Bomfya Bamagazini Besu Bwino nga Nshi
1 Lintu wapalamina apo bashitishisha amanyunshipepala, cinshi umona? Bamagazini. Pe tuuka lya pa cifutu ca musebo, cinshi cikucebusha? Bamagazini. Cinshi cilenga uutwala amelu ukukongosa lintu asendele umufuko wa melu uwafina? Bamagazini. Na muli ifyo, cinshi abantu abengi balebelenga? Bamagazini. Ukufwailisha kwalangisha ukuti imisepela 9 muli 10 iya pa kati ka myaka 10 ukufika kuli 18, na maperesenti yamo yene aya bakalamba, balabelenga nangu fye magazini umo cila mweshi. Icalo caliba icayangwako pa lwa bamagazini.
2 Bushe kuti twalenga abantu ba mitima ya bufumacumi ukuba abayangwako ku Ulupungu lwa kwa Kalinda na Loleni!? Ee, nga ca kuti FWE BENE tuli abayangwako ku Ulupungu lwa kwa Kalinda na Loleni! Cinshi cingatwaafwa? Languluka iyi mitubululo:
◼ Belenga Bamagazini: Kangalila wenda umo asosele ukuti, pali avareji, ni kasabankanya fye umo muli batatu mu muputule wakwe e ubelenga Ulupungu lwa kwa Kalinda ululi lonse ulwafuma na Loleni! ukufuma ku nkupo ukufika ku nkupo. Bushe ulabelenga? Ilyo ulebelenga icipande cimo na cimo, ipushe we mwine auti, ‘Nani engatasha ukukwatako ifi fyebo—bushe ni nyina, uushasumina muli Lesa, shimakwebo, umusepela?’ Muli magazini wa pa lobe, shila icishinka cimo nelyo fibili ifyo wingabomfya ilyo uletambika magazini. Lyene tontonkanya pa lwa fintu wingabimbulo buseko mu cintu ulelandapo muli sentensi umo nelyo babili.
◼ Kwata Orda Washininkishiwa uwa Magazini: Lembesha bamagazini ulefwaya ukulapokelela kuli munyina uubombela kuli bamagazini pa kuti ukakwate impendwa ya makope iyashininkishiwa iya lwafuma lumo na lumo. Muli iyi nshila, iwe no lupwa lobe mukalakwata bamagazini lyonse kabili abakumanina.
◼ Tantika Ubushiku bwa Magazini Ubwa Lyonse: Ifilonganino ifingi fyalisalapo ubushiku bumo ubwa kuya fye mu bunte bwa magazini. Bushe kuti watungilila Ubushiku bwa Magazini ubwa cilonganino cenu? Nga te ifyo, esha ukubomfya inshita ya mu mulimo mu tushita mu tushita ku bunte bwa magazini ubwa mu musebo no kutwalila fye abantu, ku ŋanda ne ŋanda nelyo ku bapokako magazini lyonse.
◼ Ba Uwayangwako pa lwa “Ulupungu lwa kwa Kalinda” na “Loleni!”: Sendako bamagazini lintu uli pa lwendo nelyo ulyo uleshita. Batambike ku bantu ubomba na bo, ku bena mupalamano, abanobe ba pa sukulu, nelyo bakafundisha. Kwalibako abaupana bamo abo ilingi line benda ne ndeke ababomfya icishinka cimo muli magazini mupya ku kubalamuna ukulanshanya no muyendo wikele mupepi na bo. Baliipakisha ifya kukumanya ifisuma ifingi. Abacaice bamo lyonse balasenda ku sukulu ifipande ifyo baleyumfwa ukuti fili no kwimya ubuseko bwa bakafundisha nelyo abasambi banabo. Sendako bamo ilyo uleya mu kushitako ifya kushitashita, kabili batambike ku basulwishi pa numa wapwisha umulimo obe. Fwe bengi tulashita amafuta ya muli motoka lyonse; mulandu nshi tushingatambikila bamagazini ku babomba pa cifulo ca kunwenseshapo amafuta? Babike apo wingababuula bwangu lintu balupwa batandala, lintu uleenda muli bamotoka ba cintubwingi, nelyo lintu ulepembelela fimo. Bushe kuti watontonkanyapo utushita tumbi utwalinga?
