Kuti Mwashimikila mu Fifulo fya Makwebo Ukwabula Umwenso
1. Mulandu nshi tushilingile ukusakamikwa nga tulomfwa umwenso pa kushimikila mu fifulo fya makwebo?
1 Bushe mulomfwa umwenso ukushimikila mu fifulo fya makwebo? Nga mulomfwa umwenso, mwisakamikwa sana, pantu fye na Paulo, umutumikishi uwashipa kabili uushaletiina, alekabila ‘ukushipa’ pa kushimikila. (1 Tes. 2:2) Twalalanda pa mafya tukwata ilyo tuleshimikila mu fifulo fya makwebo na pa fyo twingayapwisha.
2. Mulandu nshi tushilingile ukusakamanina ukuti twalapumfyanya abalebomba?
2 Bushe Balakalipa nga Nabapumfyanya? Mu fifulo fya makwebo ifingi ababomfi balafwilisha abantu kabili balenekela ukubapumfyanya. Ilingi line balaba abanakilila, pantu bamona kwati mwalashitamo. Ukufwala ifya kufwala ifya mucinshi, ukuba aba nsansa, kabili aba cikuuku, kukalenga ukuti bakalemupeela umucinshi.
3. Kuti twacita shani pa kuti tatulekalifya abaleshita?
3 Bushe Nalatendeka Ukushimikila Ninshi Muli Aba Kushita Abengi? Nga mwingakwanisha kuti mwaya mu kushimikila ilyo mu matuka mushili sana abantu, pamo nga lilya line fye baisula. Mulelolela cilya abaleshitisha bashala beka e lyo mwatendeka ukulanshanya nabo. Mwilafusha ifya kulanda.
4. Finshi twingalanda nga tulebombela mu fifulo fya makwebo?
4 Finshi Nalalanda? Nga muli ababomfi abengi, mulelanda ku mukalamba wa babomfi. Kuti mwatila: “Calyafya ukusanga ababomba pa ng’anda, e co twamutandalila kuno kwine mubombela. Ninjishiba ukuti muli pa ncito, e co nshakokole.” Pa kuti bekatumona kwati tuleshitisha, kuti cawama ukukanalanda pa misangulo kano fye nga baipusha uko tufumya indalama pa kupulinta impapulo. Ukulingana ne tuuka mwaya mu kushimikilamo, nalimo kuti mwalomba kuli bamaneja ukumusuminisha ukulanda ku babomfi babo. Mulelanda fye ifyebo fimo fine kuli bena. Umubomfi nga nakwata ifya kucita ifingi, mwifusha ifya kulanda kabili mushileni trakiti. Nga tabamusuminishe ukulanda na babomfi, nalimo kuti mwasha impapulo umo batushisha.
5. Mulandu nshi tulingile ukulashimikila mu fifulo fya makwebo ukwabula umwenso?
5 Apo Yesu na Paulo baleshimikila uko abantu balebombela ukwabula umwenso, na ifwe bene e fyo tufwile ukucita. (Mat. 4:18-21; 9:9; Imil. 17:17) Mulelomba Yehova ukumwafwa ukuba abatekanya kabili abashipa. (Imil. 4:29) Banono fye e bo mushingasanga apo babombela, kanshi mukesheko ukushimikilako mu fifulo fya makwebo.