Ifipusho Ukufuma ku Babelenga

Bushe umusambi Yakobo aloseshe mwi lintu atile: “Mwe bamunyinane, mwiba bakafundisha abengi, pa kwishibo kuti tukapokelela ukupingulwa ukwacilamo”?—Yakobo 3:1.

Mu kushininkisha Yakobo taalefuupula Abena Kristu ifyo tabalingile ukusambilisha bambi icine. Pali Mateo 28:19, 20, Yesu akambishe abasambi bakwe ati “kalengeni aba nko shonse ukuba abasambi, . . . mulebasambilisha ukubaka fyonse ifyo namwebele.” E co, Abena Kristu bonse balingile ukuba bakasambilisha. Umutumwa Paulo afundile Abena Kristu abaHebere pa mulandu wa kuti baali tabalaba bakasambilisha. Alembele ati: “Pantu na ’po mufwile ukuba bakasambilisha pa mulandu wa kupite nshita, mucili mulekabila umo ukumusambilishe mitande ya kubangilila iya fyebo fya kwa Lesa.”—AbaHebere 5:12.

Cinshi, kanshi, Yakobo alelandapo? Alelanda pali abo abakwata amashuko yaibela aya kusambilisha mu cilonganino. Pa Abena Efese 4:11, tubelengapo ukuti: “Wene [Yesu Kristu, Umutwe wa cilonganino] apeele bamo ukuba abatumwa, na bambi ukuba bakasesema, na bambi ukuba ababile mbila nsuma, na bambi ukuba abacemi na bakasambilisha.” Kwali ififulo fya mashuko yaibela aya kusambilisha mu filonganino fya mu mwanda wa myaka uwa kubalilapo nga fintu fye caba na lelo. Ku ca kumwenako, Ibumba Litungulula limininako “umusha wa cishinka kabili uwashilimuka” kabili lyakwata icishingamo caibela ica kwangalila ukusambilishiwa kwa filonganino mu kusaalala kwa calo. (Mateo 24:45) Bakangalila benda na baeluda ba mu filonganino na bo bene balikwata ifishingamo fyaibela ifya kusambilisha.

Bushe Yakobo aleeba abaume ba Bwina Kristu abafikapo ukuti tabalingile ukupokelela ulubali lwabo ulwa kusambilisha pa kutiina ukuti epali bapokelela ukupingulwa kwa kwa Lesa ukwacilamo? Nakalya. Umulimo wa bueluda waba lishuko likalamba, nga fintu calangililwa na 1 Timote 3:1, apasoso kuti: “Umuntu nga atinamina bucilolo, mulimo usuma afwaya.” Icifwaikwa cimo ngo muntu ali no kusontwa nga eluda wa mu cilonganino ca kuti ali umwaume “uwakampuko kusambilisha.” (1 Timote 3:2) Yakobo tapilike amashiwi ya kwa Paulo ayapuutwamo.

Nangu cibe fyo, cilemoneko kuti mu mwanda wa myaka uwa kubalilapo C.E., bamo baleilaasa abene ukuba bakasambilisha, nangu ca kuti tabafikilepo kabili tabasontelwe. Napamo, baleyumfwa ukuti cilya cifulo calelenga ukulumbuka, kabili balekumbwa ukucindamikwa. (Linganyako Marko 12:38-40; 1 Timote 5:17.) Umutumwa Yohane alumbwile Diotrefe, ‘uwatemenwe ukubo wa ntanshi, lelo talepokelela icili conse ukufuma kuli Yohane.’ (3 Yohane 9) Timote wa Ntanshi 1:7 alanda pa lwa bantu bamo ‘abalefwayo kuba bakasambilisha wa Malango lelo abashailwike ifyo balesosa nangu ifyo balekonkomesha.’ Amashiwi ya kwa Yakobo 3:1 yaliba ayalinga nga nshi ku bantu abo abafwaisha ukuba bakasambilisha lelo abakwata inkuntu shalubana. Abantu ba musango yo kuti bacena umukuni icabipisha kabili kuti bapokelela ukupingulwa kwacilamo ukwabalinga.—Abena Roma 2:17-21; 14:12.

Yakobo 3:1 na kabili aba ca kucinkulako cisuma kuli abo abafikapo kabili ababa bakasambilisha. Apantu ifingi fyaliseekeshiwa kuli bene, fingi fikafwaikwa kuli bene. (Luka 12:48) Yesu atile: “Icebo conse ica cisosesose ico abantu basosa bakacilubulula mu bushiku bwa bupingushi.” (Mateo 12:36) Ici ca cine sana ukucilisha kuli abo amashiwi yabo yakwata ukusonga kwakulilako, baeluda basontwa.

Baeluda bakalubulwilapo pa nshila babombelamo ne mpaanga sha kwa Yehova. (AbaHebere 13:17) Cintu basosa cilambukila imyeo. E co, eluda alingile ukuba uwasakamana ukukanatwala pa ntanshi imimwene ya pa lwakwe no kuumyo lupaka pa mpaanga nge fyacitile abaFarise. Alingile ukutukuta ukulangisha ukutemwa kwashika kumo kwine uko Yesu alangishe. Ilyo lyonse alesambilisha, kabili maka maka lintu abimbilwe mu milandu ya bupingushi, eluda alingile ukupimununa amashiwi yakwe bwino, ukukanabomfya inumbwilo shabulo kulingulwila kabela nelyo ukulumbulula imfundo sha pa lwakwe fye. Ukupitila mu kushintilila na maka pali Yehova, Icebo cakwe, no kutungulula kwakwe ukupitila mu kuteyanya kwakwe, umucemi akapokelela ipaalo lya kwa Lesa ilyafumba, te “kupingulwa ukwacilamo.”