Bushe Kusefya kwa Ntambi Ukushabamo Bupilibulo?

INSAKALAMENTA ya cilapilo yalicitwa na baKatolika pa myanda ya myaka iingi. Nalyo line, ku bengi cibelesho fye icishabamo bupilibulo. Pa kwibukisha ifya ku bwaice bwakwe, umukalamba we sukulu lya ku sekondari uwe shina lya Bob atila: “Na lintu nali umupungwe, nshacikatamike.” Mulandu nshi? Kuli wene, icilapilo casangwike kusefya kwa ntambi ukushabamo bupilibulo. Alondolola ukuti: “Ukuya ku cilapilo kwali kwati kuleta ifipe fyobe fyonse ifyaisulamo amasambi ku muntu ulonde fipe ifileingila mu calo ku cibansa ca ndeke. Akwipusha pa lwa masambi yobe kabili lyene akupisha pa numa ya kusonkela ifipe fya busambashi ifyo washitile ilyo waile ku nse ya calo.”

Mu nshila imo ine, ilyo alembele muli U.S. Catholic, Frank Wessling alondolola icibelesho ca kuya ku cilapilo nge “ca kutungulula cayangushiwa nga nshi ica kukonkamo fye, ukufuma ku kubebeta amasambi yaseeka ukupitila mwi saali lyasungilwa ku mutwe ilya cilapilo ukufika ku kulapila kwa kabepekesho ukupitila mu kusefya kwa ntambi.” Cinshi Wessling asondwelele? Asoso kuti: “Ndi uwashininkisha ukuti ukuya ku Cilapilo cisuma ku mweo wa muntu. Lelo inshila baKatolika bacitilamo yena te sana.”

Baibolo yena ilanda pa kulapila mu nshila yapusanininako fye. Icakatamisha caba kulapila kuli Lesa. (Ilumbo 32:1-5) Kabili umusambi Yakobo alembele ukuti: “Bushe umuntu wa muli imwe nalwala? Ete abakalamba ba lukuta bese, na bo bapepe pali wene, no kumusubila amafuta mwi shina lya kwa Shikulu. E ico yasanineni imembu shenu no kupepelana, ukuti muposhiwe.”—Yakobo 5:14, 16.

Umwina Kristu uwafinininwa no lubembu kuti aita bakangalila ba mu cilonganino, abengamwaafwa pa lwakwe no kumupeelo kufunda kubomba ukwa mu Baibolo ku kwaafwa kacita wa fibi ukusha inshila yakwe iya lubembu. Bakangalila kuti bamukoselesha mu kulinga ilyo balebebeta ukupola kwa ulwele lwa ku mupashi. Fintu capusana no kusefya kwa ntambi ukwa kuya ku cilapilo ukwaba fye cibelesho ukucitwa mu macalici ilelo! Pa kuba uwakoshiwa no kwaafwa kwa baeluda ba mu cilonganino pa lwabo, bakacita wa fibi abalapila kuti banonka ukwilulukwa ukwayumfwile Davidi, nga fintu acilumbulwile mu ilumbo ati: “Namulengele ukwishibo lubembu lwandi, na ’mampuulu yandi nshafimbilepo; natile, Ndetumbulo bupulumushi bwandi kuli Yehova, e lyo imwe mwalekelele amampuulu ya lubembu lwandi.”—Ilumbo 32:5.