Shimikileni Imbila Nsuma Apali Ponse

¹ Abena Kristu ba mu kubangilila bashimikile imbila nsuma apali ponse. Baali abapimpa ica kuti mu myaka fye 30 pa numa ya kubuushiwa kwa kwa Yesu Kristu, ubukombe bwa Bufumu bwali ‘nabubilwa ku cibumbwa conse ca mwi samba lya muulu.’—Kol. 1:23.

² Ababomfi ba kwa Yehova abapimpa aba pali lelo bakwata ubuyo bumo bwine ubwa kufika ku uuli onse uo bengafikapo mu kuba ne mbila nsuma iya Bufumu. Cinshi cingatwaafwa ukufika pali ubu buyo? Abantu abafulilako balebomba isha ncito inshita yonse kabili ilingi line tababa pa ŋanda lintu twayako. Nga ca kuti tabali ku ncito, ninshi limbi bali pa bulendo, bele ku kushita ifya kushitashita, nelyo fye ku kwangala. Ni shani fintu abayana muli bene balefikwapo no bukombe bwa Bufumu?—Mat. 10:11.

³ Bamo bashimikilwa pa fifulo fyabo ifya ncito. Nangu fye matauni yanono yalikwata icifulo ca bukwebo uko abantu abengi bawisha akasuba. Mu misumba ikalamba, abantu babomba mu maindastri nelyo mu maofesi na bekala mu mayanda yacingililwa nga nshi balepokelela ubunte—ku bengi ileba e nshita ya kubalilapo. Pa mpela sha milungu, bamo abashimikilwa lintu balekokoloka mu parka, mu fifulo fya kwangalilako, mu matenti ya kutuushishamo, nelyo pa mayanda ya babomba pa farmu nelyo lintu bemike bamotoka nelyo mu fifulo fya matuuka balisangwa ukuba abakongamina nga nshi ku mbila nsuma.

⁴ Bakasabankanya bafulilako balebombesha na maka ukushimikila mu fifulo fya cintubwingi, uko konse abantu bengasangwa. Pa kubalilapo, ishi Nte shayumfwile ishashimunuka kabili na kamwensomo pa mulandu wa kukanabelesha ukushimikila muli iyo nshila, kano fye ku ŋanda ne ŋanda. Bushe baleyumfwa shani pali nomba?

⁵ Munyina umo uwabelesha atila: “Kwalisumbamo ubutumikishi bwandi!” Umbi na o alundako ati: “Kunenga ukutontomesha.” Painiya umukokole atila: “Kwaliba kwa kusumbamo lwa ku muntontonkanya, lwa ku mubili, na lwa ku mupashi, . . . kabili ndetwalilila ukukula.” Kasabankanya umo alandapo kuti pali nomba alefika ku bantu abengi abashabala abalandapo ne Nte sha kwa Yehova. Abacaice na bo bene balyobelwa muli uyu mulimo wabamo kuipakisha. Umusepela wailumbulula uwine muli iyi nshila: “Cilawama pantu kulalanda na bantu abengi.” Umbi na o atila: “Ndeshalika impapulo shishaifulila isho nshabala shalikapo!” Ici conse cilecitika mu fifulo ifibombelwamo libili libili.

