Ni Bani Bacita Ifyo Yehova Afwaya Muno Nshiku?

1. Ni lilali tukatendeka ukusambilila muli broshuwa ya Ni Bani Bacita Ifyo Yehova Afwaya Muno Nshiku? kabili tukanonkelamo shani?

¹ Ukutendeka no mulungu wa October 28, tukalasambilila broshuwa ya Ni Bani Bacita Ifyo Yehova Afwaya Muno Nshiku? pa Isambililo lya Baibolo Ilya pa Cilonganino. Iyi broshuwa iipya iyafumine pa Kulongana kwa Citungu ukwaleti, ‘Sunga Umutima Obe!’ bailembele ukuti ileafwa abasambi ba Baibolo ukwishiba ukuteyanya kwa kwa Yehova. Ukusambilila iyi broshuwa pa Isambililo lya Baibolo Ilya pa Cilonganino kukalenga tukaletasha sana pa kuba mu kuteyanya kwa kwa Yehova kabili kukatwafwa ukwishiba bwino sana ifya kubomfya iyi broshuwa mu mulimo wa mwi bala.—Amalu. 48:13.

2. Tukalasambilila shani iyi broshuwa pa cilonganino?

² Ifyo Tukalaisambilila: Katungulula afwile ukwakanya bwino inshita pa kuti isambililo limo na limo lyakwata inshita iyalingana. Pa kutendeka isambililo limo na limo, katungulula akalabelenga umutwe we sambililo. Lyena akalaeba kabelenga ukubelenga paragrafu yakubalilapo. E lyo nomba katungulula akalaipusha ibumba icipusho ico apekenye ica paragrafu ya kubalilapo. Pa numa, ku kalaba ukubelenga no kulanshanya paragrafu iitendekele ne filembo fyatikama e lyo na maparagrafu yali pe samba lya iyo paragrafu. Nga abelenga aya amaparagrafu, katungulula akalaeba abali mwi bumba ukulanda ifyo ifyebo fili muli aya amaparagrafu fileasuka icipusho cili pa ntendekelo, e kutila umutwe we sambililo. Muli iyi broshuwa mwaliba ne fikope ifingi ifyo abali mwi bumba bengalandapo. Amalembo ayakumine sana umutwe we sambililo yalingile ukubelengwa nga kuli inshita. Ilyo mushilatendeka isambililo limbi, katungulula afwile apituluka mwisambililo ukubomfya ifipusho fili pa mpela ye bula. Nga ca kuti pe bula pali akabokoshi kaleti “Ishibilenipo na Fimbi”, akeba kabelenga ukubelenga ifyebo filimo, lyena akeba abali mwi bumba ukulandapo ifyo umusambi wa Baibolo akanonkelamo nga akonka ifili mu kabokoshi. Pa mpela ye sambililo nga kuli inshita, katungulula kuti aipusha icipusho cili e mutwe we sambililo ku kupitulukamo. Ifi twalanda e fyo tukalacita pa Isambililo lya Baibolo Ilya pa Cilonganino. Tatuletila e fyo tukalabomfya iyi broshuwa na pa kutungulula amasambililo ya Baibolo.

3. Finshi tulingile ukucita nga tulefwaya ukunonkelamo sana mu kusambilila iyi broshuwa?

³ Pa kuti mukalenonkelemo sana, mukalepekanya bwino sana amasambililo ilyo mushilaya ku kulongana. Mukale-esha na maka ukwasukapo. Ilyo mulelanshanya, muletontonkanya pa fyo ifyebo mulesambilila fingafwa abasambi ba Baibolo. Shi lekeni ifyo tukalasambilila muli iyi broshuwa iipya fikatwafwe ukwafwilisha abantu bambi ukwisa mu kucita ifyo Lesa afwaya pa kuti nabo bene bakakwate isubilo lya kwikala umuyayaya.—1 Yoh. 2:17.