Inshila na Shimbi Isha Kushimikililamo ku Cintubwingi

1. Ca kumwenako nshi Abena Kristu mu nshiku sha batumwa batushilile?

¹ Abena Kristu bakubalilapo tabalepelela fye pa kushimikila ku ng’anda ne ng’anda, lelo baleshimikila na ku cintubwingi. (Imil. 20:20) Ku ca kumwenako, baleya mwi tempele umo baishibe ukuti e mwalesangwa sana abantu. (Imil. 5:42) Umutumwa Paulo na o ilyo ali mu Atena, aleshimikila ku balesangwa pa maliketi cila bushiku. (Imil. 17:17) Muno nshiku inshila iyo tubomfya sana pa kushimikila, bunte bwa ku ng’anda ne ng’anda. Na lyo line, tulaya na mukushimikila ku fifulo uko bemika imyotoka, ku fifulo fya makwebo, ku fifulo fya kwangalilako, mu misebo umupita abantu abengi, e lyo na ku fifulo fimbi pa kuti twingashimikila abantu konse kuntu bengasangwa. Nangu ca kuti bakasabankanya bonse balekoseleshiwa ukulabombako ubunte bwa ku cintubwingi, bakasabankanya abengi bali no kukwata ishuko lya kubombako ubunte bwa ku cintubwingi mu nshila na shimbi shibili.

2. Ni nshila nshi imbi iya kushimikililamo iyo batendeke ukwesha mu November mu 2011?

² Inshila Yaibela iya Kushimikililamo mu Matauni Ayakalamba: Nga fintu twalandilepo mu citabo ca Ilyashi lya Nte sha kwa Yehova mu 2013 pe bula 16 na 17, ukutendeka mu November 2011, kwali ukwesha inshila imbi iya kushimikililamo ku cintubwingi mu musumba wa New York City. Kwaleba ukubika amatebulo no tumastandi twa mawilo mu ncende sha mu tauni umupita sana abantu apo baletantika impapulo sha fitundu fyalekanalekana busaka busaka. Cila bushiku abantu abengi nga nshi balepita pali ishi ncende, pamo fye na balya abekala mu fifulo umo bashisuminisha abantu bambi ukubatandalila e lyo na balya abashisangwa pa mayanda. Abantu abengi balitemenwe impapulo shesu ica kuti mu mweshi fye umo bamunyinefwe bashalike magazini 3,797 ne fitabo 7,986. Abantu abengi balalomba ukuti balebasambilisha Baibolo. Apo bamunyinefwe balefwaisha ukutendeka amasambililo ya Baibolo, balepoka ama-adresi yonse aya bantu abalefwaya ukusambilila no kuyatuma ku cilonganino icibombela kuli iyo ncende pa kuti bamunyinefwe aba kuli ico cilonganino bakabatandalile.

3. Bushe iofeshi lya musambo lilepekanya shani ukushimikila ukubomfya iyi nshila iipya?

³ Pa mulandu wa kuti iyi nshila ilebomba bwino sana, nomba na batampa ukuibomfya na mu misumba imbi iikalamba mu fyalo fimbi. Iofeshi lya musambo e lisala imisumba umo bengabomfya iyi nshila. Ilingi, imisumba basala ni ilya umwaba sana ifitesheni umusangwa sana abantu nelyo ifikuulwa fya maofeshi ifingi sana nelyo umwaba amayanda ya ntunti. Lyena, iofeshi lya musambo lilalembela abakalabombako uyu mulimo no kubeba ifyebo na fimbi. Ilingi abo basala ukubombako uyu mulimo ni bapainiya ba nshita yonse na bapainiya baibela. Na lyo line, mu ncende shimo bapainiya bakwafwilisha nabo balabasala ukubombako.

