Abateyanishiwa nga Bakasambilisha wa Cebo ca kwa Lesa
‘Lesa alitufishapo ku kuba bakapyunga.’—2 ABENA KORINTI 3:5, 6.
1, 2. Matukuto nshi yacitwa limo pa lwa kushimikila, lelo mulandu nshi yashibombela?
BUSHE kuti mwaumfwa shani nga bamupeela umulimo uo mushafikapo ukubomba? Shi baleni tontonkanyeni pali ifi: Nabamupeela ifibombelo fyonse ifyo mulekabila ukubomfya, kabili namukwata ne fisolobelo. Lelo tamwishibepo nangu fimo pa fya kubomba uyo mulimo. Icabipisha ca kuti uyu mulimo ufwile ukubombwa mu kwangufyanya. Abantu bashintilile pali imwe. Mwandi kuti camukalifya!
2 Lelo ifi te fya kwelenganya fye. Ku ca kumwenako, inshita shimo amacalici ya mu Kristendomu yalesha ukuteyanya no kubomba ubutumikishi bwa ku ng’anda ne ng’anda. Ilingi, balafilwa ilyo baesha ukucite fyo pa milungu fye iinono nelyo imyeshi no kuleka. Mulandu nshi? Kristendomu tayafwa abantu bakwe ukufikapo ukubomba uyu mulimo. Nangu fye ni bashimapepo babo tabafikapo ukubomba uyu mulimo wa kushimikila, te mulandu ne myaka iingi iyo basambilila ku masukulu ya ku calo na ku maseminario. Mulandu nshi twingasosele fyo?
3. Pali 2 Abena Korinti 3:5, 6, lishiwi nshi lyalumbulwa imiku itatu, kabili lyalola mwi?
3 Icebo ca kwa Lesa cilondolola icifishapo kashimikila wa cine uwa mbila nsuma iya Bwina Kristu. Umutumwa Paulo apuutilwemo ukulemba ukuti: “Te kutila tuli abafikapo fwe bene ukulinge cintu ukuti cafuma kuli ifwe fwe bene; lelo ukufikapo kwesu kwafuma kuli Lesa; uo kabili atufishishepo ku kuba bakapyunga.” (2 Abena Korinti 3:5, 6) Moneni ishiwi ilyabwekeshiwapo imiku itatu—ishiwi lya kuti ‘ukufikapo.’ Cinshi lipilibula? Ulupapulo lwa Vine’s Expository Dictionary of Biblical Words lutila: “Lintu lyabomfiwa ku fintu [ili shiwi lya ciGriki] lipilibula ‘ifyakumanina’ . . . ; lintu lyabomfiwa ku bantu, lipilibula ‘abapwililila,’ ‘abawaminwa.’” E ico, ‘uwafikapo’ aba uwapwililila kabili uwawaminwa ukubomba umulimo apeelwa. Ca cine, abatumikishi ba cine aba mbila nsuma balifikapo ukubomba uyu mulimo. Balipwililila, ukufikapo, nelyo ukuwaminwa ukushimikila.
4. (a) Ica kumwenako ca kwa Paulo cilanga shani ukuti ukufikapo ukubomba ubutumikishi bwa Bwina Kristu te kwa bantu fye abanono abasoma? (b) Ni nshila nshi shitatu Yehova abomfya ku kutufishapo ukuba abatumikishi?
4 Lelo ni kwi uko kufikapo kufuma? Bushe kufuma ku mano yabo abene? Bushe kufuma ku mano yacila pa ya bantunse? Bushe kufuma ku masomo yaibela nelyo ku masukulu ya lulumbi? Umutumwa Paulo afwile alikwete fyonse ifi. (Imilimo 22:3; Abena Filipi 3:4, 5) Lelo, mu kuicefya atile ukufikapo kwakwe ukuba umutumikishi takwafumine ku masukulu ya pa muulu, lelo kwafumine kuli Yehova Lesa. Bushe ukufikapo kwa musango yo kwa bantu fye banono abasoma? Paulo alembele icilonganino ca bena Korinti pa lwa “kufikapo kwesu.” Ukwabula no kutwishika ico cilanga ukuti Yehova alashininkisha ukuti ababomfi bakwe bonse aba cishinka kuti bafikapo, ukuba na maka ya kubomba umulimo abapeela. Ni shani fintu Yehova afishapo Abena Kristu ba cine lelo? Natumone inshila shitatu isho abomfya: (1) Icebo cakwe, (2) umupashi wakwe uwa mushilo, na (3) ukuteyanya kwakwe ukwa pe sonde.