◼ Pekanya Ifyebo Ifipi Ifya Kusosa pa Kutambika Magazini: Tantika ukulanda fye ifinono, lelo ukufilanda bwino. Ba uwacincimuka. Cebusha umutima. Ba uulungatika. Tolamo itontonkanyo limo mu cipande, lilumbulule mu mashiwi ayanono, kabili tambika magazini. Inshila isuma iya kutambikilamo yaba kwimya icipusho pa lwa mutwe umo uwa kulengo buseko kabili lyene ukutungulula ku cipande icilepeela icasuko ca mu Malembo. Languluka ifya kumwenapo finono ifya fintu ici cingacitwa:
3 Nga ulelangilila icipande pa lwa misoka ilesumbana, kuti pambi waipusha ukuti:
◼ “Cinshi cikakabilwa pa kuti twingalasendama mu mutalalila ukwabula umwenso wa misoka?” Mwine ŋanda pambi te kuti enekele ukuti ifintu fikawaminako. Kuti wayasuko kuti abantu abengi bayumfwa mu nshila imo ine no kulundapo ukuti nukwata ifyebo fimo ifyo ulecetekele fyo kuti fyamulengo buseko. Lyene losha ku cishinka calinga ica mu cipande.
4 Lintu uletambika icipande cilelanda pa lwa bumi bwa lupwa, kuti pambi watila:
◼ “Abantu abengi basange fyo caliba bwafya icine cine ukusanga umwa kuliila no kukusha ulupwa shino nshiku. Ifitabo ifingi pa lwa uyu mulandu fyalilembwa, lelo nelyo fye ni ncenshi tashisuminishanya pa lwa cingaba ukupikulula ku mpika shesu. Bushe kwaliba kuntu twingaya nga tulefwaya ubutungulushi bwashintililwapo?” Lyene losha ku fyebo filandilwepo muli magazini ifilelangilila amano yasangwa muli Baibolo.
5 Pa kulangisha icipande cilelanda pa lwa mpika sha fya kwangalila capamo kuti pambi wabomfya iyi mitununukile:
◼ “Abantu abengi nabatitikishiwa ilelo. Tacali kufwaya kwa kwa Lesa ukuti tuleikala muli iyi nshila.” Lyene langisha fintu ifyebo fyashimpwa pali Baibolo mu cipande fingatwaafwa ukubomba ne mpika sha mu bumi nomba no kutupayanishisha isubilo lya kupikulula kwa cine cine ukwa ku ntanshi.
6 Ubunte bwa mu Musebo bwa Maka: Cali ni muli Informant (Ubutumikishi Bwesu Ubwa Bufumu) iya January 1940 e mo bakasabankanya pa muku wa kubalilapo bakoseleshiwe ukutantika ubushiku bwaibela cila mulungu ubwa kuya mu bunte bwa mu musebo ukubomfya bamagazini. Bushe ulaibimba mu bunte bwa mu musebo mu nshita mu nshita? Nga ulacite fyo, bushe inshila ubomfya mu cine cine yaliba iya maka? Bakasabankanya bamo balimonwa nabeminina pa cifutu ca musebo uupitamo abantu abengi, balesoshanya ilintu abantu abengi baleipitila fye ukwabula ukubamona. Ukucila ukwiminina mupepi mupepi ilyo tuleshalika bamagazini, cilaba ica kufumamo cimo ukwiminina pale pale no kutununuka abantu. Abantu kuti baiminina panono no kukutika nga ca kuti batununukwa ku muntu umo, lelo banono abengaimininina abene no kutununuka abantu abobelwe mu kusoshanya. Apantu tulacebusha ukusakamana ukwingi ilyo tuli mu musebo, kwaliba ukukabila kwaibela ukwa kusakula no kufwala bwino kabili mu kulinga nga batumikishi ba kwa Lesa.—1 Tim. 2:9, 10.
