“Ico Umuntu Mutuntulu Ashingacita”

“APANTU inkondo shitendekela mu mintontonkanya ya bantu, kanshi mu mintontonkanya ya bantu e mo tulingile ukwimike mincingi ya mutende.” (Ukusuminishanya kwa UN Educational, Scientific, and Cultural Organization) Mu kuba no ku kulondolola mu muntontonkanya, mu 1993 incenshi ukucila pali 500 abasangilwe ku kubungana kwa UN pa lwa kutuule fyanso balangulwike ulubali lwa fya mapepo mu kukuula imincingi ya musango yo.

Jonathan Granoff, uwaleimininako icipani ca Lawyers’ Alliance for World Security, e waletungulula pali uku kubungana. Atile: “Icipimo ca kukangana kwa ndakai ukwa pa mipepele ne mitundu cintu ico imibele ya kutumpuluka ishingacita, nakalimo cintu ico umuntu umutuntulu ashingacita.” Amashiwi ya kwa John Kenneth Galbraith yalyambwilwe mu kufika pa cishinka mu kati ka kubungana ukuti: “Abantu bafulilako balipaiwa mwi shina lya mipepele ukucila pa nkondo shonse na masanso ya fyabumbwa pe sonde ukufisansha pamo.”

Dr. Seshagiri Rao atile: “Bashiŋanga balingile ukulaposha te kusalanganya amalwele. Ifishilano fya mipepele tafilingile ukusalanganyo lupato no kukangana kwa lukaakala kuli umo no munankwe. Imipepele yabelapo ku kuba maka ya kuletako kuwikisha. Mu cituntulu nangu ni fyo, ilingi line yalibomba kabili yacili yalebomba nge ca kulekanya abantu.

Imyaka imo iyapitapo, Catholic Herald iya ku London yalandilepo ukuti umutende kuti washininkishiwa “nga amacalici ya lelo yengabilisha ukusenuka kwaikatana ukulwishe nkondo.” Nangu cibe fyo, iyi nyunshipepala yalundileko kuti: “Natwishibo kuti ici tacakatale acicitika.” Umushimbe mwanakashi umo uwa fya mapepo uwa ciKatolika inshita imo alandilepo kuti: “Fintu icalo cingaba icapusanako nga ca kuti ifwe twashibwike ulucelo lumo abapingulapo mu kukosa ukukanaibimba mu bulwi na kabili, . . . pamo fye nge Nte sha kwa Yehova!”

[Abatusuminishe Ukubomfya Icikope pe bula 32]

Tom Haley/Sipa Press