Tulewamya Icifulo Cesu ica Kupepelapo

1. Cinshi Ing’anda ya Bufumu yabelako?

¹ Kwaba ifilonganino 94,000 ifya Nte sha kwa Yehova pe sonde. Ifilonganino ifingi balalongana ku kusambilila Baibolo no kubishanya kwa Bwina Kristu pa Ng’anda ya Bufumu, iyaba e cifulo ca kupepa kwasanguluka mwi komboni ilili lyonse.

2. Mulandu nshi cacindamina ukusunga Ing’anda yesu iya Bufumu iya busaka kabili iyapempenkana?

² Ukuwamya Ukupekanishiwa Lyonse: Umulimo ubombwa ku kuwamya Ing’anda ya Bufumu lyonse waba pa mulimo wacindama uwashila. Icitabo ca Abateyanishiwa pa mabula 61-2 citila: “Bamunyina bafwile ukucilanguluko kube shuko te kwafwilisha fye Ing’anda ya Bufumu mu fya ndalama lelo na kabili ukuitemenwa umulimo wabo mu kuisunge ya busaka, iyapempenkana ne yawamishiwa bwino. Konse mu kati na ku nse, Ing’anda ya Bufumu ifwile ukuba ica kwimininako calinga ukuteyanya kwa kwa Yehova.” Apo Ing’anda ya Bufumu ilabomfiwa imiku iingi cila mulungu, kufwile kwaba ukutantika kwa lyonse ukwa kuwamya no kulungisha. Ilingi line aba kuitemenwa mu cilonganino nelyo ifilonganino fibomfya Ing’anda ya Bufumu e basakamana iyi milimo. Nga filya cali mu nshita sha mu Baibolo, ababomfi ba kwa Yehova lelo bafwile ukuba no mukoosha wa ‘kucilike milale no kukoshe’ cifulo cesu ica kupepelapo.—2 Imila. 34:10.

3. Bushe ukuwamya kwa Ng’anda ya Bufumu kufwile ukuteyanishiwa shani, kabili ni bani bengawamyako?

³ Ukutantika kwa kuwamya Ing’anda ya Bufumu ukwa mulungu no mulungu kufwile ukubikwa pa cipampa ca fyebo. Amabumba ya masambililo ya citabo yonse yafwile ukulekanina ukuwamya Ing’anda ya Bufumu cila mulungu, ukukonka umutande wa fya kucita pa kuwamya uwatantikilwa kabela. Bonse abali na maka balekabila ukushukila ishuko lya kuwamyako Ing’anda ya Bufumu cila mulungu no kuipempenkanya. Abana na bo bene kuti bawamyako, pa kuti basambilile ukucindamika ishuko lya kubombela bambi. Lelo bafwile ukwangalilwa na bafyashi. Nga ca kuti pali ifilonganino fibili no kucilapo, e lyo ukutantika bwino kukabilwa sana pa kuti ukubomba ulu lubali lwacindama ulwa kupepa kwesu takuli fye pa bantu bancepela bamo bene lyonse.

4. Cinshi cingacitwa pa kuti icilonganino cishibe ifya kucita ilyo balewamya Ing’anda ya Bufumu?

⁴ Umutande wa fya kucita pa kuwamya kuti wabikwa mupepi na pabikwa ifya kuwamishako. Uyu mutande ufwile ukulondolola imilimo ya kucita cila mulungu, pamo nga ukupyanga no kuleka pa nshi palebeeka cila nshita, ukuwamya amawindo, ukukunta ulukungu, ukupoosa ifisooso, ukukolopa, no kuwamya amaglasi. Imilimo imo taikabilwa ukubombwa lyonse, tutile ukushinga amafuta ya ku mbao ku fipe fya mbao no kuwamya ifipuna monse monse, no kupukuta ifiko ku malaiti. Imiti yonse iya kubomfya pa kuwamya taifwile ukuba pa cifulo apengafika abana banono kabili ifwile ukulembwapo ishina bwino bwino. Pafwile paba no bulondoloshi ubwipi pa fya kubomfya uyo muti.

5. Bucindami nshi bwaba mu kucingilila amasanso, kabili fintu nshi ifikabilwa ukubebetwa mu nshita mu nshita? (Moneni umukululo pe bula 4.)

⁵ Ukucingilila amasanso pa Ng’anda ya Bufumu cifwile ukuba ica ntanshi. (Amala. 22:8) Pali ci, umukululo uli pe bula 4 nautantawila fimo ifilekabila ukubebetwa cila nshita pa kuti amasanso tayacitike.