7 Abapokako Magazini Lyonse: Abo abakwata abapokako magazini lyonse balashalika bamagazini abengi nangu ca kuti ififulo fya kubombelamo filabombelwamo libili libili. Mu bapokako magazini lyonse e mo twingasanga abengasanguka amasambililo ya Baibolo.
8 Lintu uleya ku fipempu fya kubwelelamo libili libili ku kutwala bamagazini, ukasanga ukuti icikabilila na bucibusa pa kati ka iwe na mwine ŋanda fikakulilako. Ilyo mukalacilamo ukubeleshanya bwino, e lyo cikangukilako ukulanshanya pa lwa fintu fya mu Malembo. Ici kuti catungulula ku kutampa isambililo lya Baibolo ililunduluka. Pa fipempu apamoneka ukuti balatasha bamagazini besu, tambika ukulembesha. Kabili ibukisha ukuti, inshita iili yonse walanda na mwine ŋanda kuti walemba icipempu ca kubwelelamo.
9 Nkashi umo libili libili aletwalila umwanakashi umo bamagazini kabili alebapoka lyonse lelo aleti: “Nshicetekela fintu unjeba.” Pa kutandala kwakonkelepo, nkashi asangile umulume epo ali pa ŋanda. Pa numa ya kulanshanya kwa bucibusa, kwali ukutantika kwa kutendeka isambililo lya Baibolo. Nkashi apangile bucibusa na bana baume batatu abaishileilunda kwi sambililo. Mu kupita kwa nshita, nyina na bana baume bakwe balipeele ubumi bwabo kuli Yehova kabili balibatishiwe. Pali ino nshita, ifilundwa fya muli lulya lupwa 35 balipokelele cine. Conse ici ni pa mulandu wa kuti nkashi alicitilepo cimo pa lwa bapokako magazini lyonse!
10 Kwaliba inshila ishingi isha kubomfya pa kukwata abapokako magazini lyonse. Kuti watendeka fye ukusunga ifyalembwa fya kuntu uleshalika no kutantika ukubwelelako lyonse pa numa ya milungu ibili ukutwala bamagazini bapya. Inshila imo yaba kubomfya ifyebo fiba mu mukululo uulangilila ifikaba muli bamagazini bakafuma mu kukonkapo. Lintu wabwelelako, eba mwine ŋanda ukuti nukwata icipande walandilepo umuku wafumako. Nelyo, lintu uli pa cipempu ca kubwelelamo, kuti watila: “Lintu nabelengele ici cipande, natontonkenye fyo kuti camusekesha . . . ” Lyene landapo amashiwi yamo ayepi pa lwa cipande no kutambika cene. Lintu wapwisha ukutandala, lemba ifishinka fyayanguka fisano pa calembwa cobe ica ku ŋanda ne ŋanda: (1) ishina lya kwa mwine ŋanda, (2) inambala ya ŋanda, (3) ubushiku watandalapo, (4) ni bamagazini ba lilali washalikapo, na (5) icipande walandilepo. Bakasabankanya bamo balitunguluke cibi mu kusanga aba kupokako magazini lyonse, balifusha umutande wabo ukufika kuli 40 nelyo ukucilapo!
11 Icifulo ca Kubombelamo ica Makwebo: Bamagazini abengi balashalikwa na bakasabankanya ababombela mu cifulo ca makwebo. Bushe walyeshako umulimo wa kwi shitolo ne shitolo? Amalipoti yalangilila ukuti mu filonganino fimo, ukwakana muli ulu lubali lwa mulimo kunono nga nshi. Pa kubalilapo, bamo balomfwo mwenso ukutandalila bashimakwebo, lelo pa numa baesha inshita shinono, bacisanga ukuba ica kulengo buseko kabili ica kulambula. Mulandu nshi te kwipushisha kasabankanya wafikapo nelyo painiya ukukwaafwa ukutendeka?
