Ukutantika Kupya Ukwa Laibrare ya pa Ng’anda ya Bufumu

Pa myaka iingi nomba, ifilonganino icalo conse fyalinonkelamo mu kubomfya laibrare yabo iya pa Ng’anda ya Bufumu, kale iyaleitwa ati laibrare ye Sukulu lya Butumikishi bwa Teokrasi. Ku numa uku, calemonwa ukuti cali bwino cila cilonganino ukuikwatila laibrare ya ciko. Lelo, apo Amayanda ya Bufumu ayengi yalebomfiwa ne filonganino fyafulilako, fimo pali fi filonganino filanda indimi shapusanapusana, kuti caba bwino ukukwata fye laibrare ya pa Ng’anda ya Bufumu imo iyateyanishiwa bwino, ukulabikamo impapulo shipya lyonse isha lulimi lumo lumo pa Ng’anda ya Bufumu imo na imo. Amayanda ya Bufumu ayakwata umwa kulonganina ukucila pali mumo, umwa kulonganina mumo mumo mufwile ukuba laibrare ya bantu balanda ululimi balonganinamo.

Tuleenekela ukuti uku kutantika kukafwa ukukwatako incende yalinga no kucefyako ishipooswa. Kabinge, ukukumbinkanya amalaibrare ya filonganino fibili nelyo ukucilapo kufwile kukalenga ukukwata amalaibrare yasuma. Nga yakumbinkana, amakope yambi aya fitabo nakalimo kuti yasungwa no kuyabomfya ku ntanshi ilyo Amayanda ya Bufumu ayapya yakakuulwa. Nga ca kuti Ing’anda ya Bufumu yalikwata kompyuta ya Watchtower Library pali CD-ROM, bamo kuti bamwenamo mu kubomfya ici cibombelo.

Munyina umo, maka maka umo uwa Bakangalila we Sukulu lya Butumikishi Ilya Bulesa, akabomba nga kangalila wa laibrare imo na imo iya pa Ng’anda ya Bufumu. Afwile lyonse ukulabikamo impapulo shipya ukulunda ku shabamo kale, ukulemba ku nkupo ya mu kati iya cila citabo busaka busaka ku kulanga ukuti citabo ca mu laibrare ya pa Ng’anda ya Bufumu. Afwile ukubebeta laibrare ukushininkisha ukuti impapulo shonse e mo shili no kuti shili fye bwino, nalimo umuku umo pa mwaka. Takuli impapulo ishifwile ukusendwa muli aya malaibrare ukutwala ku nse ya Ng’anda ya Bufumu.

Bonse ababishanya ne cilonganino balatwalilila ukumwenamo sana muli laibrare ya pa Ng’anda ya Bufumu. Shi natulelanga ukuti pa lwesu twalicindamika uku kutantika ukupitila mu kusakamana no kubomfya iyi laibrare ukusokotelamo “ukwishiba Lesa.”—Amapi. 2:5.