⁶ Bakangalila Benda Baletungulula: Pa kwishibo kuti “imibele ya pano isonde ilepita,” Sosaite pali nomba line yatubulwile ukuti bakangalila benda bateulule imitantikile yabo iya mulimo wa mwi bala iya mulungu no mulungu pa kuti abantu bafulilako nga nshi bengafikwapo ne mbila nsuma. (1 Kor. 7:31) Pa myaka iingi, bakangalila ba miputule batantike ukuti inshita ya lucelo mu kati ka mulungu ya kubombako umulimo wa ku ŋanda ne ŋanda, ilintu ifyungulo kasuba fyalebomfiwa ku fipempu fya kubwelelamo no kutungulula amasambililo ya Baibolo aya mu ŋanda. Mu ncende shimo, uku kutantika kucili kulabomba bwino. Mu ncende shimbi, finono fingapwishishiwa pa kubomba ku ŋanda ne ŋanda mu nshita sha lucelo shimo mu kati ka mulungu. Mu ncende sha musango yo, kangalila enda kuti apingulapo kuti mu lucelo babombe umulimo wa ku matuuka nelyo uwa mu musebo. Nelyo kuti pambi atantika ukuti amabumba yanono yaye mu kushimikila ukwabela amaofesi, amatuuka, uko bemika bamotoka, nelyo ififulo fya cintubwingi fimbi. Abantu abafulilako bali no kushimikilwa nga ca kuti bakasabankanya bali mu mulimo wa mwi bala babomfya inshita bwino nga nshi.

⁷ Amalipoti yalelangilila ukuti bakangalila benda na bakasabankanya bene nabatemwa nga nshi uku kuteulula. Amabumba ya baeluda ayafulilako yalilomba kangalila wa muputule ukukansha bakasabankanya bamo mu mbali sha mulimo ishilekabila ukusakamanwa pa mwabo. Caliba ica kwaafwa kuli aba bakasabankanya ukuya na kangalila enda ilyo alebomba lumo ulwa ishi mbali. Bene, mu kukonkapo, baliba na maka ya kukansha bambi. (2 Tim. 2:2) Ica kufumamo ca kuti, abantu bafulilako nomba balefikwapo ne mbila nsuma.

⁸ Kwena, tamulekabila ukupembelela fye lintu kangalila wa muputule akatandala ku kweshako ishi nshila shimbi isha kushimikilamo. Pe samba pali inshila shalekanalekana isho pambi shingabomba mu cifulo cenu:

⁹ Ubunte bwa mu Musebo: ‘Nga abantu bonse bele kwi?’ e fyo inshita shimo twipusha ilyo tuletandalila amayanda yashilimo bantu ulucelo mu kati ka mulungu. Bamo kuti basangwa baleshisha nelyo ukushita ifya kushitashita. Bushe mwalyeshapo ukulanda na bene ukupitila mu bunte bwa mu musebo? Lintu lwabombwa bwino, ulu lubali lwa butumikishi kuti lwaba ulwa kusandulula icine cine. Ukucila ukwiminina fye pa cifulo cimo mu kuba na bamagazini, cilacilapo kuwama ukutununuka abantu no kutendeka ukulanshanya kwa bucibusa. Te kuti cicitikeko ukushimikila ku uulepita onse. Landeni kuli abo abashileendesha, pamo nga balekumbwa ifya kushita mu matuuka, abali muli bamotoka bemikwe, nelyo abantu bali pa fitesheni. Pa kubalilapo, kuti mwabaposha fye muli bucibusa no kupembelela ukuti basuke. Nga ca kuti uyo muntu aali uwaitemenwa ukulanshanya, mwipusheni ifyo aletontonkanya pa mutwe umo uo mulemona ifyo uli no kumulenga uwa buseko.

¹⁰ Kangalila enda umo alaalike bakasabankanya 6 ukuya na wene capamo no mukashi wakwe mu bunte bwa mu musebo. Cinshi cafuminemo? Ashimiko kuti: “Lulya Lucelo Lwaweme cibi! Takwali ubwafya bwa kukanasanga abantu pa mayanda. Bamagazini 80 na matrakiti ayengi fyalishalikwe. Twalikwete ukulanshanya kwa kucincimusha ukwingi. Umo uwa bakasabankanya, uwalebomba umulimo wa mu musebo pa muku wa kubalilapo, afumishe umupu ati: ‘Naliba mu cine pa myaka iingi kabili nshaishibe cintu nalepusulwa!’ Ukufika pa mpela ya mulungu, bamagazini ba cilonganino abatuuleme balipwile.”

