Shalikeni Bamagazini mu Mulimo wa mwi Bala
1, 2. Bushe bamagazini ba Ulupungu lwa kwa Kalinda na Loleni! balenga shani abantu ukwaluka?
1 “Ifyebo ifisuma, ifyalinga kabili fyali ifya kukoselesha.” “Nshabala mbelengapo bamagazini abankoselesha umusango uyu sana.” Ifi e fyo ababelenga Ulupungu lwa kwa Kalinda na Loleni! mwi sonde fye lyonse basosa. Cine cine bamagazini besu balatwafwa sana ukufika ku “bantu aba misango yonse” ne mbila nsuma.—1 Tim. 2:4.
2 Shi makwebo umo apokele magazini wa Loleni! umwali ilyashi atemenwe sana. Pa numa abelengele no Ulupungu lwa kwa Kalinda umwali icipande icalengele ukuti atontonkanyepo sana pa cisumino ca kuti muli Lesa mwaba abene Batatu ico asuminemo pa myaka iingi. Ici calengele ukuti afwaishe ukusambilila. Pa numa ya myeshi 6 alibatishiwe. Kwaliko umwaume na umbi uwalepokelela lyonse bamagazini lelo talebabelenga. Abakashi bakwe bena tabalefwaya Inte sha kwa Yehova lelo balebelenga bamagazini abo ba Nte baleshila umulume wakwe. Uyu mwanakashi alyumfwile bwino lintu abelengele pa bulayo bwa mu Baibolo ubwa kuti kukaba Paradaise pano pene pe sonde umukekala abantu balungama. Mu kupita kwa nshita uyu mwanakashi, no mwana wakwe umwaume e lyo no mwaice wakwe umwanakashi babele Inte sha kwa Yehova.
3. Busuma nshi bwaba mukutambika bamagazini bonse babili?
3 Tambikeni Bamagazini Bonse Babili: Nga fintu twaumfwa muli ifi fya kumwenako, te kuti twishibe abakabelenga bamagazini besu nelyo icikalenga bakafwaishe ukusambilila. (Luk. Mil. 11:6) Kanshi cilawama ukutambika bamagazini bonse babili aba Ulupungu lwa kwa Kalinda na Loleni! nangu ca kutila tukalanda sana pali magazini imo fye. Limo limo, kuti cawama ukutambika bamagazini abapusanapusana pa muku umo.
4. Kuti twatantika shani pa kuti tukaleshalikako bamagazini besu?
4 Cilaba bwino ukusalapo ubushiku bumo mu mulungu ubwa kubombako umulimo wa kushalika bamagazini. Pali Kalenda wa Nte sha kwa Yehova uwa mu 2005, ifibelushi fyonse fya “Kushalika Bamagazini.” Ca cine, incende ikalamo abantu taiba cimo cine e lyo na bantu nabo balapusanapusana. Bamo nalimo kuti basala ubushiku bumbi ukushalikamo bamagazini besu. Bushe e fyo mucita cila mulungu?
5. Ni nshita nshi twingakwata iya kushalika bamagazini, kabili cinshi icingatwafwa ukucita ifyo?
5 Lembeni Ifyo Mukalabomba: Nga twaishiba ifyo tukalashalika cila mweshi, cikatwafwa ukulaibukisha ukuti tufwile ukulashalika bamagazini. Bushe mwalikwata abo mutwalila bamagazini? Bushe mulatambika bamagazini ku bo musanga ilyo muleshimikila? Bushe kuti mwashalika bamagazini ilyo muleshimikila mu misebo, mu fifulo fya makwebo, na pa cintubwingi? Ilyo muli pa lwendo, na lintu mwile mukushita, na lintu muleya ku bo mwapangene nabo, bushe mulasenda bamagazini? Inshita yonse iyo mukakwata ibomfyeni ukwafwa abantu bambi ukumwenamo mu kubelenga Ulupungu lwa kwa Kalinda na Loleni!
6. Bamagazini ba kale kuti twababomfya shani bwino?
6 Limbi kuti twasalapo ukulashalika bamagazini ba kale abo twakwata. Nangu ca kutila tatushalike bamagazini muli uyo wine mweshi bafuma nelyo papita ne myeshi ibili, ifyebo fyabamo tafifumuka, fyabe fyacindama. Shalikeni ku bantu abalefwaya ukusambilila. Ku bantu abengi, aba bamagazini ba Ulupungu lwa kwa Kalinda na Loleni! baba “cebo . . . pa nshita iiyene.” (Amapi. 25:11, NW) Shi natuleshalika aba bamagazini ku kwafwa abantu abengi ukwishiba Yehova no kumubombela.