Ifipusho Ukufuma ku Babelenga

Bushe Lesa alelangisha akapaatulula pa kusala abaume aba mwi bumba litungulula ilya mu kubangilila abakwete icikulilo cimo cine ica mushobo no luko—apantu bonse baali abaYuda?

Iyo, mu kushininkisha talelangisha akapaatulula. Bonse abo Yesu aitile intanshi nga basambi bakwe baali baYuda. Lyene, pa Pentekoste 33 C.E., abaYuda ne nsangu abasembululwa bali e ba kubalilapo ukusubwa no kwisa mu mutande wa kuteka na Kristu mu muulu. Cali fye ni pa numa e lintu abena Samaria na Bena fyalo bashasembululwa balundilweko. E co, kuti caba icaumfwika ukuti ibumba litungulula pali ilya nshita lyapangilwe na baYuda, “abatumwa na ’bakalamba ku Yerusalemu,” nga fintu calumbulwa pa Imilimo 15:2. Aba balikwete umufula wa bwishibilo bwa Malembo uukalamba no kubelesha mu kupepa kwa cine, kabili bali nabakwata inshita ikalamba iya kulundulukila mu kuba baeluda ba Bwina Kristu bakosoka.—Linganyako Abena Roma 3:1, 2.

Ukufika pa nshita ya kulya kukumana kwe bumba litungulula ukwashimikwa mu Imilimo icipandwa 15, Abena fyalo abengi baali nabasanguka Abena Kristu. Aba basanshishemo abena Africa, aba ku Bulaya, na bantu ukufuma ku fitungu fimbi. Lelo, takwaba icalembwa ca kuti Abena fyalo abali bonse aba musango yo balilundilwe kwi bumba litungulula ku kulenga ubuKristu ukuba ubwa kucebusha ku bashali baYuda. Ilintu aba Bena fyalo abali Abena Kristu bateku bali filundwa fyalingana ifya “Israele wa kwa Lesa,” bafwile balicindike ukukosoka no kubelesha kwakulilako ukwa Bena Kristu abaYuda, pamo nga abatumwa, abali ulubali lwe bumba litungulula ku numa kulya. (Abena Galatia 6:16) Mona pa Imilimo 1:21, 22 fintu bacindikishe ukubelesha kwa musango yo.—AbaHebere 2:3; 2 Petro 1:18; 1 Yohane 1:1-3.

Pa myanda iingi iya myaka Lesa alibombele mu nshila yaibela no luko lwa Israele, ukufuma muli ulo Yesu asalile abatumwa bakwe. Tayali ni mpuso nelyo ulufyengo ukuti takwali umutumwa uwafumine mu caba nomba ni South America nelyo Africa nelyo Far East. Mu kupita kwa nshita abaume na banakashi ukufuma kuli ishi ncende baali no kukwata ishuko lya mu nshita ilya kunonka amashuko ayacishapo nga nshi na pa kuba umutumwa pe sonde, ukuba icilundwa ce bumba litungulula ilya mwanda wa myaka uwa kubalilapo, nelyo ukusontwa ukuli konse pa kati ka bantu ba kwa Lesa ilelo.—Abena Galatia 3:27-29.

Umutumwa umo aseshiwe ukulando kuti “Lesa taba na kapaatulula ka bantu, lelo uwa mu luko lonse uwamutiina no kubombo kulungama asekelelwa kuli wene.” (Imilimo 10:34, 35) Ee, ukumwenamo kwa cilubula ca kwa Kristu kwalibako kuli bonse, ukwabula akapaatulula. Kabili abantu umo umo ukufuma mu mukowa no lulimi no luko bakasanshiwamo mu Bufumu bwa ku muulu na mwi bumba likalamba ilikekala pe sonde kuli pe na pe.

Abantunse abengi balyangwako mu kucishamo ku fikulilo fya mushobo, ifya lulimi nelyo ifya luko. Ici calangililwa ku cintu tubelenga pa Imilimo 6:1 pa fikansa ifyalengele ukuŋwinta pa kati ka Bena Kristu ba ciGreek na ba balelanda iciHebere. Kuti pambi twakuliile nelyo twalyambulako ukwangwako kwacishamo ukwa ndakai pa lwa cikulilo ca lulimi, umushobo, umutundu, nelyo ubwaume no bwanakashi. Pa mulandu wa kuti ico mu cituntulu kuti cacitika, tulekabila ukubikako ukubombesha kwabamo umupampamina ku kuleka ukuyumfwa kwesu no kwankulako ukumumungwa ku mimwene ya kwa Lesa, iyaba ya kuti abantunse bonse balilingana pa ntanshi yakwe, te mulandu ne mimonekele yesu iya ku nse. Lintu Lesa alembele imilingo ya baeluda na babomfi batumikila, talumbwilepo umushobo ne cikulilo ca luko. Iyo, atontele pa kufikapo kwa ku mupashi ukwa abo pambi bengaitemenwa ukubomba. Ico e fintu caba kuli baeluda ba pa filonganino, bakangalila benda, na babomba pa misambo ilelo, nga fintu fye cali na kwi bumba litungulula mu mwanda wa myaka uwa kubalilapo.