“Ukubyale Mbuto sha Bufumu” ku Bantu Tutwalila Bamagazini
1 Ulwimbo Namba 133 mu citabo cesu ica Imbileni Yehova Amalumbo lwakwata umutwe wa kuti “Ukubyale Mbuto sha Bufumu.” Ulu lwimbo lwashimpwa pa cilangililo ca kwa Yesu umo apashenye umulimo wa kupanga abasambi ku kubyale mbuto. (Mat. 13:4-8, 19-23) Mu lwimbo mwaba amashiwi ya kuti: “Pa kuti imbuto shibyalwe lelo/Ni kuli iwe cashalila.” Bushe kuti twacilapo shani ukuba abalamuka mu mulimo wa kushimikila? Inshila imo yaba kwishibana na bantu aba kutwalila bamagazini no kukonkanyapo ukucite fyo.
2 Kuti mwapwishishisha ifingi nga mwaishibana na bantu ba kutwalila bamagazini lyonse. (1) Ukulabatandalila lyonse cilya papita imilungu ibili, kukalenga ukuti mukatemwane nga nshi na bantu bafwaya ukubelenga bamagazini. (2) Tulatwalilila ukupayanishisha abo bantu ifyebo fya kupusushe myeo ifiba mu Ulupungu lwa kwa Kalinda na Loleni! (3) Ukupitila mu kulanshanya na bo, kuti na bo bene batendeka ukufuluka ukwishiba ifingi pa lwa cine ca mu Malembo, ne cingafumamo lisambililo lya Baibolo.—1 Pet. 2:2.
3 Ifyo Mwingeshibana na Bantu ba Kulatwalila Bamagazini: Lyonse lintu mwalanda no muntu uo mwamona ukuti alefwaisha ukulabelenga bamagazini, mulondolweleni ukuti ifipande ifisuma nga nshi filabamo muli bamagazini bonse abesa, kabili mwebeni fyo kuti mulemutwalila lyonse bamagazini abapya. Lintu mwafuma pali ulya muntu, mufwile ukulemba ishina lyakwe, akeyala, ubushiku mwalanda nankwe, bamagazini abo ashala na bo, icipande mwalanshanya nankwe, ne fipande fintu mwamona ukuti e fyo uyo muntu alefwaisha ukusambilila.
4 Kuti limbi pa kubala mwaishibana fye na bantu abanono aba kulatwalila bamagazini. Lyene kuti mwabombesha ukulundapo na bambi bantu muletambika bamagazini. Abantu abo mwakulatwalila nga bafula, mufwile ukutantika bwino ifya kwenda pa kutwala bamagazini pa kuti cilemwangukilako. Cila muku muletwala bamagazini, lembeni bwino bwino ubushiku, bamagazini abo mwatwala na bantu mwatwalila. Lembeniko ne fyebo ifyo mwalanshanyapo lintu mwatandala pa kuti mwingeshiba bwino ifyo mwingesakoselesha uyo muntu ukusambilile cine lintu mukamutandalila umuku ukakonkapo.
5 Sanshenimo aba Makwebo na Basambilila: Ifya kukumanya filango kuti abene ba matuuka na bantu bambi abasambilila, ilingi balatemwa ukutwalilila ukulapoka bamagazini besu. Pa bantu abo eluda umo aletwalila bamagazini paali na Cilolo we tauni ilikalamo munyina. Kasabankanya umo atendeke isambililo lya Baibolo na shimakwebo wa myaka 80 uwa kampani kashitisha ifibombelo fya makuule, pa numa ya kutwala bamagazini kuli wene pa myaka 10 iituntulu!
6 Nkashi umo painiya aingile mwi tuuka umo asangile umwaume no mukashi abamupokelele fye mu muleele. Lelo kwena, apo balipokeleko bamagazini, ulya painiya apingwilepo ukubalunda ku bantu ba kulatwalila bamagazini lyonse. Mu kuya kwa nshita, ulya nkashi atendeke ukutontonkanya pa fya kuleka ukuyako, pantu balya bantu lyonse nga ayako tabalebikako mano kabili balemwasuka fye muleele muleele nangu fye ni lintu alebepusha amepusho ya kufwaya ukuti balondolole ifyo baletontonkanya. Lelo nkashi apepele kuli Yehova ukumwaafwa pali ubu bwafya kabili asukile ashalika icitabo ca Ikala Kuli Pe na pe kuli balya baupana. Lintu bacibelengele, umukashi apundile ukuti: “Icili umu nomba namona e cine!” Alitendeke ukutungulula isambililo lya Baibolo, kabili balya babili basukile babatishiwa. Umupampamina wa kwa painiya cine cine watwele ifisabo fisuma.
7 Ukubwelelako: Lintu magazini aisa, mubelengeni onse. Fwayenimo ifishinka ifyalekanalekana ifyo bonse abo mutwalila bamagazini benganonkelamo. Lyene lintu mwabwelelako kuti mwayatila: “Lintu nalebelenga uyu magazini, nalimwibukishe kabili namwene fyo kuti mwaipakisha ukumubelenga na imwe.” Bakasabankanya ba mishinku yonse kuti baishibana na bantu ba kulatwalila bamagazini. Nangu fye mwana munono limbi kuti asosa fye ukuti: “Natemwa nga nshi apo twamonana na lelo, bamagazini benu abapya nabesa. Ndemona kuti mwatemwa ukubelenga ici cipande icili no mutwe uuleti . . . ”
8 Bacincisheni pa kuti balefwaisha ukubelenga bamagazini abakesa na kabili, lanshanyeni na bo umukululo ulangilila ifikaba muli magazini ukakonkapo. Lintu muli magazini muli ukukonkana kwa fipande ifilelanda pa mulandu umo, balangeni ifyo fipande no kubakoselesha ukuti bakabelenge fyonse. Mwilalabako ukuti lyonse lintu mwatwala bamagazini ku bantu mutwalila lyonse, mufwile ukupenda icipempu ca kubwelelamo. Kabili icacindamisha, mufwile ukwishiba ukuti ubuyo bwesu bwa kutendeka amasambililo ya Baibolo ku bantu tutwalila bamagazini.
9 Mulebwelelako Lyonse ku Bantu Mutwalila Bamagazini: Kuti muletwala bamagazini inshita iyo mwishibe ukuti e lyo abo bantu mwingabasanga. Limbi kuti mwatwala ulucelo lintu bafika ku ncito, mu cungulo kasuba, mu cungulo bushiku nelyo pa mpela ya mulungu, lintu mwabala mwabombako ubunte bwa ku ng’anda ne ng’anda. Lintu mushileyako ku kutwala bamagazini pa mulandu wa kulwala nelyo muli pa cuti wa kuya kumbi ku kutandala, shiileni kasabankanya umbi uwa mu lupwa lwenu nelyo mu cilonganino ukuti akamutwalileko bamagazini. Nga mwacite fyo, tamwakalenge bamagazini ukucelwa ukufika ku bantu mutwalila.
10 Inshila imo iya kubyalilamo imbuto sha Bufumu yaba kutwalilila ukulatwala bamagazini ku bantu abo tutwalila lyonse. Lintu mulebasambilisha Baibolo, bakomfwe cine ca Bufumu no kwiluka cene, kabili bakasuka bakatendeke ukutwala ifisabo fya Bufumu capamo na imwe.—Mat. 13:8, 23.