4. Bushe ababomfya iyi nshila yaibela iya kushimikililamo ku cintubwingi babomba shani?

⁴ Ifyo Bashimikila: Ababomfya iyi nshila yaibela iya kushimikililamo ku cintubwingi, balolela umuntu umwine aisa pe tebulo lya mpapulo. Lyena balamweba ukubulapo impapulo isho alefwaya. Nga nakwata amepusho ayali yonse, aba bapainiya balasuka ukubomfya Baibolo. Nga asendapo impapulo, tabalandapo pa misangulo. Lelo nga aipusha uko tufumya indalama tubomfya mu mulimo wesu, kuti bamulondolwela ukuti abalefwaya ukusangwilako balatuma imisangulo kwi ofeshi lya musambo ukubomfya adresi iili mu lupapulo. Nga bamona ukuti alefwaisha ukusambilila, balamwipusha ukuti: “Bushe kuti mwatemwa ukuti umo akesemutandalila ku ng’anda?” nelyo ukuti: “Bushe mwalishiba no kuti tulasambilisha abantu Baibolo ukwabula no kubalipilisha ukubomfya ulu lwine lupapulo?”

5. Bushe abaleshimikila ukubomfya iyi nshila ipya balenonkelamo shani?

⁵ Abalebomfya iyi nshila ya kushimikilamo balenonkelamo icine cine. Munyinefwe umo no mwina mwakwe balembele ukuti: “Cila bushiku ilyo tuli pe tebulo lya mpapulo, tulamona abantu abengi abalepita. Ici cilenga tulemona ukuti natukwata umulimo uukalamba uwa kusambilisha abantu mu calo conse. Ukumona abantu bonse aba no kutontonkanya pa fyo Yehova abasakamana kwalilenga twatwalilila ukubombesha no kubika sana amano ku mulimo wa kushimikila. Tulelenganya ukuti Yehova afwile alaceeceeta imitima ya bantu bonse abalepita pe tebulo ukufwaya abayana. Nomba tuleumfwa ukuti tulebombela sana pamo na bamalaika.”

6. (a) Ni nshila nshi na imbi iya kushimikililamo ku cintubwingi iyo baletantika mu filonganino ifingi, kabili ipusene shani ne nshila yaibela iya kushimikililamo mu matauni ayakalamba? (b) Bushe ifilonganino kuti fileumfwana shani pa kubomba ubunte bwa ku cintubwingi?

⁶ Ukushimikila ku Cintubwingi uko Icilonganino Capekanya: Ukulunda pa nshila ya kushimikililamo iyo tulandilepo, kuli inshila na imbi iyo amabumba ya baeluda ayengi yalepekanya. Muli iyi nshila imbi iya kushimikililamo, bakasabankanya balebika itebulo apapita sana abantu mu cifulo icilonganino cabo cishimikilamo. Iyi nshila yapusanako ne nshila yaibela iya kushimikililamo mu matauni ayakalamba, pantu ilya yena abakubombela pe tebulo lya mpapulo balefuma mu filonganino fyalekanalekana lelo balebombela pa ncende imo ine mu misumba yasalwa ne ofeshi lya musambo.—Moneni akabokoshi akaleti “Mulelanshanya pa Kuti Mulebomba Bwino.”

7. Ku ncende uko iyi nshila ya kutantika impapulo pe tebulo ingabomba, bushe baeluda bakalatantika shani imibombele?

⁷ Baeluda kuti bamona nga ca kuti mu cifulo icilonganino cishimikila mwaliba ififulo umupita sana abantu abengi no kumona nga iyi nshila kuti yabomba mu cifulo cabo. Incende shimo ishingawama ukubikapo itebulo lya mpapulo ni pa fitesheni, mu ma parka, mu misebo umupita sana abantu, pa fikuulwa fikalamba ifyakwata amatuuka mu kati, pa ma koleji, pa fibansa fya ndeke, e lyo ne ncende ukuli ifya kusefyasefya ifya cila mwaka. Kuti cawama nga ca kuti mulebika itebulo lya mpapulo pa cifulo cimo cine, pa nshiku shimo shine, na pa nshita shimo shine. Ilingi abantu balapoka sana impapulo nga mwabika itebulo lya mpapulo pa fikulwa fikalamba ifyakwata amatuuka ayengi mu kati ukucila nga mwabika pe tuuka ilyaba fye lyeka pantu abaleisa kwi tuuka babika fye amano ku co bakonkele. Mu ncende shimo pamo nga mu misebo umupita sana abantu, kuti cawama ukubomfya fye ka standi akanono aka mawilo. Natupekanya ifyebo ifisuma ifingamwafwa ukupanga apa kubika Ulupungu lwa kwa Kalinda na Loleni! e lyo ne citabo ca Ico Baibolo Isambilisha kabili baeluda kuti bakopolola ifi fyebo pali adresi yesu iya pa Intaneti. Bapainiya na bakasabankanya abo baeluda bakasala ukubomba uyu mulimo, bakulabomba filya fine ifibomba balya abashimikila mu nshila yaibela iya kushimikililamo mu matauni ayakalamba kabili bafwile ukulaumfwila sana ifyo kangalila wa mulimo akulabeba. Nga basanga umuntu uulefwaya sana ukusambilila lelo uushikala mu cifulo icilonganino cabo cishimikilamo, ilyo line bafwile ukulemba formu ya Mukwai Fwayeni Uyu Muntu (S-43).