¹¹ Ilyo alebombela icilonganino cakonkelepo, uyu kangalila enda umo wine aebelwe ukuti bakasabankanya bafulilako balibombeleko ubunte bwa mu musebo ulucelo lumo lelo tabatungulwike nga nshi. Nkashi umo alandile fye ku bantu babili epela mu nshita yonse iyo bashimikile, apantu bonse bambi abo alekumanya balebutukila ku ncito. Kangalila enda atubulwile ukuti bonse bene babwelele kuli ulya musebo inshita imbi lulya lucelo. E fyo bacitile, kabili babombele ukufika akasuba pa kati. Nkashi uwalanshenye fye na bantu babili mu lucelocelo alibombele bwino nga nshi lintu babweleleko inshita imbi. Ashalike bamagazini 31 na mabroshuwa 15, alembele amashina na keyala ukufuma ku bantu 7, no kutampa amasambililo ya Baibolo aya mu ŋanda yabili! Bambi na bo mwi bumba balikwete ifya kufumamo fya kukoselesha mu nshila yapalako.

¹² Lintu mwasango muntu uwalangisha ubuseko, esheni ukulemba ishina lyakwe, akeyala, ne nambala ya lamya. Mu cifulo ca kumwipusha ukumupeela ifyo fyebo mu kulungatika, kuti mwatila: “Naipakisha nga nshi kuno kulanshanya. Bushe kuliko inshila imbi twingatwalililamo ukulanshanya pa nshita imbi?” Nelyo ipusheni amuti: “Bushe kuti nacita shani nga ndefwaya ukwisa ku ŋanda ku mwenu?” Abengi abepushiwa muli iyi nshila balasuminisha icipempu ca kubwelelamo.

¹³ Nga ca kuti mulelanda ku ulesekelela uwikala mu cifulo ca kubombelamo icapeelwa ku cilonganino cimbi, mufwile ukutwala ifyebo kuli ico cilonganino pa kuti bamunyina kulya bengakonkanyapo kulundulula ubuseko. Bushe ubunte bwa mu musebo kuti yaba ni nshila ya kufumamo cimo iya kwananishamo imbila nsuma mu ncende yenu? Nga ni fyo, pitulukeni mu cipande caleti “Ukusanga Abalesekelela Ukupitila mu Bunte bwa mu Musebo Ubufumamo Cimo” mu Ubutumikishi Bwesu Ubwa Bufumu ubwa July 1994. Lyene tantikeni ukuya mu bunte bwa mu musebo pa nshita yalinga iya kasuba iyo ili no kumulenga ukufika pa bantu abafulilako nga nshi.

¹⁴ Ukushimikila pa Fitesheni: Ulucelo lumo bapainiya bafulilako bapingwilepo ukushimikila ku bantu abalepembelela basi mupepi na pa koleji. Ilintu balelanshanya mu nsansa, kwalebako ubwafya. Lilya fye ukulanshanya kwawama, basi yaleisa, ukupwisha ukulanshanya mu kupumikisha. Bapainiya bapwishishe ubu bwafya pa kunina basi no kutwalilila ukushimikila ku balendo ilyo bali muli basi ukuya ku tauni. Cilya basi yafika, aba bapainiya baali no kubwela na yo, ukulashimikila ku banininemo. Pa numa ya nyendo shafulilako ukuya no kubwela, bapendulwike mu fya kufumamo fya kubombesha kwabo: Bamagazini ukucila pali 200 balishalikwe kabili amasambililo ya Baibolo 6 yalitampilwe. Abayendo bamo mu kuitemenwa bapeele akeyala kabo ne nambala ya lamya pa kuti bengatandalilwa ku ŋanda. Umulungu wakonkelepo, bapainiya balibwelele ku citesheni ca basi no kukonka inshila imo ilya babomfeshe akatanshi. Bashalike bamagazini 164 no kutampa isambililo lya Baibolo na limbi limo. Pa citesheni cimo umuyendo aninine muli basi no kwikala pa cipuna cimo fye icashelepo—mupepi na painiya. Aloleshe munyina kabili uku ninshi alemwentula no kumwentula atile: “Ninjishibo kuti mulefwayo kumpeela Ulupungu lwa kwa Kalinda.”

