Ifya Kushimikila mu Ncende ya Makwebo

1. Busuma nshi bwaba mu kushimikila mu ncende ya makwebo?

¹ Bushe kuti mwatemwa ukushimikila mu mushi umo abantu bonse bapokelela abatandashi kabili umo abantu abengi basangwa pa mayanda? Kuti mwacita ci na mu cifulo ca cilonganino cenu mwine. Kuti mwacita shani? Pa kubombela mu ncende ya makwebo iyaba mu cifulo cenu. Bakasabankanya abashimikila kwi shitolo ne shitolo ilingi line balasanga ifisuma mu mulimo wabo.

2. Bushe ukushimikila mu ncende ya makwebo kuti kwabombwa shani?

² Ififulo fya kubombelamo ifya filonganino fimo mwaba ne ncende ya makwebo. Umubomfi wa cifulo ca kubombelamo ica cilonganino kuti apekanya bamapu ba ncende ya makwebo. Pali bamapu ba cifulo ca kubombelamo conse icakwata ne ncende ya makwebo pafwile ukulanga ukuti incende ya makwebo taifwile ukubombelwamo ngo lubali lwa cifulo ca kubombelamo icikalamo abantu. Mu fifulo fya kubombelamo fimbi, incende ya makwebo kuti shabombelwa pamo ne cifulo ca kubombelamo icikalamo abantu. Nga tamwashimikilapo mu ncende ya makwebo, tendekeni pa kushimikila fye mu mashitolo ayanono.

3. Cinshi cikatwafwa ukubomba bwino ilyo tuleshimikila kwi shitolo ne shitolo?

³ Landeni Amashiwi Yaanguka pa Kutendeka: Ilyo muleshimikila kwi shitolo ne shitolo, calicindama ukufwala nga filya mufwala pa kuya mu kulongana ku Ng’anda ya Bufumu. Kabili cisuma ukusala inshita ilyo mu shitolo mushifula abantu. Kabili kuti cawama ukwingilamo ilyo takuli uulelolela ukutangatwa. Lombeni ukulanda no mukalamba we shitolo nelyo uuleangalila imilimo. Mwifusha ifya kulanda kabili fikeni bwangu pa cishinka. Finshi mwingasosa?

4-6. Finshi twingasosa ilyo tuleshimikila ku ushitisha nelyo ku mukalamba we shitolo?

⁴ Ilyo mulelanda no ushitisha nelyo umukalamba we shitolo, napamo kuti mwatila: “Bashimakwebo balipamfiwa sana ica kuti te lingi tubasanga pa ng’anda, e co twaishila kuno. Bamagazini besu balanda pa filecitika isonde lyonse.” Lyena mu kwipifya landeni pa cishinka cimo ukufuma muli magazini imo.

⁵ Nelyo kuti mwaesha iyi ntendekelo iyayanguka: “Abantu abengi balafwaya ukwishibilapo na fimbi pali Baibolo lelo tabakwata sana inshita. Uyu trakiti alelondolola amasomo yabula ukulipilisha ayafwa ukusanga amasuko ku mepusho ya fya mu Baibolo ayo mwingepusha.” Lyena balangeni pa mabula 4 na 5 aya trakiti atila Bushe Kuti Mwatemwa Ukwishiba na Fimbi Pali Baibolo?

⁶ Nga ca kuti uo mulelanda na o amoneka ukupamfiwa, kuti mwamupeela fye trakiti no kutila: “Nalasapitako inshita imbi ilyo imilimo yenu yalacepako. Ndefwaisha ukumfwa ukulandapo kwenu pali uyu trakiti.”

7. Kuti twalundulula shani ukufwaisha ukusambilila ukwa bantu tusanga mu ncende ya makwebo?

⁷ Ukulundulula Ukufwaisha Ukusambilila: Nalimo kuti mwalatungulula ne sambililo lya Baibolo mu ncende ya makwebo. Painiya waibela umo lyonse aletwala bamagazini kuli shimakwebo. Ilyo uyu mwaume atashishe pa fyo alebelenga, painiya amulangile ifyo tucita pa kusambilila Baibolo, ukubomfya broshuwa wa Cintu Lesa Afwaya. Isambililo lyalitendeke palya pene pa ncende ya makwebo iya kwa shimakwebo uyu. Apo cali cifulo ca makwebo, painiya alesambilila no yu muntu pa maminiti fye 10 nelyo 15. E ico, na ifwe, natutwalilile ukufwaya abayana pa kushimikila mu ncende ya makwebo.