Bakangalila Abatungulula—Bakatungulula ba Masambililo ya Citabo pa Cilonganino
1 Lishuko lyaibela kuli eluda wafikapo nelyo umubomfi utumikila ukutungulula Isambililo lya Citabo pa Cilonganino. Ukusakamana bumupashi bwa baba mwi bumba lyakwe waba mulimo uwakakala. Imilimo yakwe yaba patatu.
2 Ukuba Kasambilisha Wafikapo: Ukupekanya ukusuma nga nshi kulafwaikwa pa kuti cila mulungu katungulula we Sambililo lya Citabo pa Cilonganino asambilishe ifingomfwika ku baba mwi bumba abamo. Afwaisha ukulenga abantu ukutesekesha nga nshi ubucindami bwa filesambililwa. Ukucila ukulandapo mu kucishamo umwine wine, apo amona calinga, afwile ukwipusha amepusho pa lwa fishinka fili mwi sambililo fintu alefwaya ukuti bafyumfwikishe. Afwile ukubombela pa kulenga ukusambilila ukumfwika bwino kabili ukwa kufunda no kulenga bonse abasangwapo ukwasukapo. Ubuyo bwakwe bwa kukuula lwa ku mupashi, ukulenga abalipo ukwishiba fintu bengabomfya ifyebo, no kulenga abantu ukumfwikisha ifyebo no kubafika pa mitima.—1 Tes. 2: 13.
3 Ukuba Kacema wa Kwaafwa: Katungulula we Sambililo lya Citabo pa Cilonganino aba “ngo mwa kufisama ku mwela, ngo mwa kubelama ku kupongoloka kwa mfula.” (Esa. 32:2) Alasakamana nga nshi bonse ababa mwi bumba abamo no kubaafwa lwa ku mupashi lyonse lintu kwaba umo uwafuupulwa.—Esek. 34:15, 16; 1 Tes. 2:7, 8.
4 Ukuba Kashimikila Wapimpa: Katungulula we Sambililo lya Citabo pa Cilonganino alaba uwiluka ku kutantika inshita lintu bonse ababa mwi bumba abamo bengalakumana ku kubombako ubutumikishi bwa mwi bala lyonse. Alatungulula umulimo wa kubila, apo alishiba ukuti ukushimikila lyonse, ukupimpa, no kucincila fintu alanga mu mulimo, e fyo na baba mwi bumba lyakwe bakalanga. (Kol. 4:17; 2 Tes. 3:9) Mu kuya kwa nshita, alafwaisha ukubomba na baba mwi bumba lyakwe bonse mwi bala. Nga tulefwaya ukuwamyako ukulamuka kwesu ukwa kushimikila no kusambilisha mu butumikishi, katungulula we Sambililo lya Citabo pa Cilonganino kuti atwaafwa ukucite ci.—1 Tim. 4:16; 2 Tim. 4:5.
5 Cine cine twalipaalwa apo kwaliba ifi fya bupe ku bantu, abaiteyanya lyonse ku kutwaafwa lwa ku mupashi no kutukoselesha mu kutemwa. (1 Tes. 5:14) Shi natutesekeshe uku kupayanya kushaiwamina ukufuma kuli Yehova pa kwasukapo lyonse pe sambililo lya citabo no kubombako umulimo wa bukabila mu citetekelo.—Heb. 10:25.