Isambililo lya Citabo pa Cilonganino Lilaafwilisha Imibombele ya Masomo
1 Isambililo lya Citabo pa Cilonganino libomba ulubali lwakatama muli programu wa masomo ya kuteyanya kwa kwa Yehova. Amabumba ye sambililo lya citabo yalasalanganiwa ukupulinkana icifulo ca kubombelamo, ukucilenga ukuba icingawamina bonse ukusangwako. Mu kuba ne sambililo mu bwina mupalamano bwabo, abalesekelela kuti pambi bacilapo kupokelela ubwite bwa kusangwako.
2 Ukubombesha kulacitwa ku kusunga ibumba limo na limo ilinono mu cipimo. Ici cisuminisha katungulula ukupeela ukwafwilisha kwa pa lwakwe kuli umo na umo. Te bonse basambilila pa cipimo cimo cine. Nga ca kuti uuli onse nakwatako ubwafya mu kumfwikisha icishinka cimo nelyo fye ni pa numa ya kusambilila ilyo isambililo mu kubangilila, katungulula kuti mu kulundapo pambi alanshanya cene pa numa ye sambililo. Mu kulundapo, mu kuba ne bumba linono, kulabako amashuko ya mu nshita ayafulilako ku kwasukapo no kwakana mu kubelenga amalembo. Bushe ulakanako mu kulanshanya pa kwasukapo lyonse? Bushe ulesha ukwasuka mu mashiwi yobe yene? Ukuba kobe uwaipekanya ukwakanamo kuti kwaba ukwa kunonsha kuli iwe na kuli bambi. Ilyo ulepekanya, bomfya amaka yobe aya kulingulula ku kwiluka fintu pa lobe wingabomfya ifishinka fimo ifili mwi sambililo.—Heb. 5:14.
3 Pa kulolekesha inshila sha kusambilisha ishibomfiwa na katungulula we sambililo lya citabo, kuti wasambilila ifya kutungulula amasambililo ya Baibolo aya mu ŋanda mu nshila yacilapo kubamo buseko ne yabamo kufunda. Pa numa amaparagrafu yabelengwa kuli munyina wafikapo, ifipusho filalanshanishiwa. Katungulula we sambililo alakoselesha bonse ukulandisha. Nge nshita yasuminisha, alatukuta ukuletako kulandapo pa malembo yaloshiweko ku kutwaafwa ukumfwikisha fintu yalebomba. (Linganyako Nehemia 8:8.) Pa tushita tumo tumo kuti alundako kulandapo ukwipi ukwa kulengo kumfwika ukwakwe umwine nelyo ukubomfya ifipusho fya kwafwilisha ku kuletako icishinka cikalamba. Ica kumwenako nelyo icilangililo kuti pambi catwaafwa ukumona fintu ifyebo fyampene ku bumi bwesu.
4 Abasangwa ku kulongana pa Masambililo ya Citabo aya pa Cilonganino yamo banono nga nshi. Bushe ulasangwako lyonse? Nga te ifyo, ulapusa ukupayanya kwacindama. Imitantikile ye sambililo lya citabo ni imo iya nshila umo Yehova alangilamo ukusakamana kwakwe kuli ifwe. (1 Pet. 5:7) Afwaya ifwe ukulunduluka mu kwishiba na mano pa kuti twingaba abakosa lwa ku mupashi. Pa lubali lumbi, Satana akafwaya ifwe ukutotobesha ukukula kwesu ukwa ku mupashi no kututompola pa kuti twingalabomfiwa mu kucepako kuli Yehova no kuteyanya Kwakwe. Wileka ici cicitike! Leka imibele ya cikabilila, iya kutemwa muli ili bumba lyabamo isenge ifike pa mutima obe no kukukunta ku kutwalilila ukulumbanya Yehova.—Linganyako Ilumbo 111:1.
5 Ukukumana kwa mu mulimo ukwawamina bakasabankanya kulatantikwa pa fifulo ifingi ifye sambililo lya citabo. Uku kuti pambi kwaba kwa kucitilo bunte kwa mu kati ka mulungu, ukwa pa mpela ya mulungu, nelyo ukwa mu cungulo bushiku. Katungulula we sambililo lya citabo alashininkisho kuti icifulo ca kubombelamo e po cili no kuti umo akabapo ku kubuula ubutungulushi mwi bala. Ukukumana kwa mulimo wa mwi bala kulingile ukusenda amaminiti te kucila 10-15. Katungulula kuti pambi mu kwipifya alanguluka ilembo lya bushiku nga ca kuti nalyampana ku mibombele yesu iya kushimikila no kupeela imitubululo ya mu mulimo wa mwi bala imo nelyo ibili iya kulungatika nelyo ukupeela icilangililo icipi pa cipeelwa ca ndakai.
6 Katungulula alatukuta pa ciputulwa ca nshita ukubomba pa lwakwe na umo umo mwi bumba lyakwe, ukupeela ukukoselesha kwalinga no kukansha.—Linganyako Marko 3:14; Luka 8:1.