Bomfyeni Bwino Ifitabo fya Kale
1 Abantu mwi sonde lyonse balitulaika mu malaibrari ifitabo fya kale ifingi nga nshi. Nomba, bushe kumwenamo nshi ukwa nshita ntali kuntu ifyo fitabo fyaletela abantunse? (Luk. Mil. 12:12) Ifyacindama nga nshi fitabo ifitontomesha pa Bufumu bwa kwa Lesa na pa fintu bukacitila abantunse. Mu filonganino ifingi mucili ifitabo fya musango yo ifya kale ifyasabankanishiwe pa ntanshi ya 1985. Mu January tukalatambika ifi fitabo ku cintubwingi.
2 Fyalicindama Nga Nshi: Nangu line bamo kuti tulemona kwati ifi fitabo fyalipita ilyo tulefilinganya ku mpapulo shesu ishipya, tatufwile ukulaba ukuti mwaba icine ca mu Malembo. Ubukombe bwa Bufumu ubwalondololwa muli fyene na lino line bucili ubwacindama, kabili umuntu nga abumfwila, kuti bwamupususha. (Yoh. 17:3) Kanshi tufwile ukubombesha ukubomfya bwino ifi fitabo fya kale.
3 Uko mwingamwena ubucindami bwa ifi fitabo ni ku fintu cali ku mwanakashi uo banakulu bashilile impapulo sha Sosaite shimo isha kale ilyo bafwile. Nkashi aipwishe uyu mwanakashi nga ca kutila alishibe ubucindami bwa mpapulo. Umwanakashi atile: “Nshaishiba ubucindami bwa ifi fitabo, nomba kuti nacita shani pa kuti njishibe?” Ulya mwanakashi alisumine ukutendeka ukusambilila Baibolo, alisambilishiwe icine, lyene alicindike nga nshi ulya laibrari untu banakulu bamushilile. We bupyani bushaicindamina buntu filya fitabo fya kale fyali!
4 Fyananyeni: Ukulunda pa kutambika ifitabo fya kale ku ng’anda ne ng’anda na ku fipempu fya kubwelelamo, mwilalaba ukufitambika na kuli balya mwaishiba ukuti balitemwa ukubelenga impapulo shesu, ukusanshako abalembesha bamagazini ba Ulupungu lwa kwa Kalinda na Loleni! na bantu mutwalila bamagazini lyonse. Kuli balya musambilila na bo Baibolo, nga mwasala ifitabo fya kale fimo ifya kubatwalila, kuti fyaba mufula usuma uwa kwishiba ukukabaafwa ukulunduluka mu kumfwikisha icine. Ibukisheni ukushita ifitabo fya kale ifyenu nga kuli ifyo mushakwata. Nga mwashitako, mukapanga laibrari wa teokrasi uwacindama, uo mukalamwenamo apakalamba mwi sambililo lya pa lwenu.
5 Ukucila ukubika fye ifitabo fyesu ifya kale, natufibomfye bwino ku kucincisha abantu tushimikila, ‘ukubela Lesa akatiina, no kubaka amafunde yakwe.’—Luk. Mil. 12:13.