Ifingatwafwa Ukulashimikila Bwino—Ukutendeka Ukusambilila Baibolo na bo Tutwalila Magazini

Ico Cacindamina: Abantu abengi abatemwa ukubelenga magazini yesu tabafwaya ukusambilila Baibolo. Nalimo ico bashifwaila ni co balikwata uko bapepa, nelyo tabakwata inshita ya kusambilila. Nomba nga balebelenga lyonse impapulo shesu, kuti batendeka ukulafwaya ukusambilila Icebo ca kwa Lesa. (1 Pet. 2:2) Nalimo icipande cimo kuti cabafika pa mutima nelyo ifintu mu bumi bwabo kuti fyayaluka. Kanshi nga tulebatandalila lyonse kuti baba ifibusa fyesu kabili kuti twaishiba ifyo batemwa ne fibasakamika. Mu kupita kwa nshita, kuti twatendeka ukubasambilisha Baibolo.

Ifyo Mwingacita:

Cila mweshi, mulepekanya ukubatwalila Ulupungu lwa kwa Kalinda na Loleni! Lyena kuti mwapitako pa nshita imbi ilyo umweshi ushilapwa no kubebako ifingalenga bafwaisha ukubelenga icipande cimo icili muli magazini mwabashilile nelyo ukubashila ulupapulo ulo tuleshalika muli uyo mweshi. Mulelemba ifyo mwalanshanya nabo.—Moneni Ubutumikishi Bwesu Ubwa Bufumu ubwa January 2014, pe bu. 3.
Mulepekanya ilyo mushilaya mu kubatandalila. Mu nshita ya kubashila fye magazini, lanshanyeniko no mwine wa ng’anda kabili esheni ukumupanga icibusa pa kuti alefwaya ukumfwilapo na fimbi pali Baibolo.
Mulebika amano kuli fimo ifingamwafwa ukutendeka ukubasambilisha Baibolo. Nga ca kuti uo mutwalila magazini alefwaya ukwishiba ifyo Baibolo yalandapo pa lyashi limo, kuti mwamutwalila ulupapulo tusambililamo na bantu Baibolo umwaba icasuko kuli ico cipusho no kulanshanya nankwe. Ilyo mushilafumapo, mwipusheni icipusho ico mukalanshanyapo nga mwabwelelako icipalene ne cipusho mwacilanshanyapo. Nga ca kuti lyonse mulelanshanyako nangu fye pa nshita iinono pe lyashi lya mu Baibolo ukubomfya Baibolo nelyo ulupapulo tubomfya pa kusambilisha abantu Baibolo, ninshi muletungulula isambililo lya Baibolo. Bushe mwalibapeelako broshuwa ya Imbila Nsuma no kubalanga ifyo tusambilila Baibolo pa mamineti fye ayanono? Bushe mwalibala amubalangapo vidio iitila Mulandu Nshi Mulingile Ukusambilila Baibolo na Bushe Isambililo lya Baibolo Liba Shani? Nangu ca kuti umuntu kale alikeene ukusambilila Baibolo, ifintu kuti fyayaluka. Nalimo kuti cawama ukumwipusha na kabili nga kuti atemwa ukusambilila.

Esheniko Ukucita Ifi Uno Mweshi:

Lembeni amashina ya bantu abo nalimo mwingalatwalila magazini. Batwalileni magazini iipya kabili bebeni no kuti mukabatwalilako na imbi iikafuma umweshi ukonkelepo.