12 Mwaliba ubusuma ubwingi mu kubomba kwi shitolo ne shitolo. Banono sana abashisangwapo, e kuti mu nshita ya kushitisha! Bashimakwebo ilingi line baliba aba mucinshi, nelyo ca kuti tabali abasekelela muli Baibolo. Tendeka mu lucelo; mu kupalishako ukapokelelwa bwino. Pa numa ya kuilondolola, kuti pambi watila te lingi usanga bashimakwebo pa mayanda, e co ulebatandalila pa kashita fye akanono ku ncito ku myabo ku kubatambika bamagazini ba Ulupungu lwa kwa Kalinda na Loleni! aba nomba line. Londolola ukuti bashimakwebo abengi balatasha bamagazini besu pa mulandu wa kuti balafwaya ukwendela pamo ne fya kuponako fya mu calo lelo tabakwata inshita iingi iya kubelenga. Bamagazini balanda pa fyebo fya kubalamune tontonkanyo lelo mu mimwene yapusanako, ukwabula impatila ya mipepele nelyo ukwafwilishapo ifya makwebo fimo, kabili tabaibimba mu mapolitiki. Abalesekelela abo wasanga mu cifulo ca makwebo kuti wabatantika pamo nga bakupokako magazini lyonse.
13 Pekanyeni ngo Lupwa: Kuti mwabuulako inshita mwi sambililo lyenu ilya lupwa iya kulanshanya ifipande fili muli bamagazini bafumine nomba line ifingabomfiwa mu cifulo cenu ica kubombelamo. Ifilundwa fya lupwa—ukusanshako na bana—kuti balekonkana ukubelesha amashiwi ya kulanda pa kutambika ne fya kucimfya ukukaanya kwaseeka ukwimako, pamo ngo kwa kuti: “Ndi ne ncito,” “Na ifwe tulaya ku calici,” nelyo ukwa kuti “Nshilefwaya.” Ukubombela pamo kusuma kuti kwalenga ulupwa lonse ukwakanako mu kwananya bamagazini.
14 Bakatungulula ba Masambililo ya Fitabo Kuti Bayafwa: Nga cingabomba, kuti mwatantika ukukumana kwa kuya mu mulimo pa Bushiku bwa Magazini pa fifulo fye sambililo lya citabo ukucila ukukumana nge cilonganino conse pa Ŋanda ya Bufumu. Abashingamwa ukutungulula ukukumana kwa mulimo wa mwi bala balingile ukuipekanya bwino mu kuba ne mitubululo ya kulungatika iya kupeele bumba. Ici kuti casanshamo ukulangilila imipeelele ne cishinka cimo nelyo fibili ukufuma muli bamagazini ba nomba line ifyo fingabomfiwa ku kubimbula ubuseko mu cifulo cenu. Ukukumana kwa mulimo wa mwi bala—ukusanshako ukuteyanya ibumba—kulingile ukuba ukwipi, ukukanacila pa maminiti fye 10 ukufika kuli 15. Bakatungulula ba masambililo ya fitabo balingile ukushininkisha ukuti kuli icifulo ca kubombelako icikalamba pa kuti ibumba likabe ilyapamfiwa pa nshita yonse bali no kuba mu mulimo wa mwi bala.
15 Langisha Ukuti Ulatesekesha Bamagazini: Icipande ca kuti “Ukubomfya Bwino Ukwa Ulupungu lwa kwa Kalinda na Loleni!” icasabankanishiwe mu Ubutumikishi Bwesu Ubwa Bufumu ubwa July 1993 calondolwele ici cishinka cakatama ica kuti: “Ulupungu lwa kwa Kalinda na Loleni! tafilufyo mutengo wa fiko, nelyo fye nga tabashalikwe mu kati ka mweshi umo nelyo ibili uwa shafuma sha shiko. Ifyebo bakwatamo taficepako kucindama mu kuba no kupita kwa nshita, . . . Ukuleka bamagazini ba kale ukutuulama no kukanabomfya cilanga ukubulwa ukutesekesha kuli ifi fibombelo fyacindama. . . . Mu cifulo ca kubika pa mbali abafuma aba kale no kulabako, bushe te kuti cicilepo kuwama ukucito kubombesha kwaibela ukushalika bene mu minwe ya bantu balesekelela?”
