Ukushimikila ku Ng’anda ne Ng’anda

1. Cipusho nshi twingepusha ukukuma ku mulimo wa kushimikila ku ng’anda ne ng’anda, kabili mulandu nshi?

¹ Ulupungu lwa kwa Kalinda pali ilya nshita ulo baleita ati Zion’s Watch Tower ulwa July 1, 1893 lwalandile pa busuma bwa kushimikila ku ng’anda ne ng’anda ati: “Abaishiba bwino ukubila mbila ya Cine mu nshila shapusanapusana balasumina ukuti kampeni wa kushimikila ku ng’anda ne ng’anda uwa kupeela abantu icitabo ca MILLENNIAL DAWN, pali ino nshita, e nshila isuma nga nshi iya kusabankanishishamo Icine.” Inte sha kwa Yehova isonde lyonse fye e ko babeshibila. Lelo bushe ukushimikila ku ng’anda ne ng’anda kucili kwalicindama na pali lelo, apo mu fyalo fimo cilekoselako fye ukusanga abantu pa ng’anda?

2. Bushe ni kwi kwatampile umulimo wesu uwa kushimikila ku ng’anda ne ng’anda?

² Ukushimikila ku Ng’anda ne Ng’anda kwa mu Baibolo Kabili Kwalicindama: Ukushimikila ku ng’anda ne ng’anda kwafuma mu Malembo. Yesu aebele abasambi 70 ukuya babili babili ku mayanda ya bantu. (Luka 10:5-7) Tapakokwele sana ukufuma apo Yesu afwilile, Baibolo ilanda pa basambi bakwe ukuti: “Kabili cila bushiku mwi tempele na ku ng’anda ne ng’anda batwalilile ukwabulo kuleka ukusambilisha no kubila imbila nsuma.” (Imil. 5:42) Umutumwa Paulo na o wine ali uwacincila ukusambilisha ku ng’anda ne ng’anda.—Imil. 20:20.

3. Busuma nshi bwaba mu kushimikila ku ng’anda ne ng’anda?

³ Na muno nshiku ukushimikila ku ng’anda ne ng’anda na nomba kucili ni nshila yacindama nga nshi iya kusabankanishishamo imbila nsuma. Kulalenga ‘tulefwaya abayana’ mu mutima nteka kabili mu muyano. (Mat. 10:11) Abantu balakwata inshita pa ng’anda kabili kuti twalanda nabo natuteka no mutima. Ukulanda na bantu pa ng’anda pa mwabo, e kutila ukuumfwa ishiwi lyabo, ukumona ifyo balemoneka pa menso, no kumona ifyo pa ng’anda pa mwabo paba, kulalenga twailuka ifyo bengatemwa ukumfwa. Ilingi line kulatupeela ishuko lya kulanda na bantu pa nshita iitali.

4. Bushe finshi twingacita pa kuti tuleshimikila bwino ku ng’anda ne ng’anda?

⁴ Aluleni Inshita Mushimikila: Umutumwa Paulo aleiteulula pa mulandu wa “mbila nsuma.” (1 Kor. 9:23) Nalimo kuti twayalula inshita twatantika iya kushimikila pa kuti tuletandalila abantu ilyo baba sana pa mayanda, pamo nga mu cungulo, pa cibelushi na pa mulungu, nelyo pa holide. Lembeni apo mushisangile abantu, kabili pekanyeni ubushiku bumbi ilyo mukapitapo mu mulungu nelyo inshita imbi iyo mwingesapo ubo bwine bushiku.

5. Bushe finshi twingacita pa kuti abalwalilila nabo baleshimikila ku ng’anda ne ng’anda?

⁵ Na balwalilila nabo kuti bashimikila ku ng’anda ne ng’anda. Nalimo ico twingacita kupekanya ukulabasendako ku mayanda ayaba mupepi, pa kuti nabo babombako apapelele amaka yabo. Nkashi umo uwalepemashika sana nga aenda sana aleshimikila fye pa ng’anda imo mu maminiti 30. Lelo, alitemenwe nga nshi ilyo bamwebele ukubombela pamo na bakasabankanya bambi!

6. Mulandu nshi lyonse tulingile ukushimikila ku ng’anda ne ng’anda?

⁶ Na ino nshita tucili tulasanga ababa kwati ni mpaanga abengi mu mulimo wa ku ng’anda ne ng’anda. Kasabankanya umo ilyo ailekonkonsha pa ng’anda imo bamwebele abati: “Ingileni. Ni mwishiba. Nacilapepa kuli Lesa pa kuti atume umo uwa kunjafwa, tapalapita na nshita naumfwa fye mwakonkonsha ku ciibi. Lesa acumfwa ifyo nacilapepa, eco amutumina.” Ififuma mu kushimikila ku ng’anda ne ng’anda filangilila ukuti Yehova alapaala iyi nshila ya kusabankanishishamo imbila nsuma. (Mat. 11:19) Shi lyonse mwilalaba ukushimikila ku ng’anda ne ng’anda ilyo muli mu mulimo wa mwi bala.