Ukubilisha Imbila Nsuma Ukwabula Ukuleka
1 Abena Kristu ba mu kubangilila babombele ubutumikishi bwabo mu kusakamanishisha. Luka ashimike ukuti: “Ubushiku no bushiku tabalekele ukusambilisha no kubila mwi tempele na ku myabo ukuti Yesu e Kristu.” (Imil. 5:42) Takuli nangu cimo, nelyo fye kupakaswa, icali no kubacilikila! (Imil. 8:4) Balandile icine kuli bambi ubushiku no bushiku.
2 Ni shani kuli ifwe? Ipusheni mwe bene amuti: ‘Bushe ndeiluka ipamfya lya nshita shino? Bushe nakongamina ku kutwalilila ukubilisha imbila nsuma ukwabula ukuleka?’
3 Ifya Kumwenako fya Muno Nshiku Ifya Kushimikila Ukwabula Ukuleka: Nkashi umo, uwalwala ubulebe, abikilwe kuli mashini wa kwafwilisha ukupeema. Taali na maka ya kuya ku Ŋanda ya Bufumu nelyo ukusangwa ku kulongana kukalamba. Lelo alyobelwe apakalamba no kubilisha imbila nsuma. Mu myaka yakwe 37 iya bulema, ali na maka ya kwaafwa abantu 17 ukusambilila icine! Ni shani fintu acitile ico? Nangu cingati tali na maka ya kuya ku mwinshi no mwinshi, cila bushiku alesanga inshila ya kushimikila mu lyashi fye kuli abo baleisa kuli wene.
4 Bamunyinefwe mu Bosnia balishomboka ne nkondo no kubulwa. Nangu ni fyo, lyonse balitwalilila ukushimikila kuli bambi. Mu Sarajevo bakasabankanya cila mweshi balalanda imbila nsuma kuli bambi pali avareji wa maawala 20, kabili umo umo alatungulula avareji wa masambililo ya Baibolo yabili. Te mulandu ne mibele babamo iyayafya, balashimikila no kusambilisha ukwabula ukuleka.
5 Abacaice na bo bene balalangisha ukupimpa mu butumikishi. Ulupwa lumo ulwa Nte mu Rwanda lwabikilwe mu muputule umo abashilika balepekanya ukubepaya. Ulu lupwa lwaipwishe insambu ya kupepa intanshi. Balisuminishiwe, kabili umwana mwanakashi umunono, Deborah, apepele mu kupongomoka ukuti: “Mwe Yehova, uno mulungu ine na Tata twashalike bamagazini basano. Ni shani tuli no kubwelelako kuli aba bantu ku kubasambilisha icine no kubaafwa ukusanga ubumi?” Pa mulandu wa citetekelo cakwe icakosa no kutemwa ubutumikishi, ulupwa lonse lwalipusunswike.
6 Ilelo, kuliko ukukabila kwa kupempwila ku kumona utushita twa kushimikilamo kuli bambi no kufwaya abo “abasontelwe ku kuya mu mweo wa muyayaya.” (Imil. 13:48) Ukulingana ne mibele ya cikaya, baeluda ba cilonganino balatantikila ukushimikila kwa mu mabumba pa nshita shalinga, nampo nga lucelo, icungulo kasuba, nelyo icungulo bushiku. Ifipande mu Ubutumikishi Bwesu Ubwa Bufumu ne mbali mu Ukulongana kwa Mulimo, ukulongana kwa muputule, na mabungano ya citungu filapeela imitubululo no kukoselesha ifya pa nshita yalinga ku kubombako mu mbali shalekanalekana isha kucitilo bunte ku Bufumu. Ukulunda kuli ici, bakangalila ba miputule na ba fitungu balakansha bakasabankanya mu kushimikila kwa mu musebo, ukubalanga ifya kubomba mu cifulo ca bukwebo, no kulondolola inshila shimbi isha kushimikilamo ukuli konse uko abantu bengasangwa. Ici conse cilekomaila pa kubilisha imbila nsuma ukwabula ukuleka!
7 Abatumwa ba kwa Yesu mu kushipa babilishe ukuti: “Twafilwa ukuleko kulande fyo twamwene no kuumfwa.” Ni shani fintu baali aba mukoosha te mulandu ne fipindami fyonse? Baipwishe Yehova ukubaafwa, kabili alibafwile, na “bonse baisushiwemo Umupashi wa mushilo, no kulande cebo ca kwa Lesa no kushipa.” (Imil. 4:20, 29, 31) Te onse wingapaalwa ne fya kukumanya fyawamisha mu butumikishi, lelo nga ca kuti mu cine cine twafwaya ukubilisha imbila nsuma ukwabula ukuleka kabili nga ca kuti twabombesha apakalamba ukucita ifyo lyonse, Yehova akatwaafwa.