Ku Ŋanda ne Ŋanda Ukwabula Ukuleka
1 Muli Israele wa pa kale, amalambo yalepeelwa cila bushiku. (Ukufu. 29:38-42) Umulilo wa pa cipailo wasungililwe uwayaka; ica kufutumuna cali “mununko wa kutontolola” uyo watemwine Yehova. (Ukufu. 29:18) Ilelo, twacincishiwa ‘ukutuula ilambo lya malumbo kuli Lesa, e kutila, icisabo ca milomo iitotele shina lyakwe.’ (Heb. 13:15) Mu cifulo ca kubomfya amalambo ayalondololwa mwi Funde, tupepa Yehova pa kulondolola amalumbo yakwe ukwabulo kuleka.—Esa. 43:21; Imil. 5:42.
2 Yesu Kristu, Inte yakulisha iyabalile ayenda pano isonde, atusambilishe ifyo twingatwalilila ukupepa kwasanguluka pa kuninika amalambo ya kutootela. Asambilishe abasambi bakwe ukuti kwaliko ipamfya ku bukombe bashimikile. Alishibe ukuti inshila yacilishapo kufumamo cimo ku kufika pa bantu ne mbila nsuma yali kulanda kuli bene pa kanwa nkati mu mayanda yabo. (Mat. 10:7, 12) E co tusango kuti abatumwa bakonkele ubutungulushi bwakwe ubwapuutwamo na bulesa ku kushimikila ukufuma ku ŋanda ne ŋanda.—Imil. 20:20.
3 Tacaba icapusanako ilelo. Nga basambi ba kwa Yesu, Abena Kristu ba cine balakonka ica kumwenako cakwe pa kushimikila imbila nsuma ukufuma ku ŋanda ne ŋanda. Nangu cingati kuti pambi twalengululwa no kupakaswa pali cene, amamilioni balisambilila icine kabili imyanda ya makana ya basambi bapya baleilunda ku mitande ye bumba likalamba cila mwaka, ukupeelo bushininkisho bwa kuti iyi e nshila ya kwa Yehova iya kupwilikishamo ukufwaya kwakwe. Uyo e mulandu wine twabela aba mukoosha mu butumikishi bwesu.
4 Ubunonshi bwa Kushimikila Ukufuma ku Ŋanda ne Ŋanda: “Lesa taba na kapaatulula . . . Uwamutiina no kubombo kulungama asekelelwa kuli wene.” (Imil. 10:34, 35) Ukuya mu kulungatika ku ŋanda imo na imo mu cifulo cesu ica kubombelamo mu kulengama kulangisha ukubulwa akapaatulula, ukupeela uuli onse ishuko lya mu nshita ukumfwa ubukombe bwa Bufumu lyonse. Mu kukonkapo abankulako balapokelela ukwaafwa kwa pa lwabo ukulingana no kukabila kwabo umo umo.
5 Mupepi na bakasabankanya bonse, ukusanshako abacaice, abakoloci, kabili nelyo fye ni abo abali abapya, kuti baakanamo mu mulimo wa ku ŋanda ne ŋanda. Muli iyi nshila umo na umo kuti “alumbula no kupusuka.” (Rom. 10:10) Ukwakanamo na bambi mu butumikishi bwa ku ŋanda ne ŋanda kulatuleeta capamo mu fikakilo fya kutemwa no kwikatana. Pa nshita imo ine, tulapeelwa ishuko lya mu nshita ku kulangisha ukushipikisha kwesu lintu twakumanya ukukanayangwako nelyo ukukaanya. Uku ukulangisha kwa pabuuta ukwa citetekelo cesu kutulenga ukube “ca kutamba,” icafwa abafumaluka ukwiluko kuti twalikwata imitantikile yateyanishiwa iya kusambilisha Baibolo no kuti kuti banonkelamo ukufuma muli yene. (1 Kor. 4:9) Fyonse mu kulengama filangisha ukuti Yehova alepaala umulimo wa ku ŋanda ne ŋanda kabili alebomfya wene ukulonganika ibumba likalamba ku “ŋanda” yakwe iya kupepa kwasanguluka.—Esa. 2:2-4.
6 Nomba, ukucila pa nshita iili yonse imbi mu lyashi lya kale, abantu balekabila ukumfwa ubukombe bwa Bufumu. Natutwalilile ukushimikila ukufuma ku ŋanda ne ŋanda ukwabula ukuleka ukufikila Yehova atila capwa. (Esa. 6:11) Ukucite fyo, tukalambulwa no buseko ubo bufuma mu kwakana mu butumikishi bwacindama kabili ubwa kunonsha ubwa ku ŋanda ne ŋanda muli iyi nshita ya mpela.—1 Kor. 15:58.