Icebo ca kwa Yehova Cilatufishapo
5, 6. Amalembo ya Mushilo yakuma shani Abena Kristu ba cine?
5 Ica kubalilapo, ni shani fintu Icebo ca kwa Lesa citufishapo ukuba abatumikishi? Paulo alembele ukuti: “Amalembo yonse yantu yapuutwamo kuli Lesa, kabili ya mulimo ku kusambilisha, ku kwebaula, ku kulungika, ku kufunda kwa mu bulungami; ukuti umuntu wa kwa Lesa abe uwapwililila, uwaiteyanya ku kubombo mulimo onse usuma.” (2 Timote 3:16, 17) E co Amalembo ya Mushilo yatwafwa ukuba ‘abapwililila, abaiteyanya’ ukubomba ‘umulimo usuma’ uwa kusambilisha abantu Icebo ca kwa Lesa. Lelo, ni shani pa lwa bonse ababa mu macalici ya Kristendomu? Balikwata Baibolo. Icitabo cimo cine kuti cayafwa shani abantu bamo ukufikapo lelo bambi bena iyo? Icasuko caba ku fyo tumona Baibolo.
6 Ku ca bulanda, abengi abaya ku calici tabasumina ubukombe bwa mu Baibolo nge ‘fyo bwaba icine cine, icebo ca kwa Lesa.’ (1 Abena Tesalonika 2:13) Kristendomu alipanga ishina libi ukukuma kuli ici. Bushe bashimapepo baliteyanishiwa ukuba bakasambilisha wa Cebo ca kwa Lesa pa numa ya kusambilila imyaka iingi mu masukulu yasambilisha ifya mipepele? Awe iyo. Abasambi bamo batendeka amasomo yabo aya ku seminario nga basumina Baibolo lelo ilyo balepwisha amasomo yabo ninshi balitendeka ukulengulula Baibolo! Pa numa, tabashimikila Icebo ca kwa Lesa—ico abengi nomba bashitetekela—lelo batendeka ukucita fimbi, ukulaitumpa mu mapolitiki, ukulaongola abantu Abena Kristu ukupitila mu kubapeela fimo ifya ku mubili, nelyo ukulalanda sana pa mano ya buntunse mu malyashi yabo. (2 Timote 4:3) Abena Kristu ba cine bena te fyo bacita, pantu bakonka ica kumwenako ca kwa Yesu Kristu.
7, 8. Ifyo Yesu asendele Icebo ca kwa Lesa fyapusene shani ne fyo bashimapepo ba mu nshiku shakwe bacisendele?
7 Yesu tasuminishe bashimapepo ba mu nshiku shakwe ukusonga ifyo aletontonkanya. Nampo nga alesambilisha akalibumba kanono, pamo nga batumwa bakwe, nelyo ibumba likalamba, Yesu alebomfya bwino amalembo ya mushilo. (Mateo 13:10-17; 15:1-11) Ici calimupaatwileko kuli bashimapepo abaliko pali ilya nshita. Balelesha abantuuntu fye ukubelenga ifyashika fya kwa Lesa. Na kuba, cali mwata kuli kasambilisha wa muli shilya nshiku ukusumina ukuti Amalembo yamo yalyafishe nga nshi ukumfwikisha ica kuti kasambilisha aali no kulanshanya fye yene no musambi atemwisha, kabili pa kusambilisha, aletepelesha fye ninshi naifimba ku mutwe. Balya bashimapepo baletiina ukulanshanya pa fintu fimo ifyaba mu Baibolo nga filya fine baletiina ukulumbula ishina lya kwa Lesa!