6. Bushe umulimo wa kulungisha no kusakamana Ing’anda ya Bufumu wampanishiwa shani?

⁶ Ifya Kucita pa Kulungisha Ifya pa Ng’anda ya Bufumu: Baeluda e bashingamikwa ukulolekesha pa kulungisha ifya pa Ng’anda ya Bufumu. Ilingi line, eluda nelyo umubomfi utumikila alasontwa ku kwampanya umulimo. Alateyanya imibombele yonse iya Ng’anda ya Bufumu cila bushiku, ukushininkisha ukuti ili iya busaka kabili tapali ifyonaike no kuti ififwile ukubomfiwa mu kusungilila bwino Ing’anda ya Bufumu e po fili. Calicindama ukuti mu Ng’anda ya Bufumu na pa lubansa tapali ifingacena abantu. Nga ca kuti ifilonganino fibili no kucilapo fibomfya Ing’anda ya Bufumu imo ine, amabumba ya baeluda mu filonganino bafwile ukusonta komiti ya Ng’anda ya Bufumu iya kuteyanya ukusakamana icikuulwa ne cifulo. Iyi komiti itungululwa na mabumba ya baeluda. Kangalila wa muputule akapituluka mu misungile ya Ng’anda ya Bufumu no kutuma lipoti kwi ofeshi lya musambo.

7. (a) Cinshi cicitwa cila mwaka ku kushininkisha ukuti Ing’anda ya Bufumu ilesungwa bwino? (b) Fintu nshi fimo ifikabila ukubombelwapo mu nshita mu nshita? (Moneni umukululo pe bula 5.)

⁷ Ukuceta tonse utwaba pa Ng’anda ya Bufumu kulacitwa cila mwaka kabili lipoti ifwile ukutumwa kwi ofeshi lya musambo. Baeluda balashininkisha ukuti amapekanyo ya kusakamana imilandu yonse nayabombelwapo. Bakasabankanya kuti baebwa ukulungishako no kuwamyako fimo. Bonse bafwile ukupoosako amano ku kusakamana tonse utulekabila ukubombelwapo kabili bafwile ukwangufyanya ukusakamana imilandu ilekabila ukusakamanwa.

8. Bushe baeluda kuti balembela abalolekesha pa Makuule ya Mayanda ya Bufumu ku ofeshi ilyo caba shani?

⁸ Nga ca kuti baeluda balekabila ukupandwa amano nelyo ubwafwilisho pa fya milungishishe ne miwamishe ya Ng’anda ya Bufumu, kuti balembela iofeshi lilolekesha pa Makuule ya Mayanda ya Bufumu. Ici kuti casanshamo amafya yapala ukusuuma kwa mutenge nelyo ubwafya bwa mutonshi pa nshi na mu mutenge. Utumilale, ukulungisha kwa lyonse no busaka fyaba pa fya kuwamya lyonse ifibombelwapo ne cilonganino.

9. Mitantikile nshi tufwile ukukonka nga tulefwaya uwa kulembe ncito?

⁹ Ukubomfya Indalama sha Cilonganino Mano Mano: Mupepi ne milimo yonse pa Ng’anda ya Bufumu ibombelwapo na ba kuitemenwa. Ukuipeelesha baipeelesha e mo balangila ukutemwa kabili kulafwilisha ukucefyako sana ifipooswa. Nga kwaba ukukabila kwa kulemba aba kubomba umulimo, pamo nga ukwipaya utushishi nelyo ukupisha imipaipi ya menshi nelyo ifya malaiti malaiti, baeluda bafwile ukufwaya abanaka umutengo. Pa kucite ci bafwile intanshi balemba ubulondoloshi pa mulimo ulingile ukubombwa nelyo ifisolobelo ififwile ukushitwa. Kope ya fitantikwe kuti yapeelwa ku balefwaya ukulembwa incito abapusanapusana pa kuti bonse balanda umutengo ninshi nabeshiba na fyonse ifilekabilwa. Pa numa ya kupoka ukulandapo kwa balefwaya ukubombe iyi ncito, baeluda lyene kuti basalapo abanakile umutengo ukuti ebo babombe. Iyi e nshila ilingile ukukonkwa lyonse nelyo fye ni munyina alefwaya ukubombe ncito nelyo ukumushitisha ifilekabilwa ukubomfiwa pa mutengo wapampamikwa.

10. Cinshi cicitwa pa kushininkisha ukuti indalama sha cilonganino shilebomfiwa ukulingana ne mifwaile?

¹⁰ Nga paba ifilonganino fibili no kucilapo ifibomfya Ing’anda ya Bufumu, komiti ya Ng’anda ya Bufumu ifwile ukukwata akaunti yaibela kabili cila mweshi ifwile ukupeelako baeluda ba mu cilonganino cimo cimo lipoti wa ndalama, pa kuti baeluda baleishiba lyonse ifyo indalama shilebomfiwa. Baeluda e bashingamwa ukumona ukuti indalama sha cilonganino shilebomfiwa bwino.