¹⁵ Bakasabankanya abengi balashimikila bwino nga nshi ilintu bali pa bulendo muli basi, ishitima, nelyo mu ndeke. Ni shani fintu mwingatendeka ukulanshanya no muyendo uwikele mupepi na imwe? Kasabankanya umo uwa myaka ya bukulu 12 atendeke fye ukubelenga magazini wa Loleni! muli basi, ukusubila ukubalamuna ubuseko bwa mukashana umupungwe uwaikele mupepi na wene pa kuti engafwaya ukwishiba. Calibombele. Umukashana amwipwishe cintu aalebelenga, kabili umusepela ayaswike ukuti aalebelenga pa lwa fya kupwisha amafya ayo abacaice balolenkana na yo. Alundileko kuti aalinonkelemo apakalamba muli cilya cipande no kuti na o wine cali no kumwaafwa. Mu buseko alipokelele bamagazini. Imisepela imbi ibili yalyumfwileko uko balelanshanya ica kuti na yo ine yalombele ukuipeelako aba bamagazini. Ku mulandu wa ici, namutekenya wa basi aimike motoka ku mbali ya musebo no kwipusha umulandu balefwaila nga nshi balya bamagazini. Lintu aebelwe umulandu, na o wine alipokeleko bamagazini. Kwena, ici conse nga tacacitike nga ca kuti kasabankanya wacaice taakwete bamagazini bafulilako aba kutambika abalangishe ubuseko!

¹⁶ Ukushimikila mu Mapuarka no mwa Kwimika Bamotoka: Ukushimikila mu maparka no mwa kwimika bamotoka ni nshila ishaiwamina iya kufikilamo pa bantu. Bushe mwalyeshako ukushimikila mu ncende ya kwimikamo bamotoka iyabela ku cifulo ca matuuka? Lyonse teekeni umutima pa kuti mumone ifishingulwikeko. Fwayeni umuntu uushipamfiwe nelyo uulepembelela muli motoka emikwe kabili esheni ukutendeka ukulanshanya kwa bucibusa. Nga ca kuti ukulanshanya kwatwalilila, fyantikenimo ubukombe bwa Bufumu. Esheni ukubomba pale pale lelo mu kuba na kasabankanya umbi lwa mupepi. Sengaukeni ukusenda icola cishaikulila, icatuukuka nelyo mu nshila imbi ukucebushisha ukusakamana ku co mulecita. Beni abashilimuka. Kuti caba bwino ukupoosa fye inshita iipi mu cifulo ca kwimikamo bamotoka cimo e lyo kabili ukuya kuli cimbi. Nga ca kuti umuntu talefwaya ukulanshanya na imwe, mu mucinshi fumenipo no kufwayako umbi uwa kulanda na o. Pa kubomfya ishi nshila, munyina umo ashalike bamagazini 90 mu mweshi umo ilintu aleshimikila umwa kwimika bamotoka.

¹⁷ Abantu bamo balaya ku parka ku kukokoloka; bambi baya kulya ku kwangala nelyo ukuba fye na bana babo. Ukwabula ukupumfyanya sana ifyo balecita, fwailisheniko amashuko ya kubashimikililamo. Munyina umo atendeke ukulanshanya na kasunga we bala lya parka no kusango kuti aali uwasakamikwa pa lwa miti ikola ne nshita ya ku ntanshi iya bana bakwe. Isambililo lya Baibolo ilya mu ŋanda lyalitendekwe kabili lyaletungululwa lyonse muli ulya parka.

