Bushe Mwalyeshapo Ubunte bwa mu Cungulo Bushiku?

¹ Ifwe bonse tulabekelwa mu kuba abasandulula mu mulimo wesu. Lubali lumbi, lintu tushili na maka ya kulobolola ifisuma, umulimo ulaba uwa kutendusha kabili uwa kufuupula. Ukubombesha kuti kwatulambula pa lwesu, kabili kwaba lipaalo. (Linganyeniko Lukala Milandu 3:10-13.) Kuti twabomfya ici cishinte ku mulimo wesu uwa kushimikila. Twalishiba ukufuma ku fintu twakumanya ukuti lintu twaya ku mwinshi no mwinshi kabili twalanshanya na bantu pa lwa Baibolo, tubwelela ku ŋanda abapembesulwa lwa ku mupashi. Tulayumfwa ukuti mu cituntulu natupwishishisha icintu cimo.

² Mu ncende shimo nomba cili icayafya nga nshi ukusanga abantu pa ŋanda mu maawala yamo aya kasuba. Amalipoti yalangilila ukuti mu fifulo fimo abantu tababa pa mayanda lintu twatandala inshita ya lucelo. Ifilonganino ifingi fyalibomba no bu bwafya ukupitila mu kutantika ubunte bwa mu cungulo bushiku, kabili balitunguluka. Bakasabankanya bashimika ukuti lintu batandala mu cungulo bushiku, abantu abengi balaba pa mayanda, kabili ilingi line balaba abatekanya no kufwaya ukukutika ku bukombe bwa Bufumu. Bushe mwalyeshapo ubunte bwa cungulo bushiku mu cifulo cenu ica kubombelamo?—Linganyeniko Marko 1:32-34.

³ Baeluda Teyanyeni Ubunte bwa mu Cungulo Bushiku: Mu ncende shimo ukukumana kwa mulimo wa mwi bala mu cungulo bushiku kwalyafwilishiwa bwino nga nshi. Kuti mwalanguluka bakasabankanya bacaice ababwela ukufuma ku sukulu mu cungulo kasuba na bakalamba abenuka ku ncito mu cungulo. Bakasabankanya bamo abashingaya mu mulimo wa mwi bala pa mpela sha mulungu balasanga ukuti ubunte bwa mu cungulo bushiku mu kati ka mulungu ni nshila ibomba kuli bene iya kubombako lyonse mu mulimo wa kushimikila.

⁴ Kwalibako imilimo yalekanalekana iyo mwingabombako mu bunte bwa mu cungulo bushiku. Kuti mwashimikila ku ŋanda ne ŋanda na bamagazini nelyo ukubomfya ulupapulo lwa kutambika ulwa uyo mweshi. Icungulo bushiku yaliba ni nshita yawamisha iya kutandalila abantu abashaciba pa mayanda lintu bakasabankanya bacitandala inshita ya kasuba nelyo pa mpela sha milungu. Na kabili kuti kwabako icifulo ca kubombelamo ica bunte bwa mu musebo icisuma, ukumulenga ukulanda na baleinuka ukufuma ku ncito. Abengi balasanga ukuti icungulo bushiku yaliba ni nshita yawamisha iya kucita ifipempu fya kubwelelamo kuli abo abasekelela.

⁵ Mube Abacenjela Kabili Abashilimuka: Ukuya mu kushimikila nga bwaila nelyo ilyo pafiita kuti kwaba ukwa busanso mu ncende shimo. Kuti caba icisuma ukwenda babili babili nelyo mu mabumba mu misebo umuli ulubuuto nga nshi no kutandalila amayanda nelyo ifikuulwa fyabamo amayanda uko mushininkishe ukuti kuli ukwacingililwa. Lintu mwakonkonsha pa ciibi, iminineni apo mwingamonwa, kabili muilondolole bwino bwino. Mube abeluka. Lintu mwamona ukuti tamutandele pa nshita yalinga, pamo nga ilyo ulupwa lulelya, mutile mukatandala pa nshita imbi. Ilingi line caliwamisha ukucitilo bunte bwenu mu maawala ya mu cungulo bushiku fye, ukucila ukutandala ubushiku sana, lintu abene mayanda baleipekanya ukuya mu kusendama.

⁶ Ilyo ‘tulebombela Lesa umulimo washila akasuba no bushiku,’ mu kushininkisha Yehova akapaala ukubombesha kwesu.—Ukus. 7:15.