Kuti Mwatendeka Ukusambilila Baibolo na bo Mutwalila Magazini
1. Mulandu nshi ukuteyanya kukoselesesha bakasabankanya ukukwata aba kutwalila magazini cila mweshi?
1 Abantu abengi tabafwaya ukubasambilisha Baibolo, lelo balitemwa sana ukubelenga magazini yesu. Uyu e mulandu ukuteyanya kwa kwa Yehova lyonse kukoselesesha bakasabankanya ukukwata aba kutwalila magazini cila mweshi. Abantu nga balebelenga sana magazini, ilingi balatendeka ukufuluka Icebo ca kwa Lesa. (1 Pet. 2:2) Mu kupita kwa nshita, kuti babelengako fimo ifyo bengatemwa sana ifingalenga basumina ukusambilila Baibolo.
2. Kuti twa-afwa shani abo tutwalila magazini ukutemwa icine?
2 ‘Muletapilila’ Imbuto sha Cine: Mu nshita ya kubapeela fye magazini no kuya mwaya, mulelanshanyako nabo panono no kwesha ukubapanga icibusa. Ukulacita ifi kuti kwamwafwa ukwishiba amafya bakwata, ifyo batemwa, ne fyo basuminamo kabili ici cikalenga mukaleishiba ifya kulanshanya nabo bwino. (Amapi. 16:23) Mulepekanya bwino lyonse ilyo mushilaya mu kubatwalila magazini. Nga mwabatwalila magazini nalimo kuti mwalandako pa cishinka cimo ne lembo ifili muli magazini, nga mulecita ifi ninshi muletapilila imbuto sha cine. (1 Kor. 3:6) E lyo mulelemba no bushiku mwabatandalila, impapulo mwabapeela, ifyo mwalanshanya, na malembo mwababelengela.
3. Bushe tulingile ukutandalila abo tutwalila magazini ilyo fye twakwata magazini iipya?
3 Bushe Tulingile Ukulayako fye pa Kubatwalila Magazini? Kwena, cila mweshi mulingile ukulabatwalila magazini yonse iyafuma. Na lyo line, kuti mwabatandalila na lintu magazini imbi tailaisa nga namukwata inshita, cikulu fye kuti batemwa ukulanshanya. Ku ca kumwenako, nga papita umulungu umo nelyo ibili apo mwabatwalile magazini, kuti mwabwelelako no kutila, “Napitapo fye ukuti imulangeko icishinka cimo icili muli magazini na mushilile.” Ici kuti calenga bafwaya ukubelenga ico cipande. Nga balibelenga kale ico cipande, kuti mwabepusha ifyo baletontonkanya pa fyo babelengele kabili kuti mwalanshanyako panono ifili muli ico cipande. Lelo nga mwamona ukuti balitemwa sana ukubelenga impapulo kuti mwabwelelako no kubatwalila trakiti, broshuwa, nelyo icitabo ico tuleshalika uyo mweshi.
4. Finshi tulingile ukulacita limo limo pa kuti twishibe nga ca kuti abo tutwalilila magazini kuti batemwa ukutendeka ukusambilila?
4 Muleitendekelako ukweba abo mutwalila magazini ukuti mulefwaya ukutendeka ukusambilila nabo Baibolo, tamufwile ukulolela ukuti bakamwipushe. Nangu ca kuti balikaanapo ukubasambilisha Baibolo, limo limo kuti mulebalanga icipande ciba mu Ulupungu lwa kwa Kalinda icitila “Amepusho ya mu Baibolo Ya-asukwa,” no kumona nga kuti batemwa ukulanshanya. Nalimo kuti mwatendeka isambililo lya Baibolo ilya pa mwinshi. Na lyo line, nga batwalilila fye ukukaana ukusambilila, kuti mwatwalilila ukubatwalila magazini pa kuti mulebafwa ukutemwa icine.