11. Cinshi cifwile ukucitwa nga ca kuti kuli no kuba ukulungisha nelyo ukuwamya kukalamba?

¹¹ Ukulungisha Kukalamba no Kuwamya: Ilyo komiti ya Ng’anda ya Bufumu yatontonkanya ukuti pali icikalamba icilekabilwa ukucitwa ku Ng’anda ya Bufumu nelyo ukuilungisha, balebako amabumba ya baeluda pa kuti bapingule ifya kucita. Nga kuli no kuba ukulungisha kukalamba nelyo ukukuula cipya cipya nelyo ukuti kulekabilwa ukuba abakwafwa ukufuma ku filonganino fimbi ifishibomfyako Ing’anda ya Bufumu, baeluda bakalembela iofeshi lilolekesha pa Makuule ya Mayanda ya Bufumu, no kulondolola umulimo onse ulekabilwa ukubombwa. Aba bamunyina bafikapo, ababelesha balapeela imitubululo ibomba no butungulushi ku mulimo. Nga pali no kupooswa indalama ishingi, mulekabila ukulungika pa kupima indalama shilekabilwa no kupekanya ukusuminishanya pa kuti icilonganino cisuminisheko.—Moneni Umukululo wa Fipusho mu Ubutumikishi Bwesu Ubwa Bufumu ubwa February 1994.

12. Bushe kuti twalanga shani ukutasha pe shuko lya kulonganina pa Ng’anda ya Bufumu?

¹² Tulatasha nga nshi pe shuko lya kulonganina pa Ng’anda ya Bufumu! Shi twilekelesha apa kulonganina nelyo ukupapelula. Bonse kuti basangwilako ku kulongana pa Ng’anda ya Bufumu apo tukoseleshiwa ukupitila mu kubombesha ku kusunga bwino Ing’anda yesu iya Bufumu. Ukucite ci kulapuulamika ukupepa kwasanguluka kabili kuleta umucinshi kwi shina lya kwa Yehova. Natupampamine pa kusunga bwino icifulo cesu ica kupepelapo.

[Akabokoshi pe bula 4]

Umutande wa fya Kucingilila Amasanso

◻ Ifya kushimisha umulilo fifwile ukuba pa mulola kabili fifwile ukuceeceetwa limo pa mwaka.

◻ Pa minshi pafwile ukuba ulubuto lusuma, kabili tapafwile ukuba ifya kuipununako.

◻ Imiputule yonse ifwile ukuba iya busaka, iyapempenkana, kabili tamufwile ukuba ifintu ifingapya bwangu, ifipe fya pa lwesu ne fisooso.

◻ Umutenge ufwile ukuceeceetwa no kuwamishiwa lyonse.

◻ Imisebo ya kwendamo pa nshi na pa kubika bamotoka tapafwile ukuba ifingalenga ukushelemuka nelyo ukupona.

◻ Amalaiti yafwile ukuceeceetwa no kulungishiwa bwino kabili takufwile ukuba intambo shishikakilwe nelyo ukukulika icikuulwa ku malaiti ukwabula akampani kalolekesha pa malaiti ukuceeceeta ico cikuulwa.

◻ Nga kwaba ukusuuma ukuli konse ku mutenge bombelenipo bwangu pa kuti takulengele ubwafya bwa mutonshi.

◻ Ing’anda ya Bufumu ifwile ukukomwa nga tapali muntu

◻ Imipompi, imipaipi, ne fibomfiwa pa kuwamya fifwile ukusungwa bwino.

[Akabokoshi pe bula 5]

Ifya Kusakamana Icikuulwa ne Cifulo

◻ Ku nse: Bushe umutenge, imbao, penti, amawindo, ne cipampa apalembwa ati Ing’anda ya Bufumu iya Nte sha kwa Yehova fili bwino?

◻ Ulubansa: Bushe ulubansa lulemoneka bwino? Bushe utumisebo, ulubao, na pa kubika bamotoka pali bwino?

◻ Mu kati: Bushe ifipuna, amalaiti, imipaipi ya menshi, ifya kupuupa umwela, ifibumba, umwa kubika impapulo, ne miputule imbi fya busaka?

◻ Ifibombelo: Bushe ifisoselo filebomba fye bwino?

◻ Ifimbusu: Bushe fya busaka kabili bushe filabomba fye bwino? Bushe sopo e po ili?

◻ Ifyalembwa fya cilonganino: Bushe ififwaikwa mwi funde fyalisungwa bwino bwino bwino?