8 Ifi te fyo Kristu ali. Asumine ukuti abantu bonse balekabila ukusambilile “cebo conse icifuma mu kanwa ka kwa Lesa,” te bantu fye banono abasalwa. Yesu talefwaya ukupeela umulimo wa kusambilisha kwi bumba linono ilya basoma. Aebele abasambi bakwe ukuti: “Ico namweba mu mfifi, mukasose apabuutile; ne co mwaumfwa mu kutwi, mukabilikishishe pa muulu wa mitenge.” (Mateo 4:4; 10:27) Yesu alefwaisha ukwebako abantu abengi nga nshi pa kwishiba Lesa.
9. Abena Kristu ba cine babomfya shani Baibolo?
9 Icebo ca kwa Lesa e co tufwile ukubomfya sana ilyo tulesambilisha. Ku ca kumwenako, ilyo tulelande lyashi ku Ng’anda ya Bufumu iya Nte sha kwa Yehova, tacawama ukubelenga fye ifikomo fimo muli Baibolo. Tufwile ukulondolola, ukulangilila, no kulanga ifya kubomfya ilembo lilelandwapo. Ubuyo bwesu bwa kufumya ubukombe bwa mu Baibolo pa mapepala no kububika mu mitima ya balekutika. (Nehemia 8:8, 12) Baibolo na kabili ifwile ukubomfiwa ilyo kuli ukufunda nelyo ukwebaula. Nangu ca kuti abantu ba kwa Yehova balande ndimi shapusanapusana kabili bakuushiwe mu nshila shapusanapusana, bonse balacindika Icitabo capulamo pa fitabo fyonse—Baibolo.
10. Ubukombe bwa mu Baibolo kuti bwatwafwa shani?
10 Ubukombe bwa mu Baibolo bulakwata amaka ilyo bwabomfiwa no mucinshi wa musango yo. (AbaHebere 4:12) Bwalyalula imikalile ya bantu, pamo nga ukubalenga ukuleka ifibelesho fishili fya mu malembo ifya bulalelale, ubucende, ukupepa utulubi, bucakolwa, no kwiba. Bwalyafwa abengi nga nshi ukufuula ubuntu bwa kale no kufwala ubuntu bupya. (Abena Efese 4:20-24) Ca cine, nga twacindika Baibolo ukucila amano ya bantu yonse nelyo ifishilano, kabili twaibomfya na bucishinka, kuti yatulenga ukufikapo, ukuba abateyanishiwa nga bakasambilisha wa Cebo ca kwa Lesa.
Umupashi wa kwa Yehova Ulatufishapo
11. Mulandu nshi calingila ukwita umupashi wa mushilo uwa kwa Yehova ati “kaafwa”?
11 Ica bubili, natulanshanye pa mulimo wa mupashi wa mushilo uwa kwa Yehova, nelyo amaka yabomba, mu kutulenga ukuba abateyanishiwa. Tatulingile ukulaba ukuti umupashi wa kwa Yehova e maka yacilapo ayabako. Yehova alipeela Umwana wakwe uwatemwikwa ubulashi bwa kubomfya aya maka ya kutiinya ku kwafwa Abena Kristu ba cine bonse. E ico, Yesu alandile pa mupashi wa mushilo ukuti ni “kaafwa.” (Yohane 16:7, NW) Akoseleshe abakonshi bakwe ukulomba kuli Yehova ukuti abape ulya mupashi, ukubalaya ukuti Yehova ali no kubapeela umupashi.—Luka 11:10-13; Yakobo 1:17.
12, 13. (a) Mulandu nshi cacindamina ukupepela umupashi wa mushilo ku kutwafwa mu butumikishi bwesu? (b) AbaFarise balangile shani ukuti umupashi wa mushilo tawalebalenga ukucita kantu nangu kamo?
12 Tulingile ukupepela umupashi wa mushilo cila bushiku, maka maka ku kutwafwa mu butumikishi bwesu. Bushe aya maka yabomba kuti yatulenga ukucita cinshi? Kuti yamumunga imintontonkanya ne mitima yesu, ukutwafwa ukwaluka, ukulunduluka, no kupyanika ubuntu bupya pa bwa kale. (Abena Kolose 3:9, 10) Kuti watwafwa ukulundulula imibele yacindama iyapale ya kwa Kristu. Fwe bengi tulalanda amashiwi yaba pa Abena Galatia 5:22, 23 ku mutwe fye. Ifi fikomo fyalanda pa fisabo fya mupashi wa kwa Lesa. Ica kubalilapo kutemwa. Iyi mibele yalicindama mu butumikishi bwesu. Mulandu nshi?
13 Ukutemwa cintu cikalamba icitucincisha. Ukutemwa Yehova na bantu banensu kulenga Abena Kristu ba cine ukwebako bambi imbila nsuma. (Marko 12:28-31) Nga tatukwete ukutemwa, te kuti tufikepo nga bakasambilisha wa Cebo ca kwa Lesa. Moneni ubupusano bwali pali Yesu na baFarise. Ulwa kwa Yesu, Mateo 9:36 isosa ukuti: “Pa kumona amabumba, abekatilwe inkumbu; pa kuti bali abalulunkaniwa kabili abapaswa, nge mpaanga ishishaba na kacema.” Bushe abaFarise balemona shani abantu? Baleti: “Ibumba ili ilishaishiba Amalango lyalitiipwa!” (Yohane 7:49) Balya baFarise tabatemenwe abantu lelo babasuulile icine cine. Twamona ukuti umupashi wa kwa Yehova tawalebalenga ukucita kantu nangu kamo.
14. Ica kumwenako ca kwa Yesu ica kulanga ukutemwa mu butumikishi cilingile ukutulenga ukucita cinshi?
14 Yesu aleikatilwa abantu inkumbu. Alishibe ubucushi bwabo. Alishibe ukuti balecushiwa, bali abalulunkaniwa, kabili abapaswa nge mpaanga ishishaba na kacema. Yohane 2:25 atweba ukuti Yesu ‘aishibe icili mu buntu.’ Apo ali Cibinda wa Mulimo uwa kwa Yehova ilyo ifintu fyalebumbwa, Yesu aleumfwikisha sana imibele ya bantunse. (Amapinda 8:30, 31) Kulya kumfwikisha kwalikosha ukutemwa kwakwe. Uko kutemwa nakuletulenga ukushimikila! Nga twamona ifyo kuti twawamyako muli ici, natupepele umupashi wa mushilo uwa kwa Yehova lyene tucite ukulingana na mapepo yesu. Yehova akaasuka. Akatuma amaka yakwe ayashifilwa ukutwafwa ukuba nga Kristu, uwali uwafikapo nga nshi ukushimikila imbila nsuma.
15. Amashiwi ya pali Esaya 61:1-3 yalelanda shani pali Yesu kabili pa nshita imo ine ukusansalika bakalemba na baFarise?
15 Bushe ukufikapo kwa kwa Yesu kwafumine kwi? Atile: “Umupashi wa kwa Shikulu waba pali ine.” (Luka 4:17-21) Ca cine, Yehova e wasontele Yesu ukupitila mu mupashi wa mushilo. Yesu talekabila ukusambilishiwa ku bantunse nangu bamo. Bushe bashimapepo ba mu nshiku shakwe basontelwe no mupashi wa mushilo? Iyo. Kabili tabali abateyanishiwa ukufishapo Esaya 61:1-3, ilembo Yesu abelengele mu kupongomoka no kusosa ukuti lyalelanda pali wene. Shi belengeni ifyo fikomo, no kuimwena ukuti balya bakalemba babumbimunda na baFarise tabali abafikapo. Tabakwete imbila nsuma iya kubila ku balanda. Kabili ni shani fintu bali no kubila kuli bankole ukulubuka no kubwesesha ukumona ku mpofu? Lwa ku mupashi, abene bali impofu, abatekwa ubusha ku fishilano fya bantu! Ukupusana na balya bantu, bushe twalifikapo ukusambilisha bambi?
16. Nani uo abantu ba kwa Yehova lelo bacetekela ukuti e ubafishapo ukuba abatumikishi?
16 Ca cine ukuti tatwasambilila ku koleji nelyo ku yuniversiti ya mu Kristendomu. Tatwasontwa nga bakasambilisha ukufuma ku masukulu ya fya mipepele. Bushe ninshi kanshi tatwafikapo? Iyo! Ukusontwa kwesu ukuba Inte kwafuma kuli Yehova. (Esaya 43:10-12) Nga twapepela umupashi wakwe no kucita ukulingana na wene, tulafikapo nga nshi. Kwena, tatwapwililika kabili tulafilwa ukukonka sana ica kumwenako caimikwe na Kasambilisha Mukalamba, Yesu. Lelo, bushe tatutasha ukuti Yehova alabomfya umupashi wakwe ku kutufishapo no kututeyanya nga bakasambilisha wa Cebo cakwe?
Ukuteyanya kwa kwa Yehova Kulatufishapo
17-19. Ukulongana kusano ukwa cila mulungu uko ukuteyanya kwa kwa Yehova kuteyanya kutwafwa shani ukufikapo ukuba abatumikishi?
17 Nomba natulanshanye inshila yalenga butatu iyo Yehova abomfya pa kuti engatuteyanya ukuba bakasambilisha wa Cebo cakwe—abomfya icilonganino cakwe ica pe sonde, nelyo ukuteyanya, ukutukansha ukuba abatumikishi. Mu nshila nshi? Shi taleni tontonkanyeni pa kusambilisha uko tusambilishiwa! Mu mulungu fye umo, tulasangwa ku kulongana kwa Bwina Kristu kusano. (AbaHebere 10:24, 25) Tulalongana mu mabumba yanono pe Sambililo lya Citabo pa Cilonganino ku kuipakisha ukusambilila Baibolo ukubomfya icitabo ico twapokelela ukupitila mu kuteyanya kwa kwa Yehova. Ilyo tulekutika no kwasukapo, tulasambilishanya no kukoseleshanya. Tulasambilishiwa umo umo no kusakamanwa kuli kangalila we sambililo lya citabo. Pa Kulongana kwa Cintubwingi na pe Sambililo lya Ulupungu lwa kwa Kalinda, tulalya ifya kulya fya ku mupashi ifingi.
18 Isukulu lyesu ilya Butumikishi bwa Teokrasi lyapangilwa ku kutukansha ifya kusambilisha. Nga tulepekanya amalyashi ya busambi, tulasambilila ifya kubomfya Icebo ca kwa Lesa ku kusambilisha pa fintu fyalekanalekana. (1 Petro 3:15) Bushe mwalibala amupeelwapo ilyashi lyalelanda pa fintu mwalemona kwati mwalifishiba sana, ukusanga fye ukuti mwasambililako ifipya pali lyene? Ici cilacitika ilingi. Ukusambilisha bambi kulatulenga ukwishiba sana ilyashi. Nangu ca kuti tatulelandako amalyashi, kuti twasambilila ukuba bakasambilisha basuma. Tulamona imibele isuma mu musambi umo umo, kabili tulatontonkanya pa fya kupashanya iyo mibele.
19 Ukulongana kwa Mulimo na ko kwine kwabelako ku kututeyanya nga bakasambilisha wa Cebo ca kwa Lesa. Cila mulungu, tulaipakisha amalyashi yasuma, ukulanshanya, ne filangililo ifyapangilwa ku kutwafwa ukuwamyako ubutumikishi bwesu. Bushe tukalanda shani? Kuti twacita shani nga twasangwa mu mibele yaafya mu cifulo cesu ica kushimikilamo? Ni nshila nshi shimbi isha kushimikilamo ishabako isho tufwile ukubebeta na kabili? Cinshi cikatwafwa ukuba bakasambilisha basuma ilyo twabwelelamo kukutungulula amasambililo ya Baibolo? (1 Abena Korinti 9:19-22) Amalyashi ya musango yo yalalandwapo sana pa Kulongana kwa Mulimo. Amalyashi ayengi aya uku kulongana yafuma mu Ubutumikishi Bwesu Ubwa Bufumu, icibombelo na cimbi ico tupeelwa ku kutupangasha ku mulimo wesu uwacindama.
20. Kuti twanonkelamo shani mu kulongana kwa cilonganino no kulongana kukalamba?
20 Ukupitila mu kupekanishisha no kusangwa ku kulongana kwesu lyene no kubomfya mu mulimo wesu nga bakasambilisha ifyo tusambilila, tulakanshiwa nga nshi. Lelo kwaliba na fimbi. Twalikwata no kulongana kukalamba na mabungano—ifyabelako ku kutulenga ukuba abateyanishiwa ukuba bakasambilisha wa Cebo ca kwa Lesa. Kabili tulafwaisha ukukutikisha no kucita ifyo fine twafundwa!—Luka 8:18.
21. Bushinino nshi bulanga ukuti ukukansha tupeelwa kulabomba bwino, kabili ni ani tutasha pali ci?
21 Bushe ukukansha Yehova akansha kulabomba bwino? Natuimwene ifishinka. Cila mwaka, abantu abengi balafwiwa ukusambilila ifisambilisho fya kutendekelako ifya mu Baibolo no kwikala umwabela ifyo Lesa afwaya kuli bene. Impendwa yesu ilekula, lelo tapali nangu umo pali ifwe uulingile ukutashiwa pali ici. Tulingile ukumona bwino ifintu, nge fyo Yesu acitile. Atile: “Takuli uwingesa kuli ine, kano Tata uwantumine amukula.” Abengi aba ifwe tabasambilila kabili bantuuntu fye, kwati fye ni filya fyali abatumwa ba pa kale. (Yohane 6:44; Imilimo 4:13) Ukutunguluka kwesu kushintilila pali Yehova, uukulila aba mitima ya bufumacumi ku cine. Umutumwa Paulo alondolwele bwino ukuti: “Ine nalilimbile, Apolo alitapilile, lelo ni Lesa e wameseshe.”—1 Abena Korinti 3:6.
22. Cinshi tushilingile ukubela abafuupulwa pa lwa kubombesha mu butumikishi bwa Bwina Kristu?
22 Ca cine, Yehova Lesa alikumwako sana ku mulimo wesu uwa bukasambilisha wa Cebo cakwe. Limo limo kuti tulemona kwati tatwafikapo ukuba bakasambilisha. Ibukisheni ukuti Yehova e ukulila abantu ku mwine na ku Mwana. Ni Yehova e utufishapo ukushimikila ku bapya ukupitila mu Cebo cakwe, umupashi wakwe, no kuteyanya kwakwe ukwa pe sonde. Natwankule ku kukansha kwa kwa Yehova pa kubomfya ifintu fisuma ifyo alepeela ku kutulenga ukuba abateyanishiwa nga bakasambilisha wa Cebo ca kwa Lesa!
Bushe Kuti Mwayasuka Shani?
• Baibolo ituteyanya shani ukubomba umulimo wa kushimikila?
• Umupashi wa mushilo ubomba umulimo nshi mu kutufishapo ukuba abatumikishi?
• Ni mu nshila nshi ukuteyanya kwa pe sonde ukwa kwa Yehova kwamwafwa ukufikapo ukuba kabila wa mbila nsuma?
• Mulandu nshi twingabela abacetekela ukuti twalifikapo ilyo tulebomba mu butumikishi?
[Icikope pe bula 25]
Pamo nga kasambilisha wa Cebo ca kwa Lesa, Yesu alitemenwe abantu