8. Nga ca kuti pa cilonganino cenu tabapekanya ukushimikila ukubomfya itebulo lya mpapulo, bushe ni kwisa kumbi mwingashimikila ku cintubwingi?

⁸ Nga ca Kuti Ishi Nshila Shibili te Kuti Shibombe pa Cilonganino Cenu:Mu fifulo umo ifilonganino fimo fishimikila limbi te kuti mube incende apapita abantu abengi ica kutila kuti calinga ukubomfya itebulo lya mpapulo nelyo ka standi ka mawilo. Na lyo line, bakasabankanya ba muli ifyo filonganino ilyo baleshimikila kuti babombako no bunte bwa ku cintubwingi. Bushe mu cifulo mushimikila mwaliba icifulo apaba amashitolo ayengi, nelyo ishitolo apasangwa sana abantu? Bushe kwaliba parka nelyo icifulo ukusangwa sana abantu? Bushe mu cifulo mushimikila mulabako fimo ificitika mu nshita mu nshita ukusangwa abantu abengi? Nga ni fyo ninshi kuti mwabombako ubunte bwa ku cintubwingi.

9. Mulandu nshi tulingile ukubikila amano ku kushimikila abantu konse uko bengasangwa?

⁹ Yehova afwaya “abantu balekanalekana bakapusuke no kwishiba bwino bwino icine.” (1 Tim. 2:4) Uyu e mulandu tulebombesesha ukushimikila ku bantu abengi ilyo impela tailaisa. (Mat. 24:14) Mu ncende ishingi abantu tabasangwa sana pa mayanda. Lelo kuti twabashimikila nga twaya ku fifulo ukusangwa sana abantu. Kuli bamo, ubunte bwa ku cintubwingi e nshila fye yeka iyo twingabashimikililamo. E ico natulebombesha mu mulimo wesu pa kulashimikila abantu konse uko bengasangwa.—2 Tim. 4:5.

[Akabokoshi pe bula 5]

Mulelanshanya pa Kuti Mulebomba Bwino

Twalisanga ukuti limo bakasabankanya aba mu filonganino ifyapalamana balabomba ubunte bwa ku cintubwingi mu musebo umo wine, pa cifulo ca kwimikapo imyotoka cimo cine, pe tuuka limo line nelyo pa citesheni cimo cine. Bakasabankanya balasha magazini mu fifulo fimo fine umufikila abeni, na mu fifulo fimo fine ifya makwebo. Ici cilalenga aba makwebo na bene ba mayanda ukutendwa nangu ca kuti bakasabankanya tabaleya pa nshita imo ine. Kanshi kuti cawama nga muleshimikila ku cintubwingi, mulebombela fye mu cifulo ca cilonganino cenu.

Nga bakasabankanya balefwaya ukubomba ubunte bwa ku cintubwingi mu cifulo icilonganino cimbi cishimikilamo, intanshi balingile ukulanda na kangalila wa mulimo uwa mu cilonganino cabo. Lyena akalanda na kangalila wa mulimo uwa muli ico cilonganino no kupoka ulusa ilyo bakasabankanya tabalaya mu kubombelamo. Nga ca kuti ifilonganino fimbi fyapeelwa ukulashimikila mu cifulo cimo cine, ba kangalila wa mulimo bafwile ukulalanshanya bwino pa kuti bakasabankanya baleshimikila ukwabula ukukalifya abene ba mayanda. Nga mulelanshanya bwino, fyonse kuti filecitika “bwino bwino kabili ukwabula icimfulunganya.”—1 Kor. 14:40.