¹⁸ Ubunte bwa mu Lyashi mu Ncende sha Matuuka: Ilintu tacaba lyonse icayanguka ukushimikila mu nshila ya lyonse kwi tuuka ne tuuka pa mulandu wa fibindo ifilesha ukucite fintu fya musango yo, bakasabankanya bamo balasangako amashuko ya mu nshita aya kushimikila ubunte bwa mu lyashi. Balekalako pa cipuna no kutendeka ukulanshanya na bantu bambi abaleisa ku kutuusha. Lintu kwabako ubuseko, mu kushilimuka balatambika trakiti nelyo magazini no kwesha ukupangana uko bengakumana na kabili. Pa numa ya kupoosa baminiti banono ukushimikila mu ciputulwa cimo, balaya kuli cimbi no kutendeka ukulanshanya no muntu umbi. Kwena, kulingile ukubako ukusakamana ukukanacebusha icimpungili cishakabilwa lintu tuleshimikila ubunte bwa mu lyashi muli iyi nshila.

¹⁹ Pa numa ya kuposha umuntu, tendekeni ukulanshanya mu nshila ya bucibusa. Nga ca kuti uulemukutika ayankulako, mwipusheni icipusho, lyene kutikeni mu kusakamanishisha ilyo aleilumbulwila. Beni abasekelela nga nshi mu co alesosa. Langisheni ukuti namukatamika ifyo alelanda. Apo cakabilwa, musuminisheni.

²⁰ Nkashi umo alikwete ukulanshanya kushaiwamina no mwanakashi wa cikoloci pa kulanda fye pa fyo imitengo isumbene pali lelo. Umwanakashi alisumine mu kwangufyanya fye, kabili ukulanshanya kwacincimuka kwalitendeke. Nkashi alilembele ishina na keyala ka mwanakashi, kabili alibweleleko ulya wine mulungu.

²¹ Ukubomba kwi Tuuka ne Tuuka: Ifilonganino fimo fyakwata ifitungu fya makwebo ukuba ulubali lwa cifulo cabo ica kubombelamo. Munyina asakamana icifulo ca kubombelamo kuti apekanya amakardi apalengwa bamapu baibela aba ishi ncende shafulishamo ifya makwebo. Bamapu bakwetepo amayanda na matuuka balingile ukulengwapo mu kumonekesha ukuti ififulo fya makwebo tafili no kubombelwapo ngo lubali lwa cifulo ca kubombelamo. Mu fifulo fimbi, amatuuka kuti yabombelwapo capamo na mayanda. Baeluda kuti balaalika bakasabankanya bafikapo ukubomba mu fifulo fya matuuka cila nshita pa kuti umulimo wa kwi tuuka ne tuuka taulabilweko.

²² Nga ca kuti mwalaalikwa ukubombako uyu mulimo lelo tamwabala amuubombapo, inshila isuma iya kubelamo ‘abapama’ kutala mwabomba mu matuuka yanono; lyene, lintu mwaicetekela, kuti mwabombela mu yakulileko. (1 Tes. 2:2) Ilyo mulebomba kwi tuuka ne tuuka, fwaleni filya mwingafwala nga mulesangwa ku kulongana pa Ŋanda ya Bufumu. Nga cingacitika, ingileni mwi tuuka ilyo mushili abaleshita abalepembelela ukubashitisha. Ipusheni nga mwingalandako na maneja nelyo umwine wa cifulo. Beni aba cikabilila, kabili pali fyonse, ipifyeni. Tacilekabilwa ukulombo bwelelo. Aba makwebo abengi balitemwa aba kushita e co tabasakamikwa nangu babapumfyanya.

²³ Pa numa ya kuposha uwa makwebo, kuti mwatila: “Bashimakwebo balikwata ifya kucita ifingi nga nshi ica kuti tabasangwa sana pa mayanda, e co tulemutandalila kuno kuntu mubombela ku kumuletela magazini wa kubelenga umusuma nga nshi.” Lyene landenipo mu kwipifya pali magazini muletambika.

