Bushe Kuti Mwashimikilako mu Nshita ya Cungulo?
1. Ukulingana ne citabo cimo, ni nshita nshi Paulo aleshimikila ku ng’anda ne ng’anda?
1 Umutumwa Paulo aleshimikila sana ku ng’anda ne ng’anda. Icitabo citila, Daily Life in Bible Times calandapo ukuti, “aleshimikila ukufuma pa 16 hrs ukufika ubushiku.” Tatwaishiba bwino nga ca kuti ifi e fyo Paulo alecita lyonse, lelo twalishiba ukuti Paulo ali-itemenwe ukucita ifili ‘fyonse pa kuti ashimikile imbila nsuma.’ (1 Kor. 9:19-23) Ici casanshishemo ukutantinka bwino inshita ya kuya mu kushimikila ku ng’anda ne ng’anda pa kuti engasanga abantu abengi.
2. Mulandu nshi ukushimikila icungulo kwawamina?
2 Mu ncende ishingi, bakasabankanya balitemwa ukuya mu kushimikila ku ng’anda ne ng’anda ulucelo mu kati ka mulungu. Nga imwe ku ncende mwikalila, bushe kuti mwashimikila ulucelo? Painiya umo alandile pa cifulo ico ashimikilamo ukuti: “Calyafya ukusanga abantu pa mayanda mu nshita ya kasuba. Nomba icungulo abantu e lyo basangwa pa mayanda.” Ukushimikila mu nshita ya cungulo kuti kwatwafwa ukulashimikila sana ku baume. Ilingi line, abene ba ng’anda balasumina ukulanshanya nabo ilyo baletuusha. Nga mwamona ukutila kuti cawama ukushimikila icungulo, baeluda kuti batantika pa kuti mulekumana no kuya mu kushimikila.
3. Kuti twalanga shani ukuti tuleiluka ilyo tuleshimikila icungulo?
3 Muleiluka: Ilyo muleshimikila icungulo, calicindama ukulailuka. Ku ca kumwenako, nga mwamona ukuti pa nshita mwafika abene ba ng’anda bali ne fyakucita, limbi balelya, kuti cawama mwabeba ukuti mwalabwelelako inshita imbi. Nga na pafita, iminineni apa kuti abene ba ng’anda balemimona, kabili ilondolola bwangu no kulanda ico mwendele. Na kabili, cilawama ukubomba babili nelyo nge bumba pa kuti ilyo babili bali pa ng’anda imo, bambi balelolela abanabo lwa mupepi e lyo nga mulebomba mu musebo kuti cawama ukwiminina apabutile apalepita abantu. Mwilaya mu kushimikila ku mayanda ubushiku sana lilya abantu baleya mu kulaala. (2 Kor. 6:3) Nga ca kuti mu ncende mwikala te kuti mushimikile nga pafita, kuti muleshimikila mu nshita ya cungulo ilyo pashilafita.—Amapi. 22:3.
4. Busuma nshi bwaba mu kushimikilako mu nshita ya cungulo?
4 Amapaalo: Tulaipakisha sana ukushimikila nga tulesanga abantu aba kulanshanya nabo. Kabili nga tuleshimikila sana, e lyo tukakwata ishuko lya kwafwa bambi ukuti “bakapusuke no kwishiba bwino bwino icine.” (1 Tim. 2:3, 4) Bushe te kuti muleshimikilako mu nshita ya cungulo?