Umukululo wa Fipusho

◼ Ni mpapulo nshi shilingile ukubikwa muli laibrare we Isukulu lya Butumikishi bwa Teokrasi?

Impapulo shafulisha isha ku mupashi shalipayanishiwa ku kunonsha abantu ba kwa Lesa. Apantu bakasabankanya abengi tabakwata ishi mpapulo shonse pa lwabo, laibrare we Isukulu lya Butumikishi bwa Teokrasi pa Ŋanda ya Bufumu apayanya inshila ku kusapika mu mpapulo isho nalimo shishingabapo. Muli ifyo, uyu laibrare alingile ukubamo amabupilibulo ya Baibolo ayengi, impapulo sha ndakai isha Sosaite, Ubutumikishi Bwesu Ubwa Bufumu, amabaundi volyumu ya The Watchtower na Awake!, na ma Watch Tower Publications Index. Mu kulundapo, dikishonari musuma uwa muno nshiku alingile ukusanshiwamo. Ba encyclopedia, ba atlas, nelyo ifitabo fimbi ifya kuloshako ifilanda pa lulimi ne lyashi lya kale kuti fyaba ifya kwaafwa, nga namufikwata. Nangu cibe fyo, ico tulingile ukwangwako apakalamba ni mpapulo shapayanishiwa no “musha wa cishinka kabili uwashilimuka.”—Mat. 24:45.

Inshita shimo, cilashimikwa ukuti ifitabo fyalubana filabikwa mu laibrare we Isukulu lya Butumikishi bwa Teokrasi. Te kuti cibe icalinga ukusanshamo ifitabo fya malyashi ya kwelenganya, amalyashi yalanda pali Baibolo ayo yakomaila pa kulengulula, nelyo ifitabo filanda pa mano ya buntunse nelyo ukupupe mipashi. Laibrare we Isukulu lya Butumikishi bwa Teokrasi alingile ukusanshamo fye ifyebo ifyo fikalenga abalefibomfya ukutwalilila ukulunduluka lwa ku mupashi.—1 Tim. 4:15.

Kangalila we sukulu e washingamwa na laibrare, nangu cingati munyina na umbi kuti apeelwa umulimo wa kumwaafwa mu kusakamana laibrare. Alingile ukushininkisha ukuti mu laibrare muleishila impapulo na shimbi, ukusanshako ne mpapulo shipya lintu fye shaisa. Icitabo cimo cimo cilingile ukulembwapo mu kumonekesha mu kati ka nkupo ya ku ntanshi ishina lya cilonganino uko cafuma. Cila mwaka, ifitabo filingile ukubebetwa ukumona nga ca kuti ifili fyonse filekabila ukuwamishiwa nelyo ukupyanikwapo.

Bonse kuti babombela pamo mu kusakamana laibrare. Mulingile ukulanenekela lintu muleikata ifitabo no kufibomfya. Abana tabalingile ukusuminishiwa ukwangala ne fitabo, no uli onse talingile ukushilamo. Icishibilo camonekesha nalimo kuti cabikwa pa ncende imo ku kucinkulako ukuti ifitabo tafilingile ukusendwa ukufuma mu Ŋanda ya Bufumu.

Apo ifilonganino fipya filetwalilila ukupangwa, ukwabula ukutwishika amalaibrare ayengi nayacepa. Bakasabankanya bamo abaikwatila impapulo shesu isha kale nalimo kuti batontonkanya pa lwa kushisangwila ku cilonganino. Baeluda nalimo kuti bafwaya ukuorda amabaundi volyumu ya Sosaite ayapulintwa cipya cipya aya Watchtower. Muli ishi nshila, laibrare we Isukulu lya Butumikishi bwa Teokrasi mu cine cine akatwaafwa bonse apakalamba ukushula ifyuma fyashikama ifya Cebo ca kwa Lesa, ifyo filenga umo ukwishiba, ukukwata amano, no kwiluka.—Amapi. 2:4-6.