16 Kuliko abantu ba mitima ya bufumacumi abengi ilelo abalesapike cine. Ifyebo ifingaba muli umo uwa bamagazini kuti fyaba fye e fintu balekabila ku kubatungulula ku cine! Yehova alitupeela ubukombe bwa kucincimusha ubwa kubilisha, kabili bamagazini besu babomba ulubali lwakatama mu kufisha ubu bukombe kuli bambi. Bushe ku ntanshi ukaba uwacilapo ukwangwako ku kwananya bamagazini? Bushe uli no kubomfya imo iya iyi mitubululo pa mpela ya mulungu ino ine? Ukapaalwa mu kufumba nga wacite co.
Imitubululo Ibomba:
◼ Belengela bamagazini libela, no kubeleshanya ne fipande.
◼ Soobolapo icipande icilelanda pa cintu cimo icaba ica buseko mu bwikashi wikalamo.
◼ Pekanya ifyebo ifikaba ifyalinga ku bantu balekanalekana, nampo nga baume, abanakashi, nelyo imisepela. Langisha ifyo magazini akumine mwine ŋanda na fintu ulupwa lonse lwingaipakisha yene.
◼ Tantika ukuya mu kubomba umulimo wa mwi bala lintu abantu abengi bali pa mayanda. Ifilonganino fimo fitantika ubunte bwa mu cungulo bushiku ukubomfya bamagazini.
◼ Ifyebo fyobe fili no kuba ifipi kabili ifya kufika fye pa cishinka.
◼ Wisosa lubilo lubilo. Nga ca kuti kakutika obe talefwaya, ukusosa lubilo lubilo takwakaafwe. Esha ukuba uwashikatala, kabili peela mwine ŋanda ishuko lya kwankulako.
Ukutambika Bamagazini ku Ŋanda ne Ŋanda:
◼ Ube no kumwentula kwa bucibusa ne myumfwikile ye shiwi iya bucibusa.
◼ Ba uwacincimuka pa lwa bamagazini.
◼ Landa panono panono kabili ulelumbwisha.
◼ Landa fye pa mutwe umo; mu kwipifya balamuno buseko, kabili langisha mwine ŋanda ubucindami bwa magazini.
◼ Langisha fye icipande cimo.
◼ Langisha fye magazini umo, ukutambika bamagazini balundwapo nga bo fye uleshalika capamo no yo ulangishe.
◼ Peela mwine ŋanda ekate bamagazini.
◼ Leka mwine ŋanda eshibe ukuti ulepanga ukubwelelako.
◼ Nga ca kuti bamagazini bakaanwa, insondwelelo yobe ilingile ukuba iya bucibusa, iisuma.
◼ Pa calembwa cobe ica ku ŋanda ne ŋanda, lembapo ubuseko bonse wasanga na fintu washalika.
Utushita twa Kushalika Bamagazini:
◼ Mu bunte bwa ku ŋanda ne ŋanda
◼ Mu bunte bwa mu musebo
◼ Mu mulimo wa kwi shitolo ne shitolo
◼ Ku bapokako magazini lyonse
◼ Ubunte bwa mu cungulo bushiku
◼ Ku fipempu fya kubwelelamo
◼ Pa kutandalila abaleka ukusambilila Baibolo
◼ Pa lwendo, pa kushita
◼ Ilyo ulelanda na balupwa, ababomfi banobe, abena mupalamano, abanobe ba pa sukulu, bakafundisha
◼ Ilyo uleenda muli bamotoka ba cintubwingi, mu miputule ya kupembelelamo