Saleni Ifipande Filanda pa Fintu Abantu Bapusanapusana Batemwisha
1 Ukupala abalunshi abatonta bwino imifwi yabo, bakasabankanya ba mu cilonganino abengi na bapainiya baletunguluka bwino mu kubomfya ifipande basala mu Ulupungu lwa kwa Kalinda na Loleni! ku kucebusha abantu bapusanapusana mu cifulo babombela. Balamona abengafwaisha ukubelenga ifipande fimo fimo muli bamagazini. Ni shani fintu bacite ci?
2 Ica kubalilapo babelenga magazini umo na umo onse. Lyene baipusha ukuti, Muntu wa musango nshi engacebushiwa ne cipande cimo na cimo? Lyene batandalila abantu bengafwaisha ukubelenga ico cipande. Nga ca kuti baleenekela ifyo uyo magazini akapokelelwa na bengi mu cifulo babombela, balaorda na bambi.
3 Bamagazini Besu Balicindikwa: Uwalembeshako bamagazini besu umo uubombela uko balemba magazini wa ku calo uwa ku Nigeria uubelengwa sana, uusangwa na mu fyalo fimbi asosele pa lwa Loleni ati: “Mwabombeni, pali magazini wawamisha uwa cintubwingi.” Uubelenga sana bamagazini besu atile: “We fintu fyawamisha ifya mano yaumo mutengo! Lyonse mpaka fye nsange ilyashi ntemenwe nalilandwapo muli [bamagazini].”
4 Bamagazini balanda pa fintu ifingi, fimo fimo fisanshamo Baibolo, ificitika mu calo, ifya lupwa, amafya ya mu bwikashi, ilyashi lya kale, sayansi, ubumi bwa nama ne filimwa. Mu kushininkisha umuntu kuti atemwapo ukubelenga icintu nga cilelanda pa fyo alekabila, imibele alimo, nelyo incito abomba. Apo tulanshanya na bantu bapusanapusana, uuli onse na mafya yakwe ne fyo atemwapo, ukusala ifipande fingacebusha abantu bapusanapusana abo tukumanya kulabomba bwino.
5 Moneni icacitike lintu ba Nte babili batambike Loleni! wa September 8, 1996 kuli kalemba wa mikululo mu nyunshipepala. Alembele ukuti: “Ilyo nshilasosa ukuti nshilefwaya, Nte umo pali bene alundilepo ukuti: ‘Muli icipande pa Bakaya ba ku Amerika. Twalishiba ukuti mulalemba ifingi pali ili lyashi.’” Alipokele magazini kabili, ilyo alelya ulucelo, abelengele pa lwa Bakaya ba ku Amerika, pa numa asumine ukuti ilyashi “lyali ilisuma” kabili “ilya bufumacumi.”
6 Finshi Ficebusha Abantu umo Mubombela? Finshi mwamona muli bamagazini mu myeshi ya nomba line ifingacebusha bashimashitolo na bantu ababomba ababa mu cifulo mubombela nelyo abena mupalamano benu, abo mubomba na bo ku ncito, nelyo abo musambilila na bo? Finshi bandubulwila bengatemwa, bakasambilisha, ifing’ombe fya masukulu ne ndupwa, abapanda amano abacaice, ababomba umulimo wa mu bwikashi, na ba ku fipatala? Ukutontonkanya pa bantu mushimikila ilyo muleceeceeta magazini umo na umo kukamulenga ukukwata inshila shawamisha isha kusabankanishishamo icebo ca cine.
7 Mulemona bwino abengatemwisha ukukwata bamagazini abapya aba Ulupungu lwa kwa Kalinda na Loleni! pa fipempu fyenu na bashimakwebo abo mulanshanya na bo. Lyene bombesheni ku kubatandalila. Lanshanyeni na bengi ukulingana na po mwingapesha na ba bamagazini baumo mutengo.
8 Muleba ne Mifwaile ya ku Mupashi: Imyaka inono ku numa, umwaume wapoosa amano ku fya ncito apokeleko magazini wa Loleni! pa lyashi atemenwe. Nangu cibe fyo, uyu mwaume watemwo kupepa na kabili abelengele Ulupungu lwa kwa Kalinda ulwaba ni magazini endela pamo na Loleni! ulwakwete icipande camulengele ukuceeceeta icisumino cakwe ica kale ica kuti kwaba balesa batatu. Pa numa ya myeshi 6 alibatishiwe! E co, mwilashingashinga ukulanda ifya ku mupashi na babelenga bamagazini besu. Kuti mwatendekela na broshuwa wa Cinshi Cintu Lesa Afwaya Kuli Ifwe? no kumweba ifyo kuti mulesenda fye amaminiti ayanono ku kulanshanya pe sambililo limo lyonse lintu mwabwelelako na bamagazini abapya.
9 Umweshi wa May e ukaba uwa kulekelesha muli kampeni wesu uwa kulembesha bamagazini uwa myeshi ibili. Kwaliba inshila ishisuma ishingi isha kulenga abantu ukulembesha mu kati ka mweshi. Inshila imo kuti yaba ya kweba abasambi besu aba Baibolo na bantu bambi abalefwaya ukwishibe cine ukulembesha. Indupwa kuti shakoseleshiwa ukulembesesha uuli onse uwa mu lupwa Ulupungu lwa kwa Kalinda ku kuleka balepekanya isambililo lya Ulupungu lwa kwa Kalinda. Na kabili tufwile ukutambika isambililo lya Baibolo ku balefwaya ukwishibe cine. Kuti mwatendekela na broshuwa wa Cinshi Cintu Lesa Afwaya Kuli Ifwe? no kumweba ifyo kuti mulelanshanya isambililo limo pa maminiti yanono lintu mwatandala. Kabili mwilalaba ukuti ilyo muletulukusha ukwaafwa abantu bafulilako ukubelenga bamagazini besu, ‘mulepoose cilyo pa muulu wa menshi.’ Mu nshita, kuti mwatunguluka mu kusanga abengesaba abasambi banenu ku ntanshi.—Luk. Mil. 11:1, 6.