Umukululo wa Fipusho

◼ Ni lilali cingalinga ukupanga ibumba na limbi ilye Sambililo lya Citabo pa Cilonganino?

Kufwile kwaba ukutontonkanya pa kupanga ibumba lipya nga cilekabilwa pa kuti abantu 15 no kubwelela pa nshi bengatwalilila ukuba pa cifulo cimo na cimo ice sambililo lya citabo, ukusanshako ne bumba likumanina pa Ng’anda ya Bufumu. Mulandu nshi ici cawamina?

Nga ca kuti amabumba ye Sambililo lya Citabo pa Cilonganino yalekwata abantu abanono, katungulula kuti aba na maka ya kwangwa ku muntu umo na umo uusangwako. Na kabili, bonse balaba ne shuko lya kwasukapo ku kuilumbulwila icitetekelo cabo. (Heb. 10:23; 13:15) Ukukwata amabumba yanono mu ncende shalekanalekana mu cifulo icilonganino cibombela kulenga abantu ukusangwa kwi Sambililo lya Citabo ilya pa Cilonganino no kwangushako ukukumana kwa kuya mu mulimo wa mwi bala. Ifilonganino ifyafusha impendwa ya fifulo fyasanga ukuti impendwa yonse iya basangwa kwi sambililo lya citabo na yo yalikula.

Kuti kwabako ifintu fyaibela ifingalenga ukuti ibumba na limbi lipangwe, nangu likaba lya bantu banono. Kuti cabe fyo mu ncende yaba ukutali nelyo nga ca kuti pa fifulo apabela amasambililo ya citabo abantu balafula sana nelyo apa kwikala palacepa. Nga cilekabilwa, ibumba kuti lyapangwa nga balekabila ukukumana akasuba pa kuti abakoloci, ababomba ubushiku, nelyo ba nkanshi abaupwa ku bashili Inte balesangwako.

Ibumba limo na limo ilye sambililo lya citabo lilingile ukukwata bakasabankanya bakosa lwa ku mupashi kabili abapimpa pamo na katungulula wafikapo na kabelenga. Bamunyina balingile ukutinamina imilimo ya musango yu mu cilonganino.

Baeluda kuti baafwa mu kulenga icilonganino ukulunduluka ukupitila mu kushininkisha ukuti amabumba ye sambililo lya citabo ilya pa cilonganino yali ne mpendwa yalinga iya bantu kabili yalesakamanwa bwino lwa ku mupashi kabili yalekumanina pa fifulo ifili bwino. Nga kuti cacitika, amabumba yapya yalingile ukupangwa pa kuti bonse bengasangamo ubusuma muli uku kutantika kwaibela ukwa ku mupashi. Bushe kuti mwapeela ing’anda yenu kukulatungulwilamo isambililo lya citabo? Abengi abacite co baba na mapaalo ya ku mupashi.