²⁴ Nelyo kuti mwaesha ici lintu mulelanda kuli maneja: “Natumona ukuti bashimakwebo balafwaisha nga nshi ukwishiba ifingi. Magazini wa nomba line uwa Ulupungu lwa kwa Kalinda (nelyo Loleni!) akwete icipande iciletwambukila ifwe bonse pa lwesu.” Londololeni ico cipande, kabili sondweleleni pa kusoso kuti: “Tuli abashininkisha ukuti muli no kuipakisha ukubelenga cene.”

²⁵ Nga ca kuti kuliko ababomfi, kabili cilemoneka ukuba icalinga, kuti mwalundako kuti: “Bushe kuti mwansuminisha ukwebako ababomfi benu ifyebo fimo fine mu kwipifya?” Nga mwasuminishiwa, ibukisheni mutile mu kwipifya, kabili maneja alamwenekela ukucita ico cine fye. Nga ca kuti ababomfi bamo balefwaya ukutantalisha ukulanshanya, kuti cacilapo kuwama ukubatandalila ku ŋanda ku mwabo.

²⁶ Pali nomba line, bakasabankanya mwi tauni linono baile na kangalila wa muputule mu mulimo wa kwi tuuka ne tuuka. Bakasabankanya bamo baali no mwenso pa kutendekelako, apo umulimo wali uupya kuli bene; lelo mu kwangufyanya balitekele umutima no kutendeko kuipakisha wene. Ilyo ne awala limo lishilapwa, balandile ku bantu 37 no kushalika bamagazini 24 na mabroshuwa 4. Munyina umo alandilepo kuti ilingi line mu mweshi umo ilyo balebomba ku ŋanda ne ŋanda, tabaali na maka ya kulanda ku bantu bafula nga balya balandileko ilyo balebomba kwi tuuka ne tuuka mu nshita yaipipishe fyo.

²⁷ Ukusangako Amashuko ya Kushimikilamo: Yesu tapeleshe fye ukushimikila kwakwe ku tushita twashininkishiwa. Aanenye imbila nsuma pa kashita akali konse akalinga. (Mat. 9:9; Luka 19:1-10; Yoh. 4:6-15) Moneni fintu bakasabankanya bamo balecita pa kusangako amashuko ya mu nshita aya kushimikilamo.

²⁸ Bamo caba cibelesho kuli bene ukushimikila ku bafyashi abalepembelela abana babo mupepi na pa mwinshi we sukulu. Apantu abafyashi abengi bafika palya mupepi na baminiti 20 ilyo abana bashilainuka, kulabako inshita ya kubengisha mu kulanshanya kwabamo kucincimuka pa lyashi lya mu Malembo.

²⁹ Bapainiya abengi balafwaisha ukufika pa bantu abengakwata ubuseko bwaibela mu mutwe wa lyashi umo uwalandwapo muli bamagazini besu. Ku ca kumwenako, nkashi umo alipokelelwe bwino pa kutandalila amasukulu 6 ayaba mu cifulo cakwe ica cilonganino mu kuba ne fipande fyakonkene ifyaleti “Amasukulu mu Bwafya,” ifyali muli Loleni! wa January 8, 1996. Na kabili atandalile abasakamana amafya ya ndupwa mu kuba na bamagazini abalelanda pa ndupwa no kucenda abana kabili alilaalikwe ukubwelelako na bamagazini ba ku ntanshi abakakwata imitwe yapalako. Ukwankulako apokelele pe ofesi lilolekesha pa fya ncito ukukuma kuli Loleni! wa March 8, 1996, uwalelanda pa kubulwe ncito kwalondolwelwe ukuti kwali “ukwapulamo.”

