Tambika Bamagazini pa Kashita Akali Konse
1 Twalikwata umulandu usuma uwa kutashishapo Ulupungu lwa kwa Kalinda na Loleni! Ni bamagazini nshi bambi abakwata ukucebusha kwa pa kati ka nko ukwa musango yo? Uno mweshi tukalashalika bamagazini mu mulimo wesu uwa kushimikila, kabili mwandi fyebo fya maka bamagazini ba mu October bakwete! Ilingi line, tushalika ubwingi bwa bamagazini mu mulimo wa ku ŋanda ne ŋanda; nangu cibe fyo, tulekabila ukuipekanya ukutambika ukulembesha pa kashita akali konse akalinga.
2 Pa kushalika “Ulupungu lwa kwa Kalinda” ulwa October 1, kuti wabimbula ubuseko mu cipande cileti “Icalo Cabulamo Inkondo—Lilali?” pa kusoso kuti:
◼ “Abantu abengi balapapa umulandu kushabela icalo cabulamo inkondo te mulandu no kubombesha konse ukwa bantu. Cinshi cintu muletontonkanya pa lwa uku kulandapo kuli pe bula 5 ukwa Ulupungu lwa kwa Kalinda ulwa October 1? [Belenga sentensi wa kubalilapo muli paragrafu wa kubalilapo no wa cibili pe samba lya kamutwe “Imipepele—Icipindami Cikalamba,” kabili leka asukepo.] Kwena, ici tacilepilibula ukuti lyonse kukalabako fye inkondo. Moneni ubulayo bwa kwa Lesa pano pali Esaya 9:6, 7.” Kuti pambi wabelenga ili lembo muli Baibolo obe nelyo nga fintu fye lyambwilwe mu cipande ca Ulupungu lwa kwa Kalinda. Londolola mu kwipifya ukuti Ulupungu lwa kwa Kalinda lusabankanya Ubufumu bwa kwa Yehova nge subilo lyeka fye ilya calo ca mutende, kabili tambika ukulembesha.
3 Lintu uletambika “Loleni!” wa November 8 kuti pambi watila:
◼ “Bushe muletontonkanyapo shani pali ici cipusho cili pa nkupo ya uyu magazini: ‘Mulandu Nshi Ubumi Bwaipipile Fi?’ [Leka asuke.] Ifi fipande fikonkene filetonta ukusakamana ku co basayantisti ba muno nshiku na bantu bambi balesosa pa lwa kukota, kabili lyene filetontomesha pa co Kabumba wesu alaya ukukuma ku filolelo fya bumi bwa ciyayaya. Kuti natemwa ukumushiila uyu magazini pa musangulo wa K100.00.”
4 Lintu wasanga abantu abakongamina ku kupepa, mulandu nshi te kubalangishisha icipande ca mu “Ulupungu lwa kwa Kalinda” ulwa October 15? Iyi mipeelele kuti pambi yalenga baankulako bwino:
◼ “Kuti natemwa ukumfwa ifyo muletontonkanya pali ici cipusho: Bushe kuti cacitikako ukutemwa Lesa no kumutiina pa nshita imo ine?” Leka asuke, kabili lyene belenga ilembo apashimpilwe umutwe wa lyashi uwa cipande cileti “Mulandu Nshi uwa Kutiinina Lesa Wa Cine Nomba?” (Luk. Mil. 12:13) Bomfya cimo ica filangililo fisangwa pe bula 426 ilya citabo ca Ukupelulula, kabili tambika magazini.
5 Lintu ulebomba ku ŋanda ne ŋanda, wicilukila amashitolo yanono na matuuka. Abatandalila amashitolo libili libili balondolola ukuti balaipakisha uyu mulimo kabili balasangamo ifisabo. Kuti waesha imipeelele yaanguka ukupala iyi, lintu uletambika “Loleni!” wa October 8:
◼ “Twalishiba ukuti bashimakwebo balafwaisha ukwendela pamo ne nshita ukukuma ku fintu ifileambukila incende yabo. Ndi uwashininkisha ukuti ifi fipande fili no kumusekesha.” Lyene mu kwipifya landako icishinka cimo ukufuma mu cipande cileti “Indupwa Shakwata Abafyashi Baba Beka—Ni Shani Fintu Shingatunguluka?” Kabili lyene tambika ukulembesha.
6 Nga ca kuti umuntu watununuka napamfiwa mu cine cine, kuti wamulangisha bamagazini no kusoso kuti:
◼ “Ninjishiba ukuti tamwacilaenekela umutandashi ilelo, e co nalaipifya. Kuti natemwa ukumupeelako ishuko lya kubelenga icintu cimo icacindama.” Londolola icipande ico usoobwele, kabili tambika bamagazini.
7 Sunga icalembwa ca ku ŋanda ne ŋanda icisuma, kabili bwelelako konse uko washalika bamagazini ku kuyatambika ukulembesha kwa umo uwa bamagazini nelyo ukwa bamagazini bonse babili. Lekeni tube abaipekanya kabili abaibukila ukutambika bamagazini pa kashita kalinga akali konse.