba.’ (Imil. 11:26) Na muno nshiku mwine, abantu ba kwa Yehova balalongana mu mabumba ayakalamba pa kulongana kwa muputule no kwa citungu. Limo balonganina mu fikuulwa fya kusonkela. Lelo mu fyalo umushaba ifikuulwa fya kusonkela nelyo ifingalinga ukulonganinamo, tulaikuulila nelyo ukushita Ifikuulwa fya Kulonganinamo Ukulongana Kukalamba.

¹⁹ Limo balashita icikuulwa, e lyo baciwamya pa kuti tulelonganinamo ukulongana kukalamba. Lelo ilingi line bashita fye icifulo e lyo bakuulapo icikuulwa icipya. Ifikuulwa fya Kulonganinamo Ukulongana Kukalamba fimo fiba ifikalamba, e lyo fimbi fiba ifinono ukulingana ne ncende bakuulilako. Pa numa ya kupenda indalama ishingapooswapo, iofeshi lya musambo e limona icingawamapo, nampo nga kushita icikuulwa nelyo nga kukuula fye icipya.

²⁰ Iofeshi lya musambo lilasonta bamunyinefwe aba kulolekesha pa Cikuulwa ca Kulonganinamo Ukulongana Kukalamba. Balatantika ukuti aba bwananyina ababa mu miputule iilonganinapo balewamya ici cikuulwa lyonse, kabili balatantika no kuti pa numa ya myeshi 6 kuleba ukuwamya sana ici cikuulwa. Balawamya na fyonse ifyonaika. Kuti cawama nga ca kuti bamunyinefwe baleitemenwa ukubombako iyi milimo. E ico aba mu filonganino balakoseleshiwa ukubombako no mutima onse.—Amalu. 110:3; Mal. 1:10.

²¹ Limo Ifikuulwa fya Kulonganinamo Ukulongana Kukalamba balafibomfya ku fintu na fimbi pamo nga, amasukulu yalekanalekana aya Nte sha kwa Yehova, e lyo na ku kukumana kwaibela ukwa bakangalila ba muputule. Filya fine Amayanda ya Bufumu yaba fifulo fya kupepelapo Yehova, e fyo ne fifulo fya Kulonganinapo Ukulongana Kukalamba fyaba. Kanshi nga twaya mu kulongana pali ifi ififulo, imibele yesu, imifwalile, e lyo ne fyo tuiyemfya fifwile ukuba ifya mucinshi nga filya fine tucita nga twaya mu kupepa pa Ng’anda ya Bufumu.

²² Muli shino nshiku sha kulekelesha, abantu abengi tabashingashinga ukwisa mu cilonganino ca kwa Lesa. Ici cilanga fye apabuuta tuutu ukuti Yehova alapaala icilonganino cakwe. (Esa. 60:8, 10, 11, 22) E ico natuletungilila umulimo wa kukuula ifikuulwa fya kulonganinamo, kabili tulebombesha pa kuti ifi ififulo fileba ifya busaka, kabili ifyo twingatemwa ukulalonganinapo. Nga tulecita ifi, ninshi twalicindika ukulongana ukubeela muli ifi fikuulwa, ukulenga tulekoseleshanya maka maka ilyo tulemona ubushiku bwa kwa Yehova bulepalama.