³⁰ Kangalila wa citungu ashimiko kuti wene no mukashi wakwe lyonse balashimikila ubunte bwa mu lyashi ilintu baleshita ifya kushitashita. Baya mu kushita pa nshita lintu ituuka lishikwata sana abantu, na muli fyo aba kushita balayendela mu muteekatima. Bashimika ukuipakisha ukulanshanya kushaiwamina ukwingi.

³¹ Mu misumba ikalamba imo bakasabankanya balashimika ifya kufumamo fisuma ilintu baleshimikila ku bantu basangwa mu malandule. Tabasha fye bamagazini lintu pashili muntu. Ubuyo bwabo kufika ku bantu ne mbila nsuma, e co balatukuta ukulanda pa kanwa nkati na abo abalebomfya icikuulwa.

³² Mu fifulo fimo, bakasabankanya basoobolwa balipeelwa insambu sha kushimikila pa fibansa fya ndeke. Inshita shimo shimo, balisangamo ubuseko mu kushimikila ku bayendo bafuma ku fyalo fimbi ukwaba abantu ba kwa Yehova abanono fye. Abalangisha ubuseko, balatambikwa trakiti nelyo bamagazini.

³³ Nga ca kuti calibindwa ukushimikila ku bekala mu mayanda uko balonda sana mu cifulo ca kubombelamo ica cilonganino, bamo caba cibelesho cabo ukushimikila mu kushilimuka kuli bamalonda bali pa ncito nelyo kuli bamaneja baba mu maofesi. Inshila imo ine e ibomfiwa na ku fifulo fya pa mbali, ifyakwata impongolo. Kangalila wa muputule na bakasabankanya abanono batandalile ififulo 7 ifya mayanda ya munkulinkuli ukubomfya iyi ine nshila. Pa cifulo cimo na cimo, baleeba maneja ukuti nangu cingati tabasuminishiwa ukutandalila yalya mayanda mu nshila ya lyonse, tabalefwaya wene ukupusa ifyebo fya muli bamagazini bapya. Bamaneja pa fifulo fyonse 7 mu buseko balipokele bamagazini no kulomba ukuti bakabatwalile na baali no kukonkapo! Abekashi ba filya fifulo lyene balashimikilwa ukupitila muli lamya.

³⁴ Ibikilisheniko ku Kushimikila Apali Ponse: Ukwikala umwabela ukuipeela kwesu cisanshamo ukwishiba ukuti umulimo wesu uwa kushimikila ubukombe bwa Bufumu uli uwe pamfya. Pa kuti twingafika pa bantu pa nshita iili iyalinga kuli bene, tulekabila ukuipusulako fimo pa kuti ‘mu misango yonse tupusushisheko bamo.’ Ababomfi ba kwa Yehova bonse abaipeela bafwaya ukuba na maka ya kusosa, nge fyasosele umutumwa Paulo ukuti: “Ifintu fyonse ncitile mbila nsuma, ukuti mbe uwa kukumako.”—1 Kor. 9:22, 23.

³⁵ Mu kulundapo Paulo alembele ukuti: “E ico ndetakisho kucisha no kucankwa mu fya kunaka fyandi, ukuti amaka ya kwa Kristu yekale pali ine. . . . Pantu ilyo nanaka, e lyo naba na maka.” (2 Kor. 12:9, 10) Mu mashiwi yambi, takuli uuli onse uwa ifwe uwingapwishishisha uyu mulimo mu bukose bwakwe bwine. Tulekabila ukupepa kuli Yehova ukutupeela umupashi wakwe uwa mushilo uwakwatisha amaka. Nga ca kuti twapepela ubukose ukufuma kuli Lesa, kuti twaba abashininkisha ukuti ali no kwasuka amapepo yesu. Lyene ukutemwa kwesu ukwa bantu kuli no kutusesha ukufwayafwaya amashuko ya mu nshita ku kushimikila imbila nsuma kuli bene, ukuli konse uko bengaba. Mu mulungu uleisa, mulandu nshi uwa kukanaeseshapo imo iya mitubululo yalandwapo muli cino ica mu kati?