Nani Afikapo Ukushimikila?
1 Ukukuma ku butumikishi, bushe mwaliyumfwapo ifyayumfwile Mose? Atile: “Mwe Shikulu, ine nshili muntu wa kulondolole fyebo, nangu ni ku kale, nangu apo mulelandila ku mubomfi wenu.” (Ukufu. 4:10) Nga ca kuti muyumfwa muli iyo nshila, nakalimo kuti mwakongamina ku kukwinda. Nalyo line, Yesu ’atukonkomeshe ukubila ku Bantu, no kushimikisha.’ (Imil. 10:42) E co ni shani fintu tuba bakashimikila bafikapo aba mbila nsuma?
2 Te cipimo ca masomo ya ku calo icilenga ukuti tube abafikapo mu butumikishi. Paulo atile “ukwitwa kwenu, . . . mwe bengi tamwali ba mano ku buntunse” no kuti “amano ya pano isonde buwelewele fye kuli Lesa.” (1 Kor. 1:26; 3:19) Yesu asalile abatumwa bakwe ukufuma mu bantu babomba incito—mupepi na bane baali balondo. Intungulushi sha mapepo isha cilumba shabamwene mu misuula ukuti bantu “abashasambilila kabili batuutu.” Ukubamwena mu fipimo fya ku calo, abatumwa tabafikilepo ukushimikila. Nalyo line, ilyashi lya kwa Petro ilyaluma ilyo apeele pa bushiku bwa pa Pentekoste lyakuntile 3,000 ukubatishiwa!—Imil. 2:14, 37-41; 4:13.
3 Yehova Eutulenga Ukuba Abafikapo Ukushimikila: Paulo abilishe ukuti: “Ukufikapo kwesu kwafuma kuli Lesa.” (2 Kor. 3:5) Yehova, Intulo ya mano, alisambilisha amamilioni ukushimikila icine ca Bufumu kuli bambi. (Esa. 54:13) Ukuluma kwa uyu mulimo no kusanduluka kwa uko kuti fyamonwa apantu 338,491 balibatishiwe umwaka wapwile pamo nga “bakalata wa kutasha” aba mweo. (2 Kor. 3:1-3) Twalikwata imilandu isuma iya kushimikila mu kushipa no kushininwa pa lwa fintu twasambilila ukufuma kuli Yehova.
4 Ukuteyanya kwa kwa Lesa kwalimika programu wa kukansha abatumikishi uwa mwi sonde lyonse. Ukupitila mu Malembo ne fya kwaafwa ukusambilila Baibolo ifyalekanalekana, tulasambilishiwa no kukanshiwa ku kuba ‘abapwililila, abaiteyanya’ ku kushimikila. (2 Tim. 3:16, 17) Abengi balicebushiwa ku kusambilisha kusangwa mu mpapulo sha Sosaite. Ku ca kumwenako, magazini wa ku Sweden alondolwele ukuti: “Icitetekelo cishimikilwa ne Nte sha kwa Yehova citungililwa na masomo ya mu Baibolo ayasumbukisha kabili ayengabelengwa mwi sonde lyonse.”
5 Mu kuba na makambisho yapeelwa mu kulongana kwesu kusano ukwa cila mulungu, programu wesu uwa kubelenga Baibolo ne sambililo, ukufunda mwi Isukulu lya Butumikishi bwa Teokrasi, ukwafwilishiwa na batumikishi bambi ababelesha, kabili icacilanapo, ukutungililwa kwa mupashi wa mushilo uwa kwa Yehova, kuti twaba abacetekela ukuti Yehova atumona ukuti twalifikapo ukushimikila. “Nga ba kwa Lesa, tulandila muli Kristu ku cinso ca kwa Lesa.”—2 Kor. 2:17.
6 Nga ca kuti twashukila ukukansha kwa teokrasi ukupayanishiwa na Lesa ukupitila mu kuteyanya kwakwe, tatwakwata umulandu wa kukwindila nelyo ukutiinishiwa. Kuti twashimikila kuli bambi mu buseko, ukuba abaebekeshiwa ukuti Yehova akapaala ukubombesha kwesu.—